1, 2. Fu san ede a muilek gi sma di e wroko na wan fara presi, fu drai go baka na oso? (Luku a prenki na a bigin fu na artikel.)

„DI MI ben e wroko na ini wan tra kondre, mi ben abi wan bun wroko èn mi ben meki furu moni”, na so Eduardo e fruteri. * „Ma di mi bigin studeri Bijbel nanga Yehovah Kotoigi, mi kon si taki mi ben abi wan moro bigi frantwortu. Boiti taki mi ben musu sorgu gi mi osofamiri, mi ben musu yepi den tu fu abi wan bun matifasi nanga Gado. Dati meki mi drai go baka na oso.”—Ef. 6:4.

² Eduardo ben sabi taki efu a ben o drai go baka na en osofamiri, dan Yehovah ben o breiti. Ma neleki fa a ben de nanga Marilyn di wi kari na ini na artikel na fesi, na so Eduardo ben musu du muiti fu meki sani kon bun baka nanga en osofamiri. Te a ben o de baka na ini wan pôti kondre, a ben o abi fu wroko nofo moni tu fu sorgu en wefi nanga den pikin. Sortu wroko a ben o du? Fa trawan na ini a gemeente ben o yepi en?

3. Te wan papa noso mama no de nanga na osofamiri, dan fa dati kan abi krakti na tapu den pikin?

³ Eduardo e taki: „Mi libi mi pikin na baka na wan ten di den ben abi a lobi nanga a yepi fu mi tranga fanowdu. Mi no ben de  drape fu leisi Bijbel tori nanga den, fu begi nanga den, fu brasa den èn fu prei nanga den” (Deut. 6:7). A bigi meisje fu en di nen Anna, e taki: „Fu di mi papa no ben de nanga wi, meki mi ben abi a firi taki a no lobi mi èn taki mi no ben bun nofo gi en. Di a drai kon baka na oso, wi no ben gwenti en. Na soso en fesi nanga en sten wi ben sabi. Mi no ben gwenti en te a ben e brasa mi.”

4. Fu san ede a muilek gi wan papa fu de wan bun edeman te a e libi fara fu en osofamiri?

⁴ O moro langa wan papa gowe libi en osofamiri, o moro a muilek gi en fu teki en frantwortu leki osofamiri-edeman. Ruby, a wefi fu Eduardo, e taki: „Mi ben musu de papa nanga mama gi den pikin. Na mi ben gwenti teki moro furu fu den bosroiti. Di Eduardo kon baka na oso, mi ben musu leri san a wani taki gi wan Kresten uma fu saka ensrefi na en masra ondro. Te now ete mi musu memre misrefi taki mi masra de dya” (Ef. 5:22, 23). Eduardo e taki: „Den meisje fu mi ben gwenti go na den mama fu aksi en primisi fu du wan sani. Wi ben kon si taki wi musu sori den pikin taki wi leki papa nanga mama musu teki bosroiti makandra èn mi ben abi fu leri fu teki fesi leki osofamiri-edeman.”

5. Fa Eduardo du muiti fu meki sani kon bun baka nanga en osofamiri èn san ben de a bakapisi?

⁵ Eduardo ben wani du ala san a man fu meki sani kon bun baka nanga en osofamiri èn fu meki den kisi wan bun matifasi nanga Yehovah. „Mi no ben wani leri mi pikin den tru tori fu Bijbel nomo, ma mi ben wani de wan eksempre gi den tu. Mi no ben wani taigi den nomo taki mi lobi Yehovah, ma mi ben wani sori den tu taki mi lobi en” (1 Yoh. 3:18). Yehovah blesi a muiti di Eduardo du fu sori bribi? Anna e taki: „A moi fu si fa a meki muiti fu de wan bun papa èn fu meki wi kon krosibei fu makandra baka. Di wi si taki a ben wani du moro na ini a gemeente, wi ben breiti trutru. Grontapu ben wani hari wi komoto na Yehovah. Ma fu di wi si taki wi papa nanga mama poti prakseri na a tru anbegi, meki wi pruberi fu du a srefi tu. Mi papa pramisi wi taki noiti moro a o gowe libi wi èn a no du dati noiti moro tu. Ma efu a ben gowe libi wi, dan mi no denki taki mi ben o de wan Kotoigi now.”

