1, 2. Ki reto hopi inmigrante tin cu enfrenta ora nan bay bek cerca nan famia? (Wak e prome plachi.)

“TEMPO mi tabata traha afo, mi tabatin un puesto di responsabilidad y mi tabata gana bon cen”, Eduardo * a conta. “Pero ora mi a cuminsa studia Bijbel cu testigonan di Jehova, mi a realisa cu mi tin un responsabilidad mas importante ainda, esta, di percura pa e necesidadnan spiritual di mi famia y no solamente pa nan necesidadnan material. Pesey mi a bay cas bek cerca mi famia.”—Efe. 6:4.

² Eduardo tabata sa cu e decision ey a agrada Jehova. Pero, mescos cu Marilyn, menciona den e articulo anterior, Eduardo tabatin cu cuminsa cu e caminda largo di drecha su relacion cu su casa y su yiunan. Ademas, e tabatin e reto di percura pa su famia den un economia mucho mas debil. Con e lo por percura pa nan pan di cada dia? E rumannan di su congregacion lo por a yud’e cu algo?

3. Ki efecto e ausencia di un mayor por tin riba su yiunan?

³ Eduardo a admiti: “Mi tabata consciente cu mi a neglisha mi yiunan, ora mas nan tabatin mester di mi guia y cariño. Mi no  tabat’ei pa lesa relato di Bijbel cu nan, haci oracion cu nan, brasa nan y hunga cu nan.” (Deu. 6:7) Su yiu muher mayo, Anna, ta corda: “E echo cu mi tata no tabata na cas a haci mi emocionalmente insigur. Dia el a bin cas bek, nos tabata conoc’e solamente pa cara y pa su stem. Y mi tabata sinti mi straño ora e tabata brasa mi.”

4. Dicon ta bira dificil pa un tata cu a pasa hopi tempo for di cas ser un bon cabes di famia?

⁴ Mas tanto tempo un tata pasa for di cas, mas dificil ta bira pa e cumpli cu su papel como cabes di famia. Ruby, casa di Eduardo, a bisa: “Mi tabatin cu hunga papel di mama y tata, y mi a custumbra di tuma mayoria di decision den famia. Ora Eduardo a bin cas bek, mi tabatin cu siña kico ta nifica sumision cristian. Te ainda mi tin cu corda mi mes tin biaha cu mi esposo ta na cas bek.” (Efe. 5:22, 23) Eduardo a agrega: “Mi yiu muhernan tabatin e custumber di bay cerca nan mama pa pidi permit pa haci cierto cos. Como mayor, nos a realisa cu nos mester a traha hunto pa cria nos yiunan, y ami tabatin cu siña dirigi mi famia na un manera cristian.”

5. Con Eduardo a cuminsa drecha e daño cu su ausencia a ocasiona, y cu ki resultado?

⁵ Eduardo tabata determina pa haci tur loke tabata na su alcance pa drecha su relacion cu su famia y pa fortalece nan spiritualmente. El a bisa: “Mi meta tabata pa inculca e berdad den mi yiunan cu palabra y cu ehempel; pues, no djis bisa cu mi ta stima Jehova, sino demostra esey tambe.” (1 Juan 3:18) Jehova a bendiciona Eduardo su esfuersonan? Anna a bisa: “Ora bo mira tur e esfuerso cu e ta haci pa ta un bon tata y tambe pa drecha su relacion cu nos atrobe, e ta haci un gran diferencia. Y su esfuerso pa progresa den congregacion a haci nos orguyoso di dje. Mundo a purba di aleha nos for di Jehova. Pero nos a mira con nos mayornan a enfoca riba e berdad, y esey a motiva nos pa haci mescos. Papi a priminti nos cu e no ta bay laga nos nunca mas, y el a cumpli cu su palabra. Si el a bay, awe kisas mi lo no tabata den e organisacion di Jehova.”

6. Kico algun mayor a comproba durante e guera den e region di Balkan?

⁶ Durante e guera den e region di Balkan, yiunan di testigonan di Jehova cu tabata biba den e area ey tabata feliz a pesar di e miseria cu nan a pasa aden. Dicon? Pasobra como cu nan mayornan no por a bay traha, nan a keda cas y studia cu nan, hunga cu nan y papia cu nan. Kico esey ta siña nos? Pa yiunan bay bon, nan mester di nan mayornan hunto cu nan. Esey ta mas importante pa nan cu placa of regalo. Si, manera e Palabra di Dios ta bisa, ora mayornan educa nan yiunan y duna nan e atencion necesario, lo bay bon cu nan.—Prov. 22:6.

7, 8. (a) Ki ekibocacion algun mayor cu a bay cas bek ta comete? (b) Con mayornan por yuda nan yiunan vence sintimentonan negativo?

⁷ Lamentablemente, algun mayor cu a bin cas bek a ripara cu nan yiunan a trata nan na un manera indiferente of hasta rechasa nan. Anto e mayornan a comete e ekibocacion di bisa: “Con boso por ta asina malagradecido pa tur e sacrificio cu mi a haci pa boso?” Mayornan asina no ta compronde cu e yiunan ta keda cu hopi dolor pasobra nan, cu ta nan mayornan, a bay laga nan. Si esey ta e caso cu bo, kico bo por haci pa cura e herida?

⁸ Pidi Jehova yuda bo mustra mas comprension pa bo casa y bo yiunan. Anto, ora bo ta papia cu nan, laga nan compronde cu bo ta reconoce y acepta cu bo tambe tin parti di e culpa. Kisas un despensa di curason ta na su luga. Ora bo casa cu bo yiunan mira cu bo ta haci esfuerso consistente pa drecha cosnan, nan lo sinti cu bo ta sincero.  Cu determinacion y pasenshi, pocopoco pero sigur bo por recupera e amor y respet di bo famia.

9. Pakico cristiannan no tin nodo di bira rico pa nan por cumpli cu e mandato di ‘percura pa esnan cu ta pertenece na nan’?

⁹ Apostel Pablo a bisa cu ora cristiannan di mas edad no por percura mas pa nan mes, ta nan yiunan y nietonan mester “paga nan mayornan, wela- y welonan pa loke nan a haci pa nan.” Pero tambe el a anima tur cristian pa keda contento cu nan necesidadnan di tur dia, manera cuminda, paña y un dak riba nan cabes, en bes di haci esfuerso constante pa hiba un bida mas comodo of busca siguridad financiero pa futuro. (Lesa 1 Timoteo 5:4, 8; 6:6-10.) Pa un cristian por “percura pa esnan cu ta pertenece na dje”, e no tin nodo di busca rikesa material den e mundo aki cu pronto lo pasa bay. (1 Juan 2:15-17) Nos no mester laga “e poder engañoso di rikesa” of “inkietud di e era aki” stroba nos famia di haya un “gara firme riba loke realmente ta bida” den e mundo nobo di Dios!—Mar. 4:19; Luc. 21:34-36; 1 Tim. 6:19.

10. Pakico ta sabi pa evita di acumula debe?

¹⁰ Jehova sa cu te na cierto grado nos tin mester di placa. Pero placa no por yuda nos ni proteha nos manera e sabiduria di Dios si por haci. (Ecl. 7:12; Luc. 12:15) Hopi biaha hende no ta calcula bon e gastonan di bay traha na un otro pais; y no tin ningun garantia tampoco cu ayafo nan lo bay gana mas placa. De echo, esey por hasta trece peligernan serio cu ne. Hopi a bin bek cu debe mas grandi ainda. En bes di ta mas liber pa sirbi Dios, nan ta haya nan ta sirbi esnan cu nan debe. (Lesa Proverbionan 22:7.) E mihor cos ta pa no haci debe mes.

11. Pakico ta bon pa traha un budget?

¹¹ Eduardo tabata sa cu pa e por a percura pa su famia, e mester a siña controla su gastonan. E cu su casa a determina kico realmente nan tabatin mester pa biba y a traha un budget a base di esey. Claro cu e budget nobo no a duna su famia espacio pa gasta mes hopi cu loke nan a custumbra cu ne. Pero nan tur a coopera y no a gasta cen na cosnan innecesario. * Eduardo a bisa: “Por ehempel, mi a kita mi yiunan for di scolnan priva y a haya bon scol publico pa nan.” E cu su famia a pidi Jehova yud’e haya un trabou cu lo no a interferi cu nan actividadnan spiritual. Con Jehova a contesta nan oracionnan?

12, 13. Ki medida un tata a tuma pa percura pa su famia, y con Jehova a bendiciona su determinacion pa hiba un bida simpel?

¹² “E prome dos añanan, nos tabatin cu hala faha mara”, Eduardo a conta. “E poco cu mi tabata gana no tabata yega semper pa cubri nos gastonan. Nos a haya nos ta uza e cen cu nos a spaar y mi tabata hopi cansa. Toch nos tabata asisti na tur reunion y sali hunto den sirbishi.” Eduardo a dicidi pa no acepta ningun trabou cu lo por aleh’e for di su famia pa luna- of añanan largo. El a bisa: “Mas bien, mi a siña haci diferente trabou, di manera cu ora no tabatin trabou den un cierto ramo, mi por a haci otro cos.”

¹³ Pa motibo cu Eduardo a tarda pa paga su debenan, e tabatin cu paga mas interes riba e placa cu el a fia. Pero pa Eduardo esaki no tabata nada na comparacion cu e oportunidad di ta hunto cu su famia den tur aspecto di bida, manera Jehova ta verwacht di mayornan. Eduardo a bisa: “Awor mi ta gana menos cu 10% di loke mi tabata gana afo, pero nos no ta pasa hamber. ‘E man di Jehova no ta cortico.’ De echo, nos a dicidi di traha pionero. Remarcablemente, despues di esey, e economia a  mehora un poco y a bira mas facil pa yega na loke nos mester pa biba.”—Isa. 59:1.

14, 15. Con famianan por deal cu e presion di pone cos material riba empeñonan spiritual, y ki bon resultado nan bon ehempel por duna?

¹⁴ Na hopi luga hende ta sinti nan obliga pa duna nan famia- y amigonan placa y regalo. Eduardo a bisa: “Esey ta parti di nos cultura y nos ta gusta comparti.” Anto el a agrega: “Pero tin un limite. Mi a splica mi otro famianan bondadosamente cu lo mi duna nan tur loke mi por, basta esaki no pone e necesidadnan y actividadnan spiritual di famia na peliger.”

¹⁵ Kisas algun miembro di famia ta keda decepciona cu un famia di nan ta keda sin probecha di un oportunidad di bay traha na otro pais of cu e famia aki ta bin bek di afo, ya cu nan ta steun riba e placa cu e famianan aki lo manda. Hasta nan por rabia cu nan y yama nan egoista. (Prov. 19:6, 7) Anna, yiu di Eduardo, a bisa: “No obstante, ora nos nenga di sacrifica cosnan spiritual pa comodidad material, cu tempo algun di nos famianan por bin realisa con importante nos bida cristian realmente ta. Pero con nan lo por bin compronde esey si nos sede na nan exigencianan?”—Compara cu 1 Pedro 3:1, 2.

16. (a) Con un persona por ‘gaña su mes cu rasonamento falso’? (Sant. 1:22) (b) Ki tipo di decision Jehova ta bendiciona?

¹⁶ Ora un ruman muher a yega den un pais mas rico, sin su casa y su yiunan, el a bisa e ancianonan: “Nos tabatin cu haci hopi sacrificio pa mi por bin akinan. Mi casa tabatin cu hasta stop di sirbi como anciano. Pues, mi ta spera realmente cu Jehova lo bendiciona e decision aki.” Semper Jehova ta bendiciona decisionnan cu ta basa riba fe den dje, pero con e por bendiciona un decision cu ta bay contra di su boluntad, specialmente ora esey ta encera entrega un privilegio di sirbishi gewoon asina?—Lesa Hebreonan 11:6; 1 Juan 5:13-15.

