1, 2. Mboka ya ka konga iilonga kiilongo yilwe ohaya kala nomashongo geni uuna ya shuna komagumbo gawo? (Tala kethano ndyoka li li petameko.)

EDUARDO ota ti: “Sho nda li pondje yoshilongo, onda li nda pewa oshinakugwanithwa oshinene miilonga yandje nonda li handi futwa nawa. * Ihe sho nda tameke okukonakona Ombiimbeli nOonzapo dhaJehova, onda mono kutya oshinakugwanithwa shandje sha simanenena okusila oshimpwiyu aanegumbo yandje pambepo, ihe hapalutu owala. Onkee ano onda tokola ndi shune kegumbo.” —  Ef. 6:4.

² Eduardo okwa li e shi kutya ota ka nyanyudha Jehova ngele okwa shuna kegumbo. Ihe ngaashi Marilyn ngoka a popiwa moshileshwa sha tetekele, Eduardo naye okwa li e na okukoleka ishewe ekwatathano lye naanegumbo lye. Okwa li wo e na okusila omukadhi noyana oshimpwiyu moshilongo shawo moka mu na uuhupilo tawu shongola. Oya li taya ka hupa ngiini? Ekwatho lini ya li taya ka pewa kuyalwe megongalo?

3. Ngele aavali ihaa kala pegumbo, ohashi gumu ngiini aanona?

³ Eduardo ota ti: “Kanda li po pethimbo sho aamwandje ya li ya pumbwa ewiliko nohole yandje. Inandi ya leshela omahokololo gOmbiimbeli, inandi galikana pamwe nayo, inandi yu ukata, ngame ishewe  inandi ya dhanitha.” (Deut. 6:7) Anna, omwanakadhona gwosheeli, ota ti: “Molwashoka tate ka li po pegumbo onda adhika kuupyakadhi wopamaiyuvo. Sho a galukile kegumbo, katwa li tu na ekwatathano naye. Uuna ta papatele ndje, kanda li handi kala ndu uvite po sha.”

4. Ngele omusamane okwa kala ihaa kala pamwe nomukadhi noyana, omolwashike hashi ka kala oshidhigu kuye okukwatela komeho pegumbo?

⁴ Ngele omusamane okwa kala ihaa kala pamwe nomukadhi noyana, ohashi ka kala oshidhigu kuye okukwatela komeho pegumbo. Ruby, omukulukadhi gwaEduardo, ota ti: “Iinakugwanithwa ayihe yomegumbo oya li komapepe gandje. Nonda li ndi igilila okuninga omatokolo pegumbo. Sho tate a galukile kegumbo, onda li ndi na okwiilonga okuvulika kuye e li omutse gwegumbo. Sigo onena, omathimbo gamwe ondi na okwiilombwela kutya kandi na okuninga omatokolo, oshoka omusamane gwandje okwa galukila pegumbo.” (Ef. 5:22, 23) Eduardo okwa gwedha ko a ti: “Aamwandjekadhona oya li yi igilila okupula epitikilo kuyina ngele oya hala okuninga sha. Ngame nomukulukadhi gwandje otwa mono kutya otu na oku yu ulukila kutya otatu longele kumwe. Ihe onda li ndi na okwiilonga okukala handi ya kwatele komeho metsokumwe nOmbiimbeli.”

5. Ongiini omusamane gumwe a koleke ekwatathano lye naanegumbo lye konima sho a galukile kegumbo, noshizemo osha li shini?

⁵ Eduardo okwa li a tokola toko okukoleka ishewe ekwatathano lye noyaandjawo noku ya kwathela pambepo. Ota ti: “Elalakano lyandje olya li okuthindila oshili maamwandje noku ya tulila po oshiholelwa, haku shi popya owala mokana kutya ondi hole Jehova, ihe onda li ndi na oku shi ulika.” (1 Joh. 3:18) Mbela Jehova okwa li e mu yambeke? Omwanakadhona Anna okwa ti: “Otwa li tu uvitile tate uuntsa sho ta kambadhala oku tu sila oshimpwiyu nokupanga uukuume natse naasho twa mono ta lalakanene iinakugwanithwa megongalo. Uuyuni owa li tawu kambadhala oku tu topola ko kuJehova, ihe sho twa mono aavali yetu yi itula mo moshili, natse otwa kambadhala okuninga sha faathana. Tate okwa li e tu uvanekele kutya ke na we esiku e tu thige po. Otashi vulika ando okwa li inaa gwanitha po euvaneko ndyoka, ando kandi mo mehangano lyaJehova.”

