1, 2. Ngera me ngsebechel el mo meringel er tirke el oureor er a ta er a beluu el lmuut el mo remei er a belurir? (Momes er a siasing er a uchelel a suobel.)

 A EDUARDO a mla er ngii a ungil el urerel e milsuk er a klou el udoud er sera loureor er a ta er a beluu. * Engdi sera bo lodengelii a klemerang, e ngmlo medengei el kmo a telungalek er ngii a ousbech a lmuut el bebil er a tekoi el diak el di el udoud. Ngmle kirel el kiei el obengterir e omekerreu er tir me ngliluut el mo remei.​—Efe. 6:4.

² A Eduardo a mle medengei el kmo a Jehovah a soal a lluut el mo obengkel a telungalek er ngii. Engdi tiang a dimlak lebeot el tekoi. Ngmle kirel el lmuut el meleketek er a deleuill er ngii me a bechil me a rengelekel, e dirrek el mle kirel el mengereker er a ungilbesul el ildisel a udoud me bo el sebechel el omekerreu er tir. Ngmekerang a bo loruul er tiang? A ongdibel ngmo olengeseu er tir?

3. Te mo ua ngerang a rengalek sel bo el cheroid er tir a redemerir me a rederrir?

³ A Eduardo a dmu el kmo: “Ak milengemikr er a rengelekek er sel taem el tir a uluusbech a ulekrael me a bltikerreng. Ngdimlak el sebechek el menguiu a cheldecheduch er a Biblia el mo er tir, e kululuuch el obengterir, e kumechull er tir, e kuilil el obengterir.” (Dut. 6:7) A kot el klou el ngelekel el redil el Anna a dmu el kmo: “Ak di mle blechoel el bekikl  sel ledibus a demak. Engdi sera lemei, e ngdi ua lengodech el chad er a uldesuam. Ngdirrek el dimlak el soak sel lomechull er ngak.”

4. Ngera uchul me ngmeringel er a chedam el mo ungil el bdelul a delengchokl a lsekum e ngcheroid er a telungalek er ngii?

⁴ A cherengel a taem el lecheroid er a telungalek er ngii a chedam, e ngmengal mo meringel er ngii el rullii a ngerechelel el bdelul a delengcheklel. A bechil a Eduardo el Ruby a mesaod el kmo: “Ngmle kirek el mo Chedam e Chedil er a chelsel a delengchokl, me ak mlo smau el di ngak el melilt a tekoi el kirel a telungalek er kemam. Me sera lluut el me remei a Eduardo, e ngmle kirek el mesuub er sel rolel a derreder el bla loterekeklii a Dios. Me ngme lmuut er chelechang e ngdirk kirek el melatk el kmo a bechik a ngar tiang.” (Efe. 5:22, 23) E a Eduardo a dmu el kmo: “A rengelekek a mlo smau el di mo olturk er a derrir sel lolatk el mo meruul a tekoi. Me ngmle kirek el mesuub el mo meduch el omekrael er a delengcheklek el ua Kristiano.” Me tir el terung a mlo melechesuar el kmo a rengelekir a kirir el omes er tir el dmak el melib a tekoi.

5. Ngmilekerang a Eduardo er a losmechokl er a deleuill er ngii me a telungalek er ngii er a lluut el me remei? E ngera mlo rsel?

⁵ A Eduardo a mlo er a tkurrebab el sebechel el mesmechokl er a deleuill er ngii me a telungalek er ngii e ngosuterir el smisichii a deleuill er tir me a Jehovah. Ngmle soal el osisecheklterir a rengelekel er a klemerang el okiu a tekingel me a kerebai er ngii, el belkul a kmo ngdimlak di lolekoi el kmo ngbetik a rengul er a Jehovah, e ngbai ulechotii er a omerellel. (1 Jn. 3:18) Me a Jehovah ngmilekerang er a lomekngeltengat er a Eduardo? A Anna a dilu el kmo: “Sera kisang a demak el blak a rengul el melasem el mo ungil el chedam e dirrek el melasem el olekeed er ngii er kemam, e ngkmal mlo ungil a renguk. Ngdirrek el kmal mlo dmeu a rengmam sel ki momes er ngii el melasem el meruul a ngerechelel er a chelsel a ongdibel. A beluulechad a millasem el mengesuseu er kemam el mo cheroid er a Jehovah, engdi aki ulemes er a rechad er a blimam el mle blak a rengrir er a klemerang me aki millasem el oukerebai er tir. A Papa er kemam a tilbir el diak el lluut el mo cheroid er kemam e ultutii a telbilel. Oleko ngdimlak, e chelecha el taem e nglocha diak ngar er a chelsel a cheldebechelel a Jehovah.”

