1, 2. Ki reto hopi imigrante tin ku enfrentá ora nan bai bèk serka nan famia? (Wak e promé plachi.)

“TEMPU mi tabata traha afó, mi tabatin un puesto di responsabilidat i mi tabata gana un bon salario,” Eduardo * a konta. “Ma ora mi a kuminsá studia Beibel ku Testigunan di Yehova, mi a realisá ku mi tin un responsabilidat mas importante ainda, esta, di perkurá pa e nesesidatnan spiritual di mi famia i no solamente nan nesesidatnan material. P’esei mi a bai kas bèk serka mi famia.”—Efe. 6:4.

² Eduardo tabata sa ku e desishon ei a agradá Yehova. Pero, meskos ku Marilyn, menshoná den e artíkulo anterior, Eduardo tabatin ku kuminsá ku e kaminda largu di drecha su relashon ku su kasá i su yunan. Ademas, e tabatin e reto di perkurá pa su famia den un ekonomia muchu mas débil. Kon lo e por a sòru pa e pan di kada dia? E rumannan di su kongregashon lo por a yud’é ku algu?

3. Ki efekto e ousensia di un mayor por tin riba su yunan?

³ Eduardo a atmití: “Mi tabata konsiente ku mi a neglishá mi yunan, ora mas nan tabatin mester di mi guia i kariño. Mi no  tabat’ei pa lesa relato di Beibel ku nan, hasi orashon ku nan, brasa nan i hunga ku nan.” (Deu. 6:7) Su yu muhé mayó, Anna, ta kòrda: “E echo ku mi tata no tabata na kas a hasi mi emoshonalmente insigur. Dia el a bini kas bèk, nos tabata konos’é solamente pa kara i pa su stèm. I mi tabata sinti mi straño ora e tabata brasa mi.”

4. Dikon ta bira difísil pa un tata ku a pasa hopi tempu for di kas ser un bon kabes di famia?

⁴ Mas tantu tempu un tata pasa for di kas, mas difísil ta bira pa e kumpli ku su papel komo kabes di famia. Ruby, kasá di Eduardo, a bisa: “Mi tabatin ku hunga papel di mama i tata, i mi a kustumbrá di tuma mayoria di desishon den famia. Ora Eduardo a bini kas bèk, mi tabatin ku siña kiko ta nifiká sumishon kristian. Te ainda mi tin ku kòrda mi mes tin biaha ku mi esposo ta na kas bèk.” (Efe. 5:22, 23) Eduardo a agregá: “Mi yu muhénan tabatin e kustumber di bai serka nan mama pa pidi pèrmit pa hasi sierto kos. Komo mayor, nos a realisá ku nos mester a traha huntu pa kria nos yunan, i ami tabatin ku siña dirigí mi famia na un manera kristian.”

5. Kon Eduardo a kuminsá drecha e daño ku su ousensia a okashoná, i ku ki resultado?

⁵ Eduardo tabata determiná pa hasi tur loke tabata na su alkanse pa drecha su relashon ku su famia i pa fortalesé nan spiritualmente. El a bisa: “Mi meta tabata pa inkulká e bèrdat den mi yunan ku palabra i ku ehèmpel; pues, no djis bisa ku mi ta stima Yehova, sino demostrá esei tambe.” (1 Huan 3:18) Yehova a bendishoná Eduardo su esfuersonan? Anna a bisa di dje: “Ora bo mira tur e esfuersonan ku e ta hasi pa ta un bon tata i tambe pa drecha su relashon ku nos atrobe, e ta hasi un gran diferensia. I su esfuersonan pa progresá den kongregashon a hasi nos orguyoso di dje. Mundu a purba di alehá nos for di Yehova. Pero nos a mira kon nos mayornan a enfoká riba e bèrdat, i esei a motivá nos pa hasi meskos. Papi a primintí nos ku e no ta bai laga nos nunka mas, i el a kumpli ku su palabra. Si el a bai, awe kisas lo mi no tabata den e organisashon di Yehova.”