6. Aavali yamwe oya koneke shike kombinga yoyana pethimbo lyiita?

⁶ Yamwe otaya hokolola kutya sho muumbugantuzilo waEuropa mwa li iita, aanona yOonzapo dhaJehova miilongo moka, oya li haya kala ya nyanyukwa nonando oye li moonkalo oondhigu. Omolwashike mbela? Omolwashoka aavali mboka ya li kaaye na iilonga oya li haya kala pegumbo nohaya konakona nayo Ombiimbeli, taye ya dhanitha notaya popi nayo. Mbela oshike tatu ilongo mwaashika? Shoka aanona ya pumbwa unene, okukala pamwe naavali yawo, pehala lyoku ya pa oshimaliwa nenge omagano. Oohapu dhaKalunga otadhi ti kutya aanona otaya ka kala ya nyanyukwa, ngele aavali yawo ohaya kala nayo noku ya putudha. —  Omayel. 22:6.

7, 8. (a) Aavali yamwe mboka ya shuna komagumbo ohaya ningi epuko lini? (b) Ongiini aavali taya vulu okukwathela oyana kaaya kale we ye yu uvitile nayi?

⁷ Shiyemateka, sho aavali yamwe mboka ya shuna komagumbo ya mono oyana ye ya kwatela onkone, ohaya ti: “Aanona ne ihamu pandula! Ndi idhipagela po ngaa molweni, ihe kamu shi wete!” Ihe otashi vulika oyana ye ya geela, molwashoka inaya kala pamwe nayo. Oshike mbela omuvali e na okuninga, opo a kandule po uupyakadhi mboka?

⁸ Oku na okupula Jehova e mu kwathele u uve ko onkalo yawo. Oku na wo okuzimina sho ta popi noyaandjawo kutya naye oku na epuko. Ota vulu okupula oyana ye mu dhimine po. Sho kuume koye kopandjokana naamwoye taya mono kutya oto kambadhala okweeta po ombili, nena otaya ka mona kutya owa zimina epuko lyoye. Ngele owa kala wa tokola toko okupanga uukuume nayo neidhidhimiko, aanegumbo lyoye otaya ka kala ye ku hole ishewe noye ku simaneka.

9. Omolwashike inaashi pumbiwa tu kale aayamba, opo tu vule ‘okusila aanezimo lyetu oshimpwiyu’?

⁹ Omuyapostoli Paulus okwa ti kutya uuna Aakriste aanamimvo itaaya vulu we okwiisila oshimpwiyu, oyana naatekulu oye na ‘oku ya kwathela.’ Ihe okwa ladhipike wo Aakriste ayehe kutya oye na okukala ya gwanenwa ngele oye na iikulya, omizalo nehala lyokukala. Kaye na okukala haya lalakanene onkalamwenyo yopombanda nenge yi idhipagele po, opo yi ipungulile oshimaliwa shomonakuyiwa. (Lesha 1 Timoteus 5:4, 8; 6:6-10.) Opo Omukriste a ‘sile aanezimo lye oshimpwiyu,’ ina pumbwa okukala omuyamba muuyuni mbuka wu li pokuhula po. (1 Joh. 2:15-17) Ke na okweetha ‘efundjaleko lyuuyamba’ nenge ‘iimpwiyu yopayuni’ yi imbe aanegumbo lye ‘yi imonene okukalamwenyo kwashili’ muuyuni uupe waKalunga moka tamu ka kala uuyuuki. —  Mark. 4:19; Luk. 21:34-36; 1 Tim. 6:19.