6. Ngera te siluub a rebetok el oungalek er sel taem er a lengar er ngii a mekemad er aike el beluu er a Balkans?

⁶ A rengalek a sorir el blechoel el obengterir a redemerir me a rederrir. El ua tiang, sera lengar er ngii a mekemad er aike el beluu er a Balkans, e a rebetok el oungalek el tir a Sioning a mlo diak el sebechir el mo oureor. E tiang a mlo uchul a klou el temir el kiliei er a blai el obengterir a rengelekir. Te milsuub e mengedecheduch e milil el obengterir. Tirka el ngalek a kmal mle dmeu a rengrir, alta e ngkmal mle meringel a blekeradel er a taem er a mekemad. Me ngera kede suubii er tia el tekoi? A rengalek a lmuut el kmal dmeu a rengrir el teloi er a redemerir me a rederrir el kuk ngaruchei er a udoud me a lechub e ngklalo. Me ngdi ua lolekoi a Biblia, ngmo uchul a klungiolir a rengalek a lsekum a redemerir me a rederrir a blechoel el obengterir e olisechakl er tir.​—Osi. 22:6.

7, 8. (a) Ngera el tekoi a lekibetiekl er ngii a rebebil el oungalek? (b) Te mekerang a ruungalek a losmechokl a deleuill er tir me a rengelekir?

⁷ A rebebil el oungalek a kmal kibetiekl er a omerellir a rengelekir sel lluut el mo remei. Nglocha mo ngodech a omerellir a rengelekir el ochotii el kmo ngua lak lomekerreu me a lechub e ngdiak loumerang er tir. Me ngsebechir a ruungalek el mo dmu el kmo, “Ngera me ke uaisei, ngdiak modengei el kmo aike el kurruul a di mlo uchul a klungiolem?” Engdi a mera er ngii, a ngalek a mekngit a rengul e le demal me a lechub a delal a chilitii e merael. Me ngmekerang ngika el oungalek el chad a losmechokl er tia el mondai?

⁸ Molengit er a Jehovah me lengesukau el mo medengei a uldesuir a rengelekem e mochotii el kmo ke dirk omekerreu er tir. Me sel mongedecheduch er a telungalek er kau e mkengei el kmo ngdirrek el ngar er ngii a telemellem er tiang. Me ngungil a omolengit a klausubes. Me sel lomes er kau el blak a rengum el mesmechokl a tekoi e te mo medengei el kmo ke ouuchel er a rengum er a  omerellem el mlo cheroid er tir. Me a kllourreng me a ducherreng er kau a mo uchul e ngsebechir a rengelekem el lmuut el mo oubltikerreng e oba omengull el bedulkau.

9. Ngera uchul me ngkirel el ungilbesul er a rengud a rolel a klengar er kid er chelechang?

⁹ A apostol el Paulus a milluches el kmo sel taem el remechudelang el Kristiano a dikea el sebechir el di tir el omekerreu er tir, e a rengelekir me a rengelekir a rengelekir a kirir el ngosuterir. Ngdilu el kmo ngdi kall, me a bail, me a blai a dousbech el mo sebeched el melemolem el kiei. (Monguiu er a 1 Timothy 5:4, 8; 6:6-10.) Me a Kristiano el soal el osiik aike el lousbech a telungalek er ngii a diak el belkul a kmo ngkirel el mo merau er a chelsel tia el beluulechad el “di mei el remiid.” (1 Jn. 2:15-17) Me ngkmal diak el kired el mo omdasu el kmo a udoud a sumechokl a rokui el mondai er kid me a lechub e debechei a “chelsengul tial klengar” me bo luchul e doridii a “meral klengar” er a chelsel a beches el beluulechad er a Dios!​—Mk. 4:19; 1 Ti. 6:19; Lk. 21:34-36.