6. Kiko algun mayor a komprobá durante e guera den e region di Balkan?

⁶ Durante e guera den e region di Balkan, yunan di Testigunan di Yehova ku tabata biba den e área ei tabata felis apesar di e miseria ku nan a pasa aden. Dikon? Pasobra komo ku nan mayornan no por a bai traha, nan a keda kas i studia ku nan, hunga ku nan i papia ku nan. Kiko esei ta siña nos? Pa yunan bai bon, nan mester di nan mayornan huntu ku nan. Esei ta mas importante pa nan ku plaka òf regalo. Sí, manera e Palabra di Dios ta bisa, ora mayornan eduká nan yunan i duna nan e atenshon nesesario, lo bai bon ku nan.—Pro. 22:6.

7, 8. (a) Ki kibokashon algun mayor ku a bai kas bèk ta kometé? (b) Kon mayornan por yuda nan yunan vense sintimentunan negativo?

⁷ Lamentablemente, algun mayor ku a bini kas bèk a ripará ku nan yunan a trata nan na un manera indiferente òf asta rechasá nan. Anto e mayornan a kometé e kibokashon di bisa: “Kon boso por ta asina malagradesí pa tur e sakrifisio ku mi a hasi pa boso?” Nan no ta komprondé ku e yunan ta sinti nan di hùrt pasobra nan ku ta mayor a bai laga nan. Si esei ta e kaso ku bo, kiko bo por hasi pa kura e herida?

⁸ Pidi Yehova yuda bo mustra mas komprenshon pa bo kasá i bo yunan. Anto, ora bo ta papia ku nan, laga nan komprondé ku bo ta rekonosé i aseptá ku bo tambe tin parti di e kulpa. Kisas un despensa di kurason ta na su lugá. Ora bo kasá ku bo yunan mira ku bo ta hasi esfuerso konsistente pa drecha kosnan, nan lo sinti ku bo ta sinsero. Ku determinashon i pasenshi, pokopoko  pero sigur bo por rekuperá e amor i rèspèt di bo famia.

9. Pakiko kristiannan no tin nodi di bira riku pa nan por kumpli ku e mandato di ‘perkurá pa esnan ku ta pertenesé na nan’?

⁹ Apòstel Pablo a bisa ku ora kristiannan di mas edat no por sòru mas pa nan mes, ta nan yunan i nietunan mester “paga nan mayornan, wela- i tawelanan pa loke nan a hasi pa nan.” Pero tambe el a animá tur kristian pa keda kontentu ku nan nesesidatnan di tur dia, manera kuminda, paña i un dak riba nan kabes, en bes di hasi esfuerso konstante pa hiba un bida mas kómodo òf buska siguridat finansiero pa futuro. (Lesa 1 Timoteo 5:4, 8; 6:6-10.) Pa un kristian por “perkurá pa esnan ku ta pertenesé na dje,” e no tin nodi di buska rikesa material den e mundu akí, ku pronto lo pasa bai. (1 Huan 2:15-17) Nos no mester laga “e poder engañoso di rikesa” òf “inkietut di e era akí” stroba nos famia di haña un “gara firme riba loke realmente ta bida” den e mundu nobo di Dios!—Mar. 4:19; Luk. 21:34-36; 1 Tim. 6:19.

10. Pakiko ta sabí pa evitá di akumulá debe?

¹⁰ Yehova sa ku nos tin mester di poko plaka. Pero plaka no por yuda nos ni protehá nos manera e sabiduria di Dios sí por hasi. (Ekl. 7:12; Luk. 12:15) Hopi biaha hende no ta kalkulá bon e gastunan di bai traha na un otro pais; i no tin ningun garantia tampoko ku ayafó nan lo bai gana mas plaka. De echo, esei por asta trese peligernan serio kuné. Hopi a bini bèk ku debe mas grandi ainda. En bes di ta mas liber pa sirbi Dios, nan ta haña nan ta sirbi esnan ku nan debe. (Lesa Proverbionan 22:7.) E mihó kos ta pa no hasi debe mes.

11. Pakiko ta bon pa traha un presupuesto?

¹¹ Eduardo tabata sa ku pa e por a perkurá pa su famia, e mester a siña kontrolá su gastunan. E ku su kasá a determiná kiko realmente nan tabatin mester pa biba i a traha un presupuesto a base di esei. Klaru ku e presupuesto nobo no a duna su famia espasio pa gasta mes tantu ku loke nan a kustumbrá kuné. Pero nan tur a kooperá i no a gasta sèn na kosnan innesesario. * Eduardo a bisa: “Por ehèmpel, mi a kita mi yunan for di skolnan privá i a haña bon skol públiko pa nan.” E ku su famia a pidi Yehova yud’é haña un trabou ku lo no a interferí ku nan aktividatnan spiritual. Kon Yehova a kontestá nan orashonnan?