10. Omolwashike kaashi li pandunge okulya oongunga?

¹⁰ Jehova oku shi shi kutya otwa pumbwa oshimaliwa. Ihe oshimaliwa itashi vulu oku tu gamena noku tu kaleka nomwenyo ngaashi uunongo wopakalunga. (Omuuv. 7:12; Luk. 12:15) Olundji aantu ihayi ipulile ko koshimaliwa shoka haya longitha oku ka konga iilonga pondje yoshilongo, noihaya kala ye shi ngele otaya thikile taya mono iilonga. Osha nika oshiponga nokuli noonkondo oku ka longa pondje yoshilongo. Oyendji mboka ye shi ninga ohaya galukile komagumbo ye na nokuli oongunga odhindji. Pehala lyokulongela Jehova ya manguluka, ohayi iyadha taya longele mboka ya lila oongunga. (Lesha Omayeletumbulo 22:7.) Nomolwashoka tashi ka kala pandunge waa lye oongunga.

11. Ongiini omutengenekothaneko hagu kwathele aanegumbo ya yande uupyakadhi wopashimaliwa?

¹¹ Eduardo okwa li e shi kutya, opo a vule okukala pamwe naanegumbo lye, okwa li e na okulongitha nawa oshimaliwa. Ye nomukadhi oya li ya ningi omutengenekothaneko gu na ko nasha nokulanda owala shoka ya pumbwa shili. Shika otashi ti kutya kaya li haya vulu okulanda kehe shoka ya hala ngaashi nale. Ihe nando ongawo, oya li ya longele kumwe nokaya li haya landa iinima mbyoka inaaya pumbwa. * Eduardo ota ti: “Pashiholelwa, aamwandje onda li nde ya kutha mo moosikola dhopaumwene e tandi ya tula moosikola dhepangelo ndhoka hadhi longo nawa.” Ye noyaandjawo oya kala haya galikana a mone iilonga mbyoka itaayi yi moshipala iinima yawo yopambepo. Jehova okwa li a yamukula ngiini omagalikano gawo?

12, 13. Omusamane gumwe okwa li a kwathele aanegumbo lye ngiini? Jehova okwa li e mu yambeke ngiini?

¹² Eduardo ota ti: “Otwa li tatu nana nondatu moomvula mbali dhopetameko. Oshimaliwa shandje osha li tashi ende tashi pu po, yo ondjambi yandje onshona kaya li aluhe ya gwana okulanda iipumbiwa ayihe. Onda li wo handi kala nda vulwa. Ihe otwa li hatu kala pokugongala kehe nokulonga pamwe momapya.” Eduardo okwa li a tokola kutya ita ka longa iilonga mbyoka tayi ke mu fala kokule noyaandjawo uule woomwedhi nenge woomvula. Ota ti: “Pehala lyaashoka, ondi ilongo okulonga iilonga yomaludhi gi ili nogi ili, opo ngele iilonga yoludhi lumwe ya pu po, onda li he vulu okulonga yilwe.”

¹³ Molwashoka Eduardo okwa li a kutha ethimbo ele okufuta oongunga dhe, okwa li a futu iifendela oyindji. Ihe shika kasha li sha kuye, oshoka okwa li ta vulu okulongela Jehova pamwe naanegumbo lye, ngaashi Jehova a hala aavali ya ninge. Eduardo ota ti: “Ngashingeyi ohandi mono okamaliwa okashona oku ka yelekanitha nondjambi ndjoka nda li handi mono sho nda li kombanda yomafuta, ihe ihatu lala nondjala. ‘Jehova iha nyengwa oku tu kwatha.’ Otwa li nokuli twa tokola okukokola ondjila. Oshikumithi okumona nkene uupyakadhi wetu wopashimaliwa wa tameke okupupala nosha li she tu ningile oshipu okugwanitha po oompumbwe dhetu konima sho twa tameke uukokolindjila.” —  Jes. 59:1.

14, 15. Aanegumbo otaya vulu okuninga po shike, ngele taya thiminikwa ya pitithe iinima yopamaliko komeho giinima yopambepo? Noshiholelwa shawo oshiwanawa otashi vulu okweeta iizemo yini?