10. Ngera me nguchul a llomeserreng sel lak domals er kid?

¹⁰ A Jehovah a medengei el kmo kede ousbech a udoud. Engdi udoud a diak el sebechel el omekerreu e lolengeseu er kid el ua llomeserreng el mla er a Jehovah el mei. (Oli. 7:12; Lk. 12:15) Betok el taem e a rechad a diak lolechesuar a klungel a udoud el lechitii el mo melukl el mo er a ta er a beluu. Ngdirrek el diak lulterekokl el kmo te mereched el mo oureor sel lebong. Tia el omeruul a bai sebeched el melekoi el kmo ngkdekudel. A rebetok er tirke el mo cheroid er a telungalek er tir a me remei el chellungel er a klou el belsir. Me ngmo meringel er tir el mesiou er a Dios e le ngkirir el mesiou er tirke el chad el lebelsir. (Monguiu er a Osisechakl 22:7.) Me nguchul a llomeserreng a lsekum e ngdiak domals er kid.

11. Ngmekerang e sebechel a telungalek el kutmeklii a ileakl el rolel a omengitel a udoud el mo olengeseu er tir?

¹¹ A Eduardo er a uriul er a lluut el mo remei e ngmlo medengei el kmo a lsekum e ngsoal a bo lungil a delengcheklel e ngkirel el mo kerekikl er a rolel a omengitel a udoud. Ngii me a bechil a tilbir el kutmeklii a ileakl el rolel a omengitel a udoud el bo loltirakl er ngii. * Ngdi mo sebechir el otireklii tia el telbilir a lsekum te melasem el mo diak longoit a betok el udoud el ua sel taem er a dirk lengar er ngii a ududir. Me nguaisei, engdi tir me a rengelekir a dul mlo ta rengrir e meruul er tia el tekoi el mo diak di longoit a udoud er a diak a ultutelel el klalo. A Eduardo a dmu el kmo: “Ak ultebedeterir a rengelekek er a private school e osisebeterir er a ungil el public school.” E ngii me a telungalek er ngii a milluluuch me bo el sebechel el metik er a urerel el ngii a diak bo lolemall er a omesiungir. Me ngmilekerang a Jehovah er a longer a nglunguchir?

12, 13. Ngmilekerang a Eduardo er a losiou er a telungalek er ngii, e milekerang a Jehovah e omekngeltengat er ngii e le ngtilbir el mo omekbeot er a klengar er ngii?

¹² Me ngar er a chelsel aike el kot el eru el rak er a lluut el mo remei, e ngkmal di kesai el udoud a lulengereker a Eduardo. Me ngmle kirir el mo ousbech aike el udoud el bla leketmokl. Ngdirrek el kmal mle meringel el oureor me ngdi mesaul a bedengel engdi ngdilu el kmo: “Ngmle sebecham el mo er a rokui el miting e dmak el mo oldingel.” Ngdirrek el rirellii er a rengul el kmo ngdiak el lolatk el lmuut el mo cheroid er a telungalek er ngii el ureor a uchul. Ngbai dilu el kmo: “Ak milsuub el mo meduch el meruul a betok el bedengel a ureor me sel bo lak el sebechel a ta er ngii el meketmokl, e ak kuk mo meruul er a ta er a bedengel a ureor.”

¹³ Ngmle kemanget el taem el longkad a blsel a Eduardo e le ngmle kirel el mengkad er a klou el olengil aike el udoud el lulleng. Engdi ngkilengei el meruul er tiang me bo el sebechel ngii me a telungalek er ngii el dmak el mesiou er a Jehovah. Ngdilu el kmo: “Chelechang e a ududek a ngesonges er a 10 el basent er sel dimla ududek er ak ngar er a ta er a beluu, engdi ngkmal diak ki molsengerenger. Ngkmal diak el kedeb a chimal a Jehovah. Me a lmuut el tang aki tilbir el mo pioneer.” Ngdi mle telkib er a uriul e ngmlo ungil a keizai er  a beluu, me ngmlo beot er ngii el omekerreu er a telungalek er ngii.​—Isa. 59:1.

14, 15. Ngmo mekerang a telungalek a lsekum a rechederir a sorir a lenguu a udoud el mo er uchei er a omengull el mo er a Jehovah? E ngera sebechel el mo duubech a lsekum te ochotii a ungil el kerebai?