12, 13. Ki medida un tata a tuma pa perkurá pa su famia, i kon Yehova a bendishoná su determinashon pa hiba un bida simpel?

¹² “E promé dos añanan, nos tabatin ku hala faha mara,” Eduardo a konta. “E poko ku mi tabata gana no tabata yega semper pa kubri nos gastunan. Nos a haña nos ta usa nos sèn di spar i mi tabata hopi kansá. Tòg nos tabata asistí na tur reunion i sali huntu den sirbishi.” Eduardo a disidí pa no aseptá ningun trabou ku lo por a aleh’é for di su famia pa luna- òf añanan largu. El a bisa: “Mas bien, mi a siña hasi diferente trabou, di manera ku ora no tabatin trabou den un sierto ramo, mi por a hasi otro kos.”

¹³ Pa motibu ku Eduardo a tarda pa paga su debenan, e tabatin ku paga mas interes riba e plaka ku el a fia. Pero pa Eduardo esaki no tabata nada na komparashon ku e oportunidat di ta huntu ku su famia den tur aspekto di bida, manera Yehova ta ferwagt di mayornan. Eduardo a bisa: “Awor mi ta gana ménos ku 10% di loke mi tabata gana afó, pero nos no ta pasa hamber. ‘E man di Yehova no ta kòrtiku.’ De echo, nos a disidí di traha pionero. Remarkablemente, despues di esei, e ekonomia a mehorá un  poko i a bira mas fásil pa yega na loke nos mester pa biba.”—Isa. 59:1.

14, 15. Kon famianan por dil ku e preshon di pone kos material riba empeñonan spiritual, i ki bon resultado nan bon ehèmpel por duna?

¹⁴ Na hopi lugá hende ta sinti nan obligá pa duna nan famia- i amigunan plaka i regalo. Eduardo a bisa: “Esei ta parti di nos kultura i nos ta gusta kompartí.” Anto el a agregá: “Ma tin un límite. Mi a splika mi otro famianan bondadosamente ku lo mi duna nan tur loke mi por tanten ku mi kasá ku mi yunan tin loke nan mester sin pone e nesesidatnan i aktividatnan spiritual di famia na peliger.”

¹⁵ Kisas algun famia yegá ta keda desepshoná ku un famia di nan ta keda sin probechá di un oportunidat di bai traha na otro pais òf ku e famia akí ta bini bèk djafó, ya ku nan ta stèns riba e plaka ku e famianan akí lo manda. Asta nan por rabia ku nan i yama nan egoista. (Pro. 19:6, 7) Anna, yu di Eduardo, a bisa: “No opstante, ora nos nenga di sakrifiká kosnan spiritual pa komodidat material, ku tempu algun di nos famianan por bin realisá kon importante nos bida kristian realmente ta. Pero kon nan lo por bin komprondé esei si nos sede na nan eksigensianan?”—Kompará ku 1 Pedro 3:1, 2.

16. (a) Kon un persona por ‘gaña su mes ku rasonamentu falsu’? (Sant. 1:22) (b) Ki tipo di desishon Yehova ta bendishoná?

¹⁶ Ora un ruman muhé a yega den un pais mas riku, sin su kasá i su yunan, el a bisa e ansianonan: “Nos tabatin ku hasi hopi sakrifisio pa mi por bini akinan. Mi kasá tabatin ku asta stòp di sirbi komo ansiano. Pues, mi ta spera realmente ku Yehova lo bendishoná e desishon akí.” Semper Yehova ta bendishoná desishonnan ku ta basá riba fe den dje, pero kon e por bendishoná un desishon ku ta bai kontra di su boluntat, spesialmente ora esei ta enserá entregá un privilegio di sirbishi sin ta na nodi?—Lesa Hebreonan 11:6; 1 Huan 5:13-15.

