BIBILIA nĩ ĩtaragĩria maũndũ matiganĩte marĩa maatũmire andũ matembũrange nguo ciao. Mahinda-inĩ maya, mũndũ gũtembũranga nguo ciake no woneke ũrĩ ũndũ wa magegania. Ĩndĩ, Ayahudi nĩ maahũthagĩra njĩra ĩyo kuonania ruo rwa ngoro rũrĩa rumanaga na kĩeha, ihooru, gũthuthĩka ngoro, marakara, kana gĩconoko.

Kwa ngerekano, Reubeni nĩ ‘aatembũrangire nguo ciake’ rĩrĩa onire atĩ mĩbango yake ya kũhonokia mũrũ wa ithe Jusufu nĩ yaringa ihiga, tondũ Jusufu nĩ eendetio ũkombo-inĩ. Nake ithe wao Jakubu, nĩ ‘aatembũrangire nguo ciake’ rĩrĩa eecirĩtie atĩ mũriũ Jusufu nĩ oragĩtwo nĩ nyamũ ya gĩthaka. (Kĩam. 37:18-35) Rĩrĩa Ayubu eerirũo atĩ ciana ciake ciothe nĩ ciakua, nĩ ‘atembũrangire nguo ciake.’ (Ayub. 1:18-20) Nake mũndũ ũrĩa wareheire Eli, Mũthĩnjĩri-Ngai-Mũnene ndũmĩrĩri atĩ Aisiraeli nĩ maahotetwo mbaara-inĩ, na atĩ ciana ciake nĩ cioragĩtwo, na ithandũkũ rĩa kĩrĩkanĩro rĩgathiĩ na thũ, aathire harĩ Eli “nguo ciake irĩ ndembũkangu.” (1 Sam. 4:12-17) Rĩrĩa Josia aathomeirwo ciugo cia Watho, akĩigua ũrĩa Aisiraeli maagararĩte Watho ũcio, “agĩtembũranga nguo ciake.”—2 Ath. 22:8-13.

Hĩndĩ ĩrĩa Jesu aacirithagio, Kaiafa Mũthĩnjĩri-Ngai-Mũnene, nĩ ‘aatembũrangire nguo ciake,’ rĩrĩa aaiguire ciugo cia Jesu na agĩtua kĩĩmahĩtia atĩ Jesu nĩ aruma Ngai. (Mat. 26:59-66) Kũringana na kĩrĩra kĩa arabii, mũndũ o wothe angĩaiguire ũrĩa ũngĩ akĩruma Ngai, aagĩrĩirũo nĩ gũtembũranga nguo ciake. O na kũrĩ ũguo, kĩrĩra kĩngĩ kĩa arabii gĩa thutha wa kwanangwo kwa hekarũ Jerusalemu, kĩoigĩte atĩ mahinda-inