1, 2. Shuj llactamanda huasiman tigrajpica ¿ima llaquicunata ricurin? (Callari dibujota ricupangui.)

EDUARDOCA * ninmi: “Shuj llactapi trabajajushpaca ali trabajota charishpami ali ganajurcani. Shinapash Bibliata yachajui callarishpaca familiaman Jehová Diosmanda yachachina ashtahuan importante cashcata intindishpami huasiman tigrarcani” nin (Efes. 6:⁠4, NM ).

² Eduardoca Jehová Diospa mandashcata ali intindishpami familiahuan igual causangapaj munarca. Shinapash imashinami chaishuj temapi yachajurcanchi, Liliana shuti panigupash cai temapi yachajugrinajunchi Eduardopash familiahuan cutin ali causanatami mascana carca. Eduardo paipa llactaman tigrashpaca ¿imashinashi paipa huarmita huahuacunataca mantinita ushanman carca? Congregacionbi huauquipanicunaca ¿imashinata ayudai ushan?

3. Taita o mama carupi cajpica ¿imashinata huahuacunaca sintirin?

³ Eduardoca ninmi: “Ñuca ushicuna ñucata minishtijuj horascunapica na chaipi carcanichu. Paicunaman Bibliapi historiacunata liita, paicunahuan Jehová Diosta mañaitaca na usharcanichu. Paicunataca marcaitallapash na marcarcanichu. Pugllaitallapash  na pugllanchu carcanchi” nishpa (Deut. 6:⁠7). Paipa primera ushi Anaca ninmi: “Ñuca taita na huasipi cajpimi llaquilla, jichushca sintirin carcani. Huasiman tigramujpica paipa ñavita rijsircanchimi. Shinapash quimirishpa ugllajpica ñuca taita cajtaca na sintinllu carcani” nin.

4. Huasiman taita tigrajpica ¿ima llaquicunata tian?

⁴ Ashtaca huatacuna jipa taita huasiman tigrajpica ¿ima llaquicunata tian? Eduardopa huarmi Rubica ninmi: “Ñuca cusa na huasipi cajpica ñucami huahuacunapa taita, mama carcani. Huasipi imata ruranacunatapash ñucami ricun carcani. Chaimandami Eduardo huasiman tigramujpica Bibliapi mandashcashna cusata respetanataca cutin yachajuna carcani. Huaquinbica pai huasipi cashcataca na yarinichu” nishpa (Efes. 5:​22, 23). Eduardoca ninmi: “Huahuacunaca mamatallami permisota mañan carca. [...] Chaimandami ñuca familiata aliguta ñaupaman pushana carcani” nishpa. Chaicunata ricushpami, Eduardopash Rubipash “imata rurana cashpapash igual parlarishpami huahuacunataca viñachina cashcanchi” nirca.

5. a) Huasiman tigrashpaca ¿imatata taitaca rurai callarirca? b) ¿Imashinata Jehová Diosca bendiciarca?

⁵ Eduardoca paipa familiaman Taita Diosmanda yachachishpa, familiahuan aliguta causangapami munarca. Chaimandami Eduardoca nin: “Ñucaca ñuca parlocunahuan, ruraicunahuanmi Jehová Diosmanda yachachingapaj munarcani. Jehová Diosta juyanimi nishpapash ruraicunahuanmi Jehová Diosta juyashcata ricuchingapaj munarcani” nin (1 Juan 3:18). ¿Imashinata Jehová Diosca bendiciarca? Eduardopa ushi Anaca ninmi: “Ñuca taita ñucanchita ali cuidangapaj esforzarijujta ricushpaca alimi sintirircanchi. Congregacionbipash ali ayudajujta ricushpami ninanda cushijurcanchi. Cai mundoca Jehová Diosmanda caruyachingapami munajurca. Shinapash, ñuca taitamamacunaca Jehová Diosmanda aliguta yachachingapami esforzarinajurca. Paicunapa ali ejemplota ricushpami ñucanchipash Jehová Diosta sirvircanchi. Ñuca taita cutin saquishpa rijpica, tal vez na Jehovapa organizacionbi caimanllu carcani” nin.