¹⁴ A rebebil a omdasu el kmo ngkirir el merous a udoud me a klalo el mo er a rechederir me a resechelirir. A Eduardo a kmo: “Tiang a tedebechel a siukang er kemam, e kmal dmeu a rengmam el meruul er ngii, engdi ngar er ngii a telkelel.” Ngmle ungil el smodii el mo er a rechedal el kmo ngkongei el olengeseu a lsekum e ngsebechel, engdi ngdiak lebechei aika el tekoi me lebo er uchei er aike el lousbech a telungalek er ngii me a lechub e ngomesiungir el mo er a Jehovah.

¹⁵ A rebebil el chedal a chad a locha mo chetirir a lsekum ngii el chad a tibir el di kiei el obengkel a telungalek er ngii me a lechub e ngchoitii a urerel er a cheroid el beluu el lmuut el me remei. Te locha mo omdasu el kmo ngdiak el betik a rengul e di melatk er a di ngii. E ngera uchul? E le rechedal a mengerechir er ngii el mo omesterir a udoud. (Osi. 19:6, 7) A Anna el ngelekel a Eduardo a kmo a lsekum tir el telungalek a tibir el nguu a Jehovah el mo er uchei er a udoud, e a rechederir a locha mo sebechir el mesang el kmo a Jehovah a klou a ultutelel er a klengar er tir. Engdi a lsekum e ngdiak, e ngdiak el sebechel tia el tekoi el mo bleketakl er a rengrir a rechederir.​—Momekesiu er a 1 Petrus 3:1, 2.

16. (a) Ngerang a cheleuid el uldasu el sebechel a chad el mo obang? (Jak. 1:22) (b) A Jehovah ngomekngeltengat a ngera el telbiil?

¹⁶ A ta el odos el chilitii a telungalek er ngii el mo oureor er a ta er a beluu a dilu er a remechuodel er a ongdibel el kmo: “Ngbetok a tekoi el mle kiram el remuul er a uchei er ak mei. A bechik a mlo diak losiou el ta er a remechuodel. Me ak kmal oureng el kmo a Jehovah bo lomekngeltengat er tia el omerollek el mei.” Me a lsekum ngmesisiich a klaumerang er kid e meruul a tekoi el oltirakl er a soal a Jehovah, e ngulterekokl a rengud el kmo ngmo omekngeltengat er kid. Engdi ngkmal diak lomekngeltengat a telbiil el doruul el ngii a omtok a llechul. E kmal diak el deu a rengul el kired a lsekum kede mengemikr er a techall er a omesiou el diak a ungil el uchul.​—Monguiu er a Hebru 11:6; 1 Johanes 5:13-15.

17. Ngera uchul me ngkired el osiik a ulekrael er a Jehovah er a uchei er a dolib a tekoi, e mekerang a doruul er tiang?

¹⁷ Mosiik a ulekrael er a Jehovah er a uchei er a  omolib a tekoi me lak bo mouuchel er a rengum er a uriul. Moluluuch el olengit er a chedaol klisiich, llomeserreng, me a ulekrael. (2 Ti. 1:7) Di lekau el oker el kmo: ‘Ak kltmokl el olengesenges er a Jehovah er a chelsel a meringel el blekeradel? Ak kongei a ulekrael er ngii me ak di kiei el obengkel a telungalek er ngak, alta ngmo meringel a klengar er kemam?’ (Lk. 14:33) Molengit a ngeso er a remechuodel e molengesenges a ulekrael er a Biblia el lomeskau. A otireklem er tia el tekoi a ochotii el kmo ke oumerang a telbilel a Jehovah el kmo ngmo ngosukau. A remechuodel a diak louchais a tekoi el kirem el meruul, te bai ngosukau el mo ungil el melilt a tekoi el mo uchul a deurreng er a klengar er kau.​—2 Ko. 1:24.

18. Ngtechang a ngerechelel el mo osiik aike el lousbech a telungalek? E kede mekerang e olengeseu?

¹⁸ A Jehovah a mengerechir er a bdelul a telungalek el mo osiik aike el lousbech a telungalek er ngii er a bek el taem. Me ngkired el meluluuch el kirir e dirrek el chemat er tir e le ngdiak longoit a telungalek er tir e bo loureor er a ta er a beluu alta ngkmal mo sorir me a lechub a rebebil a orrimel er tir el mong. Me nguldimukl er a nglunguched e ngdirrek el ngar er ngii a techelled el ochotii a bltikerreng er kid el mo er tirka el blak a rengrir el rudam er sel taem er a klou el chelebuul er a beluu me a lechub a bkaischemrungel el secher. (Gal. 6:2, 5; 1 Pe. 3:8) Me kau ngsebechem el ngosuir a ta er a Kristiano el okiu sel molengeseu el sikii a urerel el di kmeed me a lechub e ke msang aike el lousbech el ua udoud me a lechub e ngkall? A ungil el ulengesuim a sebechel el ngosuir me ngdiak longoit er a telungalek er ngii e bo loureor er a ta er a beluu.​—Osi. 3:27, 28; 1 Jn. 3:17.

19, 20. Ngera uchul me a Rekristiano a ulterekokl a rengrir el kmo a Jehovah a mo ngosuterir?

¹⁹ A Jehovah a kmo: “Mongeroid a klengar er kemiu er a ngibes er a udoud. Bo lungil a rengmiu er a ngar ngii er kemiu; ele Dios a dilu el kmo, ‘Ng kmal diak bo kchitau ma ka bo kubes er kau.’ Misei e ng sebeched el oumerang e melekoi el kmo, ‘A Rubak a olengeseu er ngak me ng diak bo kmedakt. Ng ngera sebechel a chad el rullii el mer ngak?’” (Heb. 13:5, 6) Me ke mekerang a omoruul er tiang?

²⁰ A ta er a remechuodel el ngar er a ta er a chebuul el beluu a melekoi el kmo a rechad a blechoel el chemat er a Resioning er a Jehovah el kmo te kmal dmeu a rengrir el chad. Ngdirrek el melekoi el kmo ngmo lmuut er a remechebuul el Sioning me te kmal ungil el oubail e ngar er ngii aike el lousbech er a klengar er tir. E tiang a tekoi el letilbir a Jesus el kmo ngmo uaisei. (Mt. 6:28-30, 33) A Jehovah a kmal betik a rengul er kid e di meruul a tekoi el mo uchul a klungioled. Ngkmal semeriar er a rokui el mesiungel e blechoel el kltmokl el mo “omesterir a klisichir” me lengesuterir. (2 Kr. 16:9) Seikid a uchul me ngmla meskid a llach el kirel a klengar er a telungalek me a rolel e ngmo sebeched el osiik aike el dousbech. Me sel dolengesenges aika el llechul e kede ochotii el kmo ngbetik a rengud er Ngii e oumerang er Ngii. “Ele bltikerreng er a Dios a belkul a kmo kede oltirakl a llechul. E a ikeikid el tekoi a diak lesal meringel er kid el meruul.”​—1 Jn. 5:3.

21, 22. Ngera uchul me ke mla tibir el mo oumerang er a Jehovah?

²¹ A Eduardo a dmu el kmo ngdiak el sebechel el lmuut el kmurs aike el taem el ble lecheroid er a telungalek er ngii. Engdi ngdiak louuchel er a rengul er a mla mo merek el tekoi. A rebetok er tirke el ledilak el oureor er a uchei a betok a ududir engdi ngdiak el deu a rengrir. Ngdi ngar er ngii a mondai er a telungalek er tir. Engdi ngii me a telungalek er ngii a kmal dmeu a rengrir! Me alta e te chebuul, engdi ngii me a telungalek er ngii me a lmuut el bebil er a telungalek el ngar er a belual a oumerang el kmo a Jehovah a olengeseu er tir. Me ngdmu el kmo: “Aki rokui el melechesuar a klemerang er a tekingel a Jesus.”​—Monguiu er a Mateus 6:33.

²² Misei e lak omedakt! Mngiltii el mo olengesenges er a Jehovah e moumerang er ngii. Ngsebechem el mo ungil el bdelul a telungalek a lsekum e ngbetik a rengum er a Jehovah, me a bechim, me a rengelekem. Ngmo sebechem el omes er a Jehovah el ua Ngelsuim.