¹⁴ Miilongo oyindji, aantu yamwe ohaya kala yu uvite kutya oye na okupa ookuume naakwanezimo oshimaliwa nenge omagano. Eduardo ote shi yelitha ngeyi: “Momuthigululwakalo gwetu otu hole okugandja, ihe opu na okukala pu na ongamba. Ohandi lombwele aakwanezimo yandje nombili kutya ngele ondi na sha, otandi vulu oku ya pa, ihe itandi ke shi ninga ngele otashi ki imba ndje ndi kwathele aanegumbo lyandje pambepo.”

¹⁵ Ngele ngoka a li a ka longa kombanda yomafuta okwa tokola a galukile kegumbo, aakwanezimo yamwe ohaye mu sheke nohaya kala ye mu geela, unene tuu ngele oya li haya hupu muye. Shika ohashi ningilwa wo mboka haya tindi oku ka longa pondje yoshilongo. Yamwe ohaya ulwa nokuli kutya kaye na ko nasha naakwanezimo yawo. (Omayel. 19:6, 7) Anna, omwanakadhona gwaEduardo, okwa ti: “Ngele otwa tindi okupititha komeho iinima yopamaliko, aakwanezimo yetu yamwe otashi vulika ya ka mone kutya nani okulongela Jehova oko kwa simana kutse. Ngele itatu shi ningi, nena kaye na esiku ye ke shi uve ko.” —  Yelekanitha 1 Petrus 3:1, 2.

16. (a) Ongiini omuntu ta vulu ‘okwiifundjaleka’? (Jak. 1:22) (b) Jehova oha yambeke omuntu ngoka ta ningi omatokolo ga tya ngiini?

¹⁶ Sho omwiitaali gumwe ngoka a thigi po omusamane gwe noyana a thiki koshilongo shilwe shoka oshiyamba, okwa lombwele aakuluntugongalo a ti: “Oshe tu pula oshindji opo ndi ye huka. Omusamane gwandje ngoka a li omukuluntugongalo okwa li nokuli e na okweetha po oshinakugwanithwa she.” Okwa hulitha a ti: “Akwetu Jehova ando na yambeke ndje ngaa!” Jehova iha yambeke omuntu ngoka ta ningi omatokolo ge li ompinge nehalo lye, unene tuu ngele shoka otashi mu pula e ethe po oshinakugwanithwa she inaashi pumbiwa. Ihe Jehova oha yambeke aluhe omuntu ngoka ta ningi omatokolo ngoka tagu ulike kutya okwi inekela muye. —  Lesha Aahebeli 11:6; 1 Johannes 5:13-15.

17. Omolwashike wu na okupula Jehova e ku wilike manga inoo ninga etokolo lyoye, nongiini to vulu oku shi ninga?

¹⁷ Pula Jehova e ku wilike manga inoo ninga etokolo lyoye nenge inoo uvanekela omuntu sha,  pehala lyoku mu pula wa ninga nale etokolo. Galikana e ku pe ombepo ye ondjapuki, uunongo newiliko. (2 Tim. 1:7) Ipula to ti: ‘Otandi ka vulika ngaa kuJehova monkalo kehe, nuuna tandi hepekwa?’ Ngele osho, mbela oto ka vulika ngaa kelombwelo lyokukala nonkalamwenyo yanathangwa, pehala lyokuthiga po yaandjeni wu ka konge iilonga kulwe? (Luk. 14:33) Pula aakuluntugongalo ye ku pe omayele okuza mOmbiimbeli. Kala wi inekela momauvaneko gaJehova kutya ote ke ku kwatha, ngele owa vulika koompango dhe. Aakuluntugongalo itaye ke ku tokolela, ihe otaya vulu oku ku kwathela wu ninge omatokolo ngoka tage ke ku etela enyanyu tali kalelele. —  2 Kor. 1:24.