6. Balcanes nishca guerra tiajpica ¿imatata taitamamacunaca cuenta japirca?

⁶ Balcanes nishca guerra tiajpica, Testigo taitamamacunaca huasipi quedashpami huahuacunaman yachachirca, paicunahuan pugllarca, parlarca. Guerra tiajpipash, taitamamacuna chaipi cajpimi huahuacunaca ninanda cushijurca. Imashinami ricupanchi, huahuacunaca culquita, regalocunata yalica taitamamacuna paicunahuan cachunmi munan. Bibliapica ninmi, taitamamacuna huahuacunaman yachachijpi, paicunahuan cajpica tucuicunallatami cushijun nishpa (Prov. 22:⁠6).

7, 8. a) Huaquin taitacunaca ¿imatata na cuenta japin? b) Taitacunaca ¿imashinata huahuacunataca ayudaita ushan?

⁷ Taitacuna huasiman tigrajpica huaquin huahuacunaca risintirishcami can, chaipi cajtapash na cuentanllu. Chaimandami taitacunaca nin: “Canmanda trabajagrishca jahuachu shina ricuhuangui” nishpa. Chai taitacunaca paicunata saquishpa rishcamanda nali sintirijujtaca na cuenta japinllu. Quiquingunapash shina causanajushpaca ¿imatata rurai ushapanguichi?

⁸ Pundapica Jehová Diosta mañashpami, huahuacunahuanga pandarishcanimi, disculpahuanguichi nishpa parlana capanguichi. Cada punlla esforzarijujta ricushpaca quiquinba huarmipash, huahuacunapash ciertopacha cambiangapaj munajujta cringami. Tiempohuan, shinallata na shaijushpa paicunahuan ali causangapaj esforzarijpica, tal vez quiquinba familiaca cutin respetashpa juyangami.

9. Jehová Diospa mandashcata pactachingapaca ¿charij cana minishtirinllu?

⁹ Apóstol Pabloca nircami, taitamamacuna o abuelocuna ñana ushanajujpica churicuna, nietocunami paicunamanga ‘pagui nishpa carana’ can nishpa. Ashtahuangarin nircami, ashtaca cosascunata charinapa randica micunaguta, imata churajunaguta o maipi causanaguta charishpallatami cushilla causana canguichi nishpa (1 Timoteo 5:​4, 8; 6:​6-10, liingui). Jehová Diospa mandashcata pactachingapaca charij canaca na minishtirinllu. Cai nali mundoca ñallami tucuringa (1 Juan 2:​15-17). Shinaca ‘ashtahuan charijyana munaita’ o ‘cai causaipilla charijyana’ munaita huashaman saquishpa, ñucanchi familiata Paraíso Alpagupi causachun ayudashunchi (Mar. 4:19; Luc. 21:​34-36; 1 Tim. 6:19).

10. Dibi tucunamandaca ¿imatata Taita Diosca yachachin?

¹⁰ Causangapaj culquita minishtijujtaca Jehová Diosca ricujunmi. Shinapash culquihuan ricujpica Taita Diospa ali yachaimi ñucanchimanga causaita cunga (Ecl. 7:12; Luc. 12:15). Ashtacacunaca caru llactacunapi ima llaquicuna tianataca naliguta pensarishpami rishca. Chaiman chayashpaca na ashtaca culquita ganai ushashcachu. Huaquingunacarin ashtahuan dibi tucushpami tigramushca. Jehová Diosta ashtahuan sirvinapa randica dibita pagana llaquihuanmi causan (Proverbios 22:⁠7, liingui). Shinaca ¿imatata Taita Diosca yachachin? Taita Diosca na dibi tucunachu canguichi nishpami yachachin.

11. ¿Imamandata na yapa culquita gashtanachu canchi nishpa parlarinaca ali can?

¹¹ Eduardoca na yapa culquita gashtana cashcatami cuenta japirca. Chaimandami paipa huarmihuan parlarirca imapilla na yapa culquita gashtanata. Shinami tucuillacuna ayudarishpa na yapa culquita gashtarca. Eduardoca ninmi: “Gobiernopa escuelacunapash ali cajpimi ushicunataca pagashca escuelamanda llujchishpa gobierno escuelaman cacharcanchi.”  * Eduardopash paipa familiapash Jehovataca mañarcami, tandanajuicunata, villachinata ama saquishpa shuj ali trabajota charichun ayudahuai nishpa. Shina nishpa mañajpica ¿ Jehová Diosca uyarcachu?

12, 13. a) Familiata aliguta mantiningapaca ¿imatata Eduardoca rurarca? b) Minishtirishca cosascunahuanlla causangapaj esforzarijpica ¿imashinata Jehová Diosca bendiciarca?