17. Pakico nos tin cu busca e guia di Jehova prome cu nos tuma decision, y con nos por haci esey?

¹⁷ Busca e guia di Jehova prome cu bo tuma un decision y compromete bo mes,  no despues. Pidie pa su spirito santo, p’e duna bo su sabiduria y su guia. (2 Tim. 1:7) Puntra bo mes: Te na ki grado mi ta dispuesto pa obedece Jehova? Lo mi obedec’e hasta ora mi ser persigui?’ Si ta asina, bo ta dispuesto pa obedec’e ora esey lo nifica hiba un bida mas simpel? (Luc. 14:33) Papia cu e ancianonan di bo congregacion y sigui nan conseho basa riba Bijbel. Asina bo ta demostra bo fe y confianza den e promesa di Jehova pa yuda bo. E ancianonan no por tuma decision pa bo, pero nan por yuda bo si pa bo tuma decision cu a lo largo lo haci bo feliz.—2 Cor. 1:24.

18. Ken tin e responsabilidad pa percura pa un famia, pero ki circunstancianan por duna nos un bon oportunidad pa yuda?

¹⁸ Jehova a encarga e cabes di famia cu e “carga” di tur dia pa percura pa e famia. (Gal. 6:5) Nos ta felicita esnan cu ta cumpli cu e responsabilidad ey sin bandona nan casa of yiunan, a pesar di e presion y tentacion pa haci esey, y nos ta haci oracion pa nan. Sucesonan inespera, manera un desaster of un emergencia medico, ta duna nos un bon oportunidad pa mustra amor cristian y sintimento pa otro. (Gal. 6:2; 1 Ped. 3:8) Bo por yuda un ruman di bo cu ta den un situacion asina cu algo di placa of yud’e haya un trabou? Esey por baha e presion cu e ruman ey ta sinti pa e bay laga su famia p’e busca trabou otro caminda.—Prov. 3:27, 28; 1 Juan 3:17.

19, 20. Pakico cristiannan por ta sigur cu Jehova lo yuda nan?

¹⁹ E Scritura ta spierta nos: “Laga boso manera di biba ta liber di amor pa placa, y keda contento cu loke boso tin. Pasobra Dios a bisa: ‘Hamas lo mi bandona bo, y hamas lo mi laga bo desampara.’ Pesey nos por ta yen di animo y bisa: ‘Jehova ta mi ayudante; lo mi no tin miedo. Kico hende por haci mi?’” (Heb. 13:5, 6) Con e palabranan aki ta cumpli?

²⁰ Un anciano cu tin hopi experencia y cu ta biba den un pais pober a bisa: “Hopi biaha hende ta papia di con feliz testigonan di Jehova ta. Nan ta ripara tambe cu hasta e testigonan pober semper ta nechi bisti y ta parce di ta mihor para cu otro hende.” Esaki ta cuadra cu loke Hesus a priminti hende cu ta pone e Reino na prome luga. (Mat. 6:28-30, 33) Si, nos Tata celestial, Jehova, ta stima bo y kier lo mihor pa abo y pa bo famia. “Wowo di SEÑOR ta move bay bin door di henter tera, pa e por sostene fuertemente esnan cu nan curason ta completamente di dje.” (2 Cro. 16:9) El a duna nos su mandamentonan, incluso esnan relaciona cu bida di famia y necesidadnan material, pa nos beneficio. Ora nos sigui nan, nos ta mustra cu nos ta stim’e y cu nos ta confi’e. “Amor pa Dios ta nifica cu nos ta cumpli cu su mandamentonan; sinembargo, su mandamentonan no ta pisa.”—1 Juan 5:3.

21, 22. Pakico bo ta determina pa demostra bo confianza den Jehova?

²¹ Eduardo a bisa: “Mi sa cu lo mi no por recupera mas e tempo cu mi tabata leu for di mi casa cu mi yiunan, pero mi no ta sinta lamenta esey henter dia. Hopi di mi coleganan ta rico pero infeliz. Nan famianan tin problema serio. En cambio, nos ta un famia masha feliz! Y ora mi mira con otro ruman den e pais aki, aunke nan ta pober, ta pone cosnan spiritual na prome luga, mi ta keda masha impresiona. Nos tur ta comproba cu e promesa di Hesus ta berdad.”—Lesa Mateo 6:33.

²² Pues, no perde animo! Obedece Jehova y confia den dje. Laga bo amor pa Dios, pa bo casa y pa bo yiunan motiva bo pa cumpli cu bo responsabilidad spiritual pa cu bo famia. Si bo haci esey, lo bo comproba pa bo mes cu ‘Jehova ta bo ayudante.’