18. Olye e na okusila aanegumbo oshimpwiyu, ihe oompito dhini tu na dhokukwathela yalwe?

¹⁸ Jehova ota lombwele omitse dhomagumbo dhi humbate “omutenge” gwokusila aanegumbo lyawo oshimpwiyu esiku kehe. Natu kale hatu pandula nokugalikanena ayehe mboka haya sile yaandjawo oshimpwiyu ye li pegumbo, pehala lyoku ka konga iilonga kulwe nonando otaya thiminikwa ye shi ninge. Oonkalo inaadhi tegelelwa, ngaashi iiponga yopaunshitwe nepango lyomeendelelo, ohayi tu pe ompito yokuulukilathana ohole yopaKriste nuukwawo wanankali. (Gal. 6:2, 5; 1 Pet. 3:8) Mbela ito vulu okupa omwiitaali omukweni oshimaliwa uuna a adhika kuudhigu nenge wu mu kongele iilonga popepi noyaandjawo? Ngele oto vulu oku shi ninga, oto ke mu kwathela kaa thige po aanegumbo lye a ka konge iilonga kulwe, molwashoka kee na nkene. —  Omayel. 3:27, 28; 1 Joh. 3:17.

19, 20. Omolwashike Aakriste taya vulu okukala nuushili kutya Jehova ote ke ya kwatha?

¹⁹ Ombiimbeli otayi ti: “Mokukala kweni inamu mangwa kohole yeliko, ihe kaleni mwa gwana naashoka mu na. Oshoka Kalunga okwa ti: ‘Itandi ku etha nando; itandi ku thigi po.’ Onkee ano tu kaleni tu na omukumo, tse tu tye: ‘Omuwa oye omukwathi gwandje, itandi tila sha. Omuntu ota ningi ndje shike?’” (Heb. 13:5, 6) Shika otatu vulu ngiini oku shi tula miilonga?

²⁰ Omukuluntugongalo gumwe a za koshilongo opo tashi putuka okwa ti: “Olundji aantu ohaya ti kutya Oonzapo dhaJehova ohadhi kala dha nyanyukwa. Oya ndhindhilika wo kutya nOonzapo ndhoka kaadhi na oshindji ohadhi kala aluhe dha zala nawa, nohadhi monika dha fa dhi na oshindji dhi vule yalwe.” Oohapu ndhika otadhi tsu kumwe naashoka Jesus u uvanekele mboka haya kongo tango Uukwaniilwa. (Mat. 6:28-30, 33) Tate yetu gwomegulu Jehova oku ku hole nokwa hala oku ku longela shoka she ku opalela pamwe naamwoye. “Ota tonatele uuyuni auhe, a nkondopaleke mboka ye na omitima dhe mu inekela.” (2 Ondjal. 16:9) Molwashoka okwe tu halela uuwanawa, okwe tu pa oompango dhi na ko nasha nonkalamwenyo yomegumbo nosho wo noompumbwe dhopalutu. Ngele otwa vulika kudho, nena otatu ku ulika kutya otu mu hole notwe mu inekela. Oshoka “ohole yokuhola Kalunga oyo okuvulika kiipango ye. Iipango ye kayi shi iidhigu kutse.” —  1 Joh. 5:3.

21, 22. Omolwashike wa tokola toko okukala wi inekela muJehova?

²¹ Eduardo ota ti: “Ondi shi shi kutya ethimbo alihe ndyoka kaatwa li pamwe nomukulukadhi gwandje naamwandje, itandi vulu we oku li monununa, ihe ihandi ipulile ko we kwaashoka. Oyendji mboka nda li handi longo nayo oya yambapala, ihe inaya nyanyukwa. Oye na omaupyakadhi ogendji momagumbo gawo. Ihe tse otwa nyanyukwa noonkondo! Ohashi nyanyudha ndje okumona ooitaali ooyakwetu moshilongo muka taya pititha iinima yopambepo komeho, nonando oya hepa. Otu wete nkene oohapu dhaJesus tadhi gwanithwa monkalamwenyo yetu.” —  Lesha Mateus 6:33.

²² Kala wu na omukumo! Kala wa tokola okuvulika nokukala wi inekela Jehova. Ohole yoye yokuhola Kalunga, kuume koye kopandjokana naamwoye nayi ku inyengithe wu gwanithe po oshinakugwanithwa shoye shokusila aanegumbo lyoye oshimpwiyu. Ngele owe shi ningi, oto ka mona kutya ‘Jehova oye omukwathi gwoye.’