¹² Eduardoca ninmi: “Huasiman tigrashpaca callari ishcai huatacunataca na ashtaca culquita ganajurcanichu. Ahorrashca culquipash tucurijurcami, shaijushcami carcani. Shinapash ñuca huarmindi huahuacunandimi tandanajuicunaman, villachingapapash llujshinajurcanchi” nishpa. Eduardoca trabajomanda paipa familiata huaquin quillacunata o huaquin huatacunata saquingapaca na munarcachu. Paica ninbashmi: “Trabajo ama faltachunga shuj shuj cosascunapi trabajanatami yachajurcani” nishpa.

¹³ Eduardoca dibicunata na uchalla pagai tucushpa, interestalla ushashcata pagajushpapash Jehová Dios mandashcashna familiata cuidashpami ninanda cushijurca. Paica ninmi: “Caru llactapi ganashca culquihuan ricujpica ashalagutallami ganajurcani. Shinapash Jehová Diosca siempremi ayudahuarca. Ñucanchicunaca na yarjaimanda huañurcanchichu. Ashtahuangarin tucuillami precursorcuna tucurcanchi. Jipamangarin culquigupash mirajpimi familiata ashtahuan ali mantini usharcani” nishpa (Is. 59:⁠1).

14, 15. a) Familiacuna Jehová Diosta huashaman saquichun munajpica ¿imatata Testigocunaca ruraita ushapanchi? b) Ñucanchi ali ejemplota ricushpaca ¿imatata ñucanchi familiacunaca cuenta japinga?

¹⁴ Tauca llactacunapica familiacunaman, rijsicunaman  culquita o imacunatapash carana costumbretami charin. Eduardoca ninmi: “Ñucanchi llactapi shina costumbreta charishcamandaca chushijunimi. Shinapash na siempre caraita usharinllu. Chaimandami ñuca familiacunataca aliguman nini: ‘Taita Diosta sirvichunmi ñuca huarmiman, huahuacunaman ima minishtirishcaguta cuni. Yapallagu charishpaca usharishcaguhuan cangunata ayudashami” nishpa.

¹⁵ Huaquin familiacunaca caru llactamanda tigramushpa ñana cutin viaje rinata yachashpa, o ali trabajota saquishcata ricushpaca risintirinlla, culiranllami. Huaquin familiacunacarin, paicunaman na imatagutapash carajpimi, cangunaca mitsami cashcanguichi nishpa riman (Prov. 19:​6, 7). Eduardopa ushi Anaca ninmi: “Jehová Diosta sirvinata pundapi churajpimi ñucanchi familiacunaca Jehová Dios ashtahuan importante cashcata cuenta japinga. Jehovata na pundapi churajpica ¿imashinata Jehová Diosta sirvina ashtahuan importante cashcataca ricunga?” nishpa (1 Pedro 3:​1, 2​huan chimbapurapangui).

16. a) Huaquingunaca ¿ima panda yuyaicunatata charin? (Sant. 1:22.) b) Jehová Diosca ¿imata rurajpita bendician?

¹⁶ Shuj paniguca paipa cusata saquishpami shuj llactapi trabajangapaj rirca. Chai panigu chayashpaca ancianocunataca nircami: “Ashtacata sufrishpami caiman shamushcani. Ñuca cusacarin ñucata caiman cachamungapami anciano canatapash saquirca. Cai tucuita sufrishpa shamushcamandaca Jehová Dios bendiciashpami ali cahuanman” nishpa. Jehová Diosca paipi confiajpimi bendician. Paipa munaita huashaman saquishpa, congregacionbi ayudanatapash saquijpica ¿ Jehová Diosca bendiciangachu? (Hebreos 11:6; 1 Juan 5:​13-15 liingui.)

17. a) ¿Imamandata nara decidishpallata Jehovapa ayudata mascana capanchi? b) Jehovapa ayudata mascashpaca ¿imatata rurana capanchi?

¹⁷ Jipacunaman ama llaquirijungapaca nara decidishpallatami Jehovapa ayudata mascana canchi. Shinaca Jehovata mañashpaca espíritu santota cuhuai, ayudahuai, ali ñanda ricuchihuai nishpami mañana canchi (2 Tim. 1:⁠7 ). Tapuripashunchi: “¿ Jehová Diostaca tucuipichu  cazungapaj munajuni? ¿Llaquicuna tiajpica Jehová Diosta sirvishpa catishachu?” nishpa. Sirvishami yajushpaca ¿nachu minishtirishcalla cosascunahuanmi causana canchi nishpa consejajpica cazuna canchi? (Luc. 14:33.) Ancianocunahuan parlapai. Bibliapi ricuchishpa consejajpica cazunami canchi. Shinami Jehovapi confiashcata ricuchinchi. Paipi confiajpica Jehová Diospash paipa nishcata pactachishpa ayudangami. Ancianocunaca caita rurai nishpaca na mandangachu. Paicunaca quiquinguna ali decisionda agllashpa cushilla causachunmi ali consejocunata cunga (2 Cor. 1:24).

18. a) Jehová mandashca shinaca ¿picunata familiataca mantinina can? b) Taitacunataca ¿imashinata ayudana capanchi?

¹⁸ Jehová Dios mandashcashnaca taitacunami familiataca mantinina can (Gál. 6:⁠5). Ashtaca taitacunaca shuj llactapi trabajangapaj rinayachishpapash o familiacuna rimanajujpipash huarmita, huahuacunataca na saquishpa rishcachu. Paicunapa ali ejemplota ricushpaca ¿agradicinchichu? ¿Paicunamanda mañanajupanchichu? Imapash llaquicuna tiajpica paicunata juyashpa llaquimandaca ayudanami canchi (Gál. 6:2; 1 Ped. 3:⁠8). Ushashpaca trabajota tarichunbash ayudanami canchi. Ciertopacha minishtijujpica micunaguhuan o ashala culquiguhuan ayudanapash alimi can. Chaimi paicunapash na ashtacata pinarishpa shuj ladocunaman rishpa trabajanataca na yanga (Prov. 3:​27, 28; 1 Juan 3:17).

19, 20. ¿Imamandata Jehová Dios ayudanataca na cungana capanchi?

¹⁹ Bibliaca ninmi: ‘Imata cashpapash na charijyanata munashcamandallachu rurana canguichi. Cunan imaguta charishpapash, chaihuanlla cushijushpa causanguichi. Diosca cashnami nirca: “Candaca na jichushachu, na saquishachu” nishpa. Shinamandami cushijushpa cashna ni ushanchi: “Ñucata ayudajca, Jatun Diosmi. Shinamandami gentecuna imata ruranatapash na manllasha” ’ nishpa (Heb. 13:​5, 6). Jehová Diosca ¿imashinata cai shimicunata pactachishca?

²⁰ Pobrella llactapi causajuj shuj anciano huauquica ninmi: “Caipi gentecunaca ninmi, Testigocunaca cushilla, alimi causan. Pobre cashpapash ali cambiarishcami can, tucui minishtirishcatami charin” nishpa. Jesús nishca shinaca Taita Diospa Reinota pundapi churajpica na imapash faltanllu (Mat. 6:​28-30, 33). Jahua pachapi Taita Jehová Diosca quiquindapash juyanmi. Quiquinba familiapash ali causachunmi munan. Bibliaca ninmi: ‘Mandaj Diosca paita cazujcunaman alita rurashpa, paipa tucui ushaita ricuchingapami tucuita ricuriajun’ nishpa (2 Crón. 16:⁠9). Ñucanchi ali causachun munashpami Jehová Diosca familiata imashina mantininata nin. Jehovata cazushpami Jehovata juyashcata, paipi confiashcata ricuchinchi. ‘Taita Dios mandashca shimicunata pactachishpa causashpallami, paita juyashcata yachanchi. Pai mandashca shimicunaca pactachi ushanallami’ can (1 Juan 5:⁠3).

21, 22. ¿Imamandata Jehovapi confiana capanchi?

²¹ Eduardoca ninmi: “Ñuca huarmimanda, huahuacunamanda separarishca tiempotaca ñana tigrachita ushanichu. Chaimandami chaicunapica ñana pensarini. Punda trabajo cumbacunaca charij cashpapash ashtaca problemacunahuanmi causan. Cutin ñucanchicunaca tucuilla familiami igual, cushilla causanchi. Shuj huauquicuna pobre cashpapash Taita Diospa munaita pundapi churajta ricushpaca ninandami cushijuni. Tucuicunami Jesuspa shimicuna cierto cashcata ricunajunchi” nin (Mateo 6:​33, liingui).

²² Shinaca Jehová Diosta cazushpa paipi confiashunchi. Jehovata juyaimanda, quiquinba huarmitapash huahuacunatapash juyaimanda Jehová Diospa mandashcata pactachipashunchi. Shina rurashpami quiquinba ñavihuanbacha Jehová Dios ayudajta ricupangui.