Eski ou ti konnen?

Dan letan Labib, ki i ti vedir kan en dimoun ti desir son lenz?

LABIB i dekrir detrwa sityasyon kot serten dimoun ti desir zot lenz. Sa i kapab paret en keksoz drol pour bann lekter dan nou letan, me pour bann Zwif i ti en fason pour eksprim sa lemosyon for ki ti demontre zot dezespwar, sagrinasyon, imilyasyon, lakoler oubyen dey.

Par egzanp, Ribenn ti “desir son lenz” kan i ti dekouver ki son plan pour delivre son frer Zozef ti’n kase akoz i ti’n ganny vann dan lesklavaz. Zot papa Zakob ti “desir son lenz” kan i ti krwar ki Zozef ti’n ganny devore avek en zannimo sovaz. (Zen. 37:18-35) Zob ti “desir son lenz” kan i ti tande ki tou son bann zanfan in ganny touye. (Zob 1:18-20) En mesaze “ki ti’n desir son lenz” ti vin devan Gran Pret Eli pour enform li ki bann Izraelit in perdi lager, son de garson in ganny touye e ki lars lalyans in ganny pran. (1 Sam. 4:12-17) Kan Yosiya ti tann Lalwa pe ganny lir avek li e rekonnet defo son pep i ti “desir son lenz.”​—2 Rwa. 22:8-13.

Kan Zezi ti pe ganny zize, Gran Pret Kaif ti “desir son lenz” kan i ti ziz sa ki Zezi ti’n dir konman blasfenm. (Mat. 26:59-66) Tradisyon bann profeser Lalwa ti dir ki nenport ki dimoun ki tann non Bondye ganny blasfenm, ti oblize desir zot lenz. En lot lopinyon ki bann profeser Lalwa ti annan apre destriksyon tanp Zerizalenm, i dir ki “sa ki tann sa Non Sakre ganny blasfenm konmela i devret desir son lenz, si non zot lenz ti pou ganny desire.”

Byensir, kan en dimoun ti desir son lenz sa ti napa valer dan lizye Zeova si i pa ti senser. Alor, Zeova ti demann son pep pou ‘desir zot leker, pa zot lenz e retourn kot li.’​—Yoel 2:13.