ILADAWAN ti Kasuratan ti adu a pasamak a rinay-ab dagiti tattao ti kawesda. Kasla karkarna dayta kadagiti agbasbasa iti Biblia iti kaaldawantayo. Ngem para kadagiti Judio, panangipakita dayta iti di masbaalan a rikna a gapuanan ti pannakapaay, ladingit, pannakaibabain, wenno pungtot.

Kas pagarigan, ‘rinay-ab ni Ruben dagiti kawesna’ idi nakitana a napaay a mangispal iti kabsatna a ni Jose ta nailako metten kas adipen idiay Egipto. Ti amada a ni Jacob ‘rinay-abna dagiti kagayna’ idi impapanna a maysa nga animal ti nangalun-on ken Jose. (Gen. 37:18-35) ‘Rinay-ab ni Job ti awan manggasna a kawesna’ idi naipadamag kenkuana a natay ti amin nga annakna. (Job 1:18-20) Maysa a mensahero a “naray-ab dagiti kawesna” ti napan iti nangato a padi a ni Eli tapno ipadamagna a naabak dagiti Israelita iti gubat, napapatay ti dua nga annak ni Eli, ken innala dagiti Filisteo ti lakasa ti tulag. (1 Sam. 4:12-17) Idi nangngeg ni Josias ti pannakaibasa ti Linteg ken nabigbigna dagiti biddut dagiti umili, “rinay-abna dagiti kawesna.”—2 Ar. 22:8-13.

Idi nabista ni Jesus, ti nangato a padi a ni Caifas “rinay-abna dagiti makinruar a kawesna” idi nangngegna ti impagarupna a panagtabbaaw. (Mat. 26:59-66) Sigun iti maysa a tradision dagiti Rabbi, ti asinoman a makangngeg a matabtabbaawan ti nagan ti Dios ket obligado a mangray-ab iti kawesna. Ngem sigun iti sabali pay nga opinion dagiti Rabbi kalpasan ti pannakadadael ti templo ti Jerusalem, “ti asinoman a makangngeg ita iti pannakatabbaaw iti Nagan ti Dios saannan a ray-aben ti kawesna, ta no aramidenna dayta, agbalin laeng a rigis ti kawesna.”

Siempre, awan pategna iti Dios ti panangray-ab ti maysa a tao iti kawesna, malaksid no naimpusuan ti panagladingitna. Gapuna, imbaga ni Jehova iti ilina a ‘pisangenda ti puspusoda, saan a dagiti kawesda, ket agsublida kenkuana.’—Joel 2:13.