6. San son papa nanga mama leri na ini a ten di feti ben de na ini den Balkan Staten?

⁶ Pikin wani taki den papa nanga mama de nanga den. Son ondrofenitori e sori taki na a ten di wan feti ben de na ini den Balkan Staten, den pikin fu Yehovah Kotoigi drape ben de koloku aladi a libi no ben makriki kwetikweti. Fu san ede? Papa nanga mama di no ben man go na wroko, ben tan na oso nanga den pikin fu den. Den ben e prei nanga den pikin, den ben e taki nanga den èn den ben e studeri nanga den. San wi e leri fu a sani disi? A moro prenspari gi wan pikin te en papa nanga mama de nanga en, leki te a e kisi moni, kado noso srefi te a e libi na ini wan birti pe furu ogri no e pasa. Dati meki Gado Wortu e taki dati pikin o kisi wini te papa nanga mama e poti prakseri na den èn te den e gi den leri.—Odo 22:6.

7, 8. (a) Sortu fowtu son papa noso mama e meki te den e drai kon baka na oso? (b) San papa nanga mama kan du fu meki sani kon bun baka nanga den pikin fu den?

⁷ A de wan sari sani taki te son papa noso mama e drai go baka na oso, den e si taki den pikin no breiti noso taki den no e frutrow den moro. Fu di den e skreki, meki den e taigi den pikin: „Luku omeni sani mi du gi yu, dan yu no breiti?” Ma hori na prakseri taki a e hati a pikin taki yu leki papa noso mama ben gowe libi en, èn dati meki a e du so. San wan papa noso mama kan du fu lusu a problema disi?

⁸ Aksi Yehovah fu yepi yu, so taki yu kan sori yu osofamiri taki yu e frustan fa den e firi. Te yu e taki nanga yu osofamiri baka dati, dan taigi den taki yu srefi abi fowtu tu na ini a tori. Sori den nanga wan krin ati fa a e hati yu taki yu gowe libi den. Te yu  trowpatna nanga den pikin fu yu e si taki yu e tan pruberi fu meki sani kon moro bun, dan den o frustan taki yu wani du san reti. Efu yu abi pasensi èn yu no e lasi-ati, dan safrisafri yu famiri o lobi yu baka èn den o lespeki yu.

9. Fu san ede wi no musu feti na baka gudu?

⁹ Na apostel Paulus ben taki dati te owru Kresten brada noso sisa no man sorgu gi densrefi, dan den pikin nanga granpikin fu den musu „gi den papa nanga mama èn den granpapa nanga granmama san den abi reti na tapu”. Ma Paulus gi ala Kresten deki-ati taki den musu breiti efu den abi nyanyan, krosi nanga wan presi fu tan fu di te yu luku en bun, dan na dati wi abi fanowdu. Wi no musu feti na baka gudu. (Leisi 1 Timoteyus 5:4, 8; 6:6-10.) Fu ’sorgu gi den sma fu yu’, no wani taki dati yu musu suku den gudu fu a grontapu disi di o pasa gowe (1 Yoh. 2:15-17). Wi no musu ’broko wi ede nanga na aladei libi’ èn wi no musu meki „a bedrigifasi fu gudu” tapu wi osofamiri fu „grabu a trutru libi hori bun steifi”. Noso den no o kisi na okasi fu libi na ini a nyun grontapu fu Gado pe retidu o de.—Mark. 4:19; Luk. 21:34-36; 1 Tim. 6:19.

10. Fu san ede a de wan koni sani fu no kon na ini paiman?

¹⁰ Yehovah sabi taki wi abi moni fanowdu. Ma moni no man kibri wi èn a no man hori wi na libi leki fa a koni fu Gado e du dati (Preik. 7:12; Luk. 12:15). Nofo tron te wan sma e froisi go na wan fara presi fu wroko, a no e prakseri den kostu èn a no sabi efu a o meki furu moni te a de drape. Fu taki en leti, seryusu problema kan miti en srefi. Furu sma e drai go baka na oso nanga moro bigi paiman leki san den ben abi fosi. Na presi taki den abi moro ten fu dini Gado, den musu wroko tranga gi a sma di leni den a moni. (Leisi Odo 22:7.) A moro koni sani fu du, na fu no kon na ini paiman.

11. Fa a kan yepi osofamiri te den e meki mofo nanga makandra omeni moni den o gebroiki?

¹¹ Eduardo ben sabi taki efu a ben wani sorgu bun gi en osofamiri te a ben o drai kon baka na oso, a ben abi fu luku bun fa den ben o gebroiki den moni. En nanga en wefi meki mofo nanga makandra omeni moni den ben o gebroiki gi den sani di den abi fanowdu trutru. A no de fu taki dati den no ben o man bai ala sani di den ben wani, soleki fa den ben gwenti du fosi. Ma den alamala ben e horibaka gi a nyun seti disi èn den no bai sani di den no ben abi fanowdu. * Eduardo e taki: „Fu eksempre, mi no ben seni mi pikin go na wan skoro moro pe yu abi fu pai. Na presi fu dati, mi poti den na wan bun lantiskoro.” En nanga en osofamiri begi Yehovah fu feni wan wroko di no ben o tapu den fu du a diniwroko fu Gado. Fa Yehovah piki den begi fu den?

12, 13. San Eduardo du fu sorgu gi en osofamiri èn fa Yehovah blesi a bosroiti di a teki fu libi soso nanga den sani di de fanowdu?

¹² Eduardo e taki: „Den fosi tu yari ben muilek gi wi. A moni di wi ben kibri ben kon kaba èn a moni di mi ben e wroko no ben sari fu pai gi den kostu fu wi. Ala ten mi ben weri. Ma wi ben man go na ala den konmakandra èn na ini a preikiwroko tu.” Eduardo bosroiti taki a no ben o denki srefi fu teki wan wroko di ben o tapu en fu de nanga en osofamiri omeni mun noso yari langa. A e taki: „Mi leri fu du difrenti sortu wroko so taki te mi no man feni a wan wroko, dan mi kan du a tra wroko.”

¹³ Fu di Eduardo ben pai den paiman fu en safrisafri, meki a ben musu pai moro rente tapu a moni di a leni. Ma a no ben e si dati leki wan bigi sani, fu di na so fasi a ben kan de nanga en osofamiri ala ten, soleki fa Yehovah wani taki papa nanga mama musu du. Eduardo e taki: „Te yu e luku a moni di mi ben e kisi fosi di mi ben wroko na wan tra  kondre, dan a moni di mi e kisi now na noti, ma toku wi no e dede fu angri. ’Na anu fu Yehovah no syatu.’ Fu taki en leti, wi bosroiti fu go pionier srefi. Baka dati na ekonomia na ini a kondre bigin go na fesi èn a ben de moro makriki fu bai den sani di wi ben abi fanowdu.”—Yes. 59:1.

14, 15. (a) San osofamiri kan du te famiriman e dwengi den fu feti na baka gudu, na presi fu anbegi Yehovah? (b) San kan pasa te wi de wan bun eksempre gi den famiriman fu wi?

¹⁴ Na ini furu kondre a de so taki sma feni taki den musu gi famiriman nanga mati moni nanga kado. Eduardo e taki: „Na so sma gwenti du na ini a kulturu fu wi èn wi lobi fu gi trawan sani. Ma yu no man du dati ala ten. Na wan lespeki fasi mi e taigi den famiriman fu mi taki mi o gi den san mi man. Ma mi no o go so fara taki mi no man sorgu gi mi osofamiri noso taki wi no man dini Yehovah moro.”

¹⁵ Sma di drai go baka na a kondre fu den èn den wan di no wani gowe libi den osofamiri fu go wroko na wan tra kondre, abi en muilek. Nofo tron den famiriman ati e bron nanga den, den e spotu den èn den e mandi nanga den fu di den e fruwakti taki den sma disi o gi den moni. Son famiriman e taki srefi taki den sma disi no lobi den (Odo 19:6, 7). Anna, na umapikin fu Eduardo, e taki: „Te wi e taigi wi famiriman taki wi o tan dini Yehovah, na presi fu feti na baka gudu, dan kande sonwan fu den o kon si te fu kaba o prenspari a libi fu wi leki Kresten de. Ma fa den o frustan dati efu wi e du nomo san den fruwakti fu wi?”—Luku 1 Petrus 3:1, 2.

16. (a) Fa wan sma kan ’kori ensrefi nanga prakseri di no tru’? (Yak. 1:22) (b) Sortu bosroiti Yehovah e blesi?

¹⁶ Wan sisa di go wroko na wan gudu kondre sondro en masra nanga den pikin fu en, taigi den owruman: „Wi ben abi fu du furu muiti fu mi kon dya. Mi masra bosroiti srefi fu no dini moro leki owruman. Dati meki mi howpu taki Yehovah o blesi mi taki mi froisi kon dya.” Ala ten Yehovah e blesi den bosroiti di sma e teki fu di den sori bribi na ini en. Ma fa a kan blesi wan bosroiti di no e kruderi nanga a wani fu en, spesrutu te sma e tapu nanga a grani di den abi na ini a gemeente?—Leisi Hebrewsma 11:6; 1 Yohanes 5:13-15.

