LONG Baebol, i gat plante stori blong ol man we olgeta nomo oli terem klos blong olgeta. Tede, maet ol man we oli ridim ol stori ya, oli luk se samting ya i narakaen. Be ol man Isrel oli mekem olsem taem oli wari tumas, oli sem bigwan, oli kros tumas, no oli sore bitim mak from wan famle we i ded.

Yu traem tingbaot brata blong Josef, we nem blong hem Ruben. Hem i wantem sevem Josef, be ol narafala brata blong hem oli salemaot Josef finis blong i kam slef. Taem Ruben i luk samting ya, hem i “terem klos blong hem.” Papa blong olgeta, Jekob, “i terem ol klos blong hem” from we hem i ting se wan wael anamol i kilim Josef mo i kakae hem. (Jen. 37:18-35) Job “i terem klos blong hem” taem hem i harem se evri pikinini blong hem oli ded. (Job 1:18-20) Wan man “i terem ol klos blong hem,” taem hem i go talemaot long hae pris Ilae se ol man Isrel oli lus long faet, tufala boe blong Ilae oli ded, mo ol man Filistia oli stilim bokis blong kontrak. (1 Saml. 4:12-17) Taem King Josaea i harem ol tok we sekretari blong hem i ridim long buk blong Loa, hem i luksave se ol man blong hem oli no obei long God, ale hem i “terem klos blong hem.”—2 King 22:8-13.

Taem ol lida blong ol man Jiu oli mekem kot long Jisas, Hae Pris Kaeafas i “terem klos blong hem” from we hem i ting se Jisas i tok nogud long God. (Mat. 26:59-66) Wan kastom blong ol tija blong ol man Jiu i talem se, evri man we i harem narafala i tok nogud long nem blong God, hem i mas terem ol klos blong hem. Be afta we haos tempol long Jerusalem i lus, ol tija ya oli talem wan defren tingting bakegen. Oli talem se: “Tede, sipos wan man i harem narafala i tok nogud long Nem blong God, hem i no mas terem ol klos blong hem, from we sipos no, bambae ol klos blong hem oli brokbrok nogud.”

Jehova i no tinghae long man we i giaman nomo se hem i sore, nao i terem ol klos blong hem. Taswe, Jehova i talem long ol man blong hem se: ‘Yufala i no terem klos blong yufala, be yufala i mas terem hat blong yufala. Mo yufala i mas kambak long mi.’—Joel 2:13.