17. Pakiko nos tin ku buska e guia di Yehova promé ku nos tuma desishon, i kon nos por hasi esei?

¹⁷ Buska e guia di Yehova promé ku bo  tuma un desishon i komprometé bo mes, no despues. Pidié pa su spiritu santu, p’e duna bo su sabiduria i su guia. (2 Tim. 1:7) Puntra bo mes: Te na ki grado mi ta dispuesto pa obedesé Yehova? Lo mi obedes’é asta ora mi ser persiguí?’ Si ta asina, bo ta dispuesto pa obedes’é ora esei lo nifiká hiba un bida mas simpel? (Luk. 14:33) Papia ku e ansianonan di bo kongregashon i sigui nan konseho basá riba Beibel. Asina bo ta demostrá bo fe i konfiansa den e promesa di Yehova pa yuda bo. E ansianonan no por tuma desishon pa bo, pero sí nan por yuda bo tuma desishon ku a lo largu lo hasi bo felis.—2 Kor. 1:24.

18. Ken tin e responsabilidat pa perkurá pa un famia, pero ki sirkunstansianan por duna nos un bon oportunidat pa yuda?

¹⁸ Yehova a enkargá e kabes di famia ku e “karga” di tur dia pa perkurá pa e famia. (Gal. 6:5) Nos ta felisitá esnan ku ta kumpli ku e responsabilidat ei sin bandoná nan kasá òf yunan, apesar di e preshon i tentashon pa hasi esei, i nos ta hasi orashon pa nan. Susesonan inesperá, manera un desaster òf un emergensia médiko, ta duna nos un bon oportunidat pa mustra amor kristian i sintimentu pa otro. (Gal. 6:2; 1 Ped. 3:8) Bo por yuda un ruman di bo ku ta den un situashon asina ku algu di plaka òf yud’é haña un trabou? Esei por baha e preshon ku e ruman ei ta sinti pa e bai laga su famia p’e buska trabou otro kaminda.—Pro. 3:27, 28; 1 Huan 3:17.

19, 20. Pakiko kristiannan por ta sigur ku Yehova lo yuda nan?

¹⁹ E Skritura ta spièrta nos: “Laga boso manera di biba ta liber di amor pa plaka, i keda kontentu ku loke boso tin. Pasobra Dios a bisa: ‘Hamas lo mi bandoná bo, i hamas lo mi laga bo desampará.’ P’esei nos por ta yen di ánimo i bisa: ‘Yehova ta mi ayudante; lo mi no tin miedu. Kiko hende por hasi mi?’” (Heb. 13:5, 6) Kon e palabranan akí ta kumpli?

²⁰ Un ansiano ku tin hopi eksperensia i ku ta biba den un pais pober a bisa: “Hopi biaha hende ta papia di kon felis Testigunan di Yehova ta. Nan ta ripará tambe ku asta e Testigunan pober semper ta nèchi bistí i ta parse di ta mihó pará ku otro hende.” Esaki ta kuadra ku loke Hesus a primintí hende ku ta pone e Reino na promé lugá. (Mat. 6:28-30, 33) Sí, nos Tata selestial, Yehova, ta stima bo i ke lo mihó pa abo i pa bo famia. “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.” (2 Kró. 16:9) El a duna nos su mandamentunan, inkluso esnan relashoná ku bida di famia i nesesidatnan material, pa nos benefisio. Ora nos sigui nan, nos ta mustra ku nos ta stim’é i ku nos ta konfi’é. “Amor pa Dios ta nifiká ku nos ta kumpli ku su mandamentunan; sinembargo, su mandamentunan no ta pisá.”—1 Huan 5:3.

21, 22. Pakiko bo ta determiná pa demostrá bo konfiansa den Yehova?

²¹ Eduardo a bisa: “Mi sa ku lo mi no por rekuperá mas e tempu ku mi tabata leu for di mi kasá ku mi yunan, pero mi no ta sinta lamentá esei henter dia. Hopi di mi koleganan ta riku pero infelis. Nan famianan tin problema serio. En kambio, nos ta un famia masha felis! I ora mi mira kon otro ruman den e pais akí, aunke nan ta pober, ta pone kosnan spiritual na promé lugá, mi ta keda masha impreshoná. Nos tur ta komprobá ku e promesa di Hesus ta bèrdat.”—Lesa Mateo 6:33.

²² Pues, no pèrdè ánimo! Obedesé Yehova i konfia den dje. Laga bo amor pa Dios, pa bo kasá i pa bo yunan motivá bo pa kumpli ku bo responsabilidat spiritual pa ku bo famia. Si bo hasi esei, lo bo komprobá pa bo mes ku ‘Yehova ta bo ayudante.’