17. Fu san ede wi musu suku rai na Yehovah fosi wi teki bosroiti èn fa wi kan du dati?

 ¹⁷ Suku rai na Yehovah fosi yu teki wan bosroiti èn no du dati baka te yu teki a bosroiti kaba. Begi en fu a yepi yu èn aksi en fu gi yu en santa yeye nanga koni (2 Tim. 1:7). Aksi yusrefi: ’O fara mi wani go fu gi yesi na Yehovah? Mi o gi yesi na en èn tan nanga mi osofamiri srefi efu mi no o abi so furu moni moro?’ (Luk. 14:33) Go na den owruman so taki den kan gi yu Bijbel rai, sori bribi na ini Yehovah èn teki a rai fu en. Na so yu e sori taki yu e frutrow na en tapu taki a o yepi yu soleki fa a pramisi. Den owruman no man teki bosroiti gi yu, ma den kan yepi yu fu luku sortu sani yu man du so taki yu o de koloku te fu kaba.—2 Kor. 1:24.

18. (a) Suma abi a frantwortu fu sorgu gi na osofamiri? (b) San wi kan du fu yepi wi brada noso sisa?

¹⁸ Yehovah e gi osofamiri-edeman a frantwortu fu sorgu gi den osofamiri ibri dei. Aladi a muilek gi sonwan fu den èn aladi trawan e dwengi den fu go wroko na wan tra kondre, toku den e tan nanga den trowpatna èn nanga den pikin fu den. Wi musu prèise den brada disi gi dati èn wi musu begi gi den tu. Sani kan pasa di wi no fruwakti, soleki rampu noso siki. Ma den sani disi e gi wi na okasi fu sori tru Kresten lobi gi den brada nanga sisa fu wi (Gal. 6:2, 5; 1 Petr. 3:8). Yu kan gi moni fu yepi wan brada noso sisa di de na nowtu noso yu kan yepi en fu feni wan wroko? Na so yu o man horibaka gi en so taki a no e kisi a firi fu libi en osofamiri na baka fu go suku wroko na wan fara presi.—Odo 3:27, 28; 1 Yoh. 3:17.

19, 20. Fu san ede Kresten kan de seiker taki Yehovah wani yepi den?

¹⁹ Bijbel e gi wi a deki-ati disi: „No meki a fasi fa unu e libi sori taki unu lobi moni. Ma un musu breiti nanga den sani di unu abi now, bika Gado taki: ’Mi no o libi yu kwetikweti èn noiti mi o gowe fu yu.’ Na so fasi wi kan abi deki-ati èn wi kan taki: ’Yehovah na mi yepiman. Mi no o frede. San libisma kan du mi?’” (Hebr. 13:5, 6) San dati wani taki?

²⁰ Wan brada di e libi na ini wan gudu kondre èn di de wan owruman langa ten kaba, e taki: „Furu sma e taki dati Yehovah Kotoigi na koloku sma. Den e si tu taki srefi den pôti Kotoigi e weri bun krosi ala ten èn taki a gersi leki sani e go moro bun nanga den leki nanga tra sma.” Disi e kruderi nanga san Yesus pramisi den sma di e poti a Kownukondre na a fosi presi (Mat. 6:28-30, 33). Iya, yu hemel Tata Yehovah lobi yu èn a wan-enkri sani di a wani na taki sani e go bun nanga yu èn nanga yu pikin. „Den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati” (2 Kron. 16:9). Den wèt di a gi wi, soleki den wan di abi fu du nanga na osofamiri-libi èn nanga den sani di wi abi fanowdu ibri dei, de gi a bun fu wi. Te wi e hori den wèt disi, dan wi e sori taki wi lobi en èn taki wi e frutrow en. „Te wi lobi Gado, dan wi o hori den komando fu en. Toku den komando fu en no de wan hebi.”—1 Yoh. 5:3.

21, 22. Fu san ede yu bosroiti fu frutrow na tapu Yehovah?

²¹ Eduardo e taki: „Mi sabi taki mi no man drai a ten di mi no ben de nanga mi wefi èn nanga den pikin fu mi. Ma mi no e tan denki den sani di mi no du bun. Furu fu den owru wrokokompe fu mi gudu, ma den no de koloku. Den osofamiri abi seryusu problema. Ma wi osofamiri de koloku trutru. Mi breiti fu si fa tra brada nanga sisa na ini a kondre disi e tan poti a diniwroko fu Gado na a fosi presi na ini den libi, aladi den pôti. Wi alamala e ondrofeni taki den sani di Yesus pramisi de so trutru.”—Leisi Mateyus 6:33.

²² Abi deki-ati! Teki a bosroiti fu gi yesi na Yehovah èn frutrow na en tapu. Meki yu lobi gi Gado, yu trowpatna nanga yu pikin, yepi yu fu tyari yu frantwortu leki osofamiri-edeman. A bakapisi o de taki yu o si taki ’Yehovah na yu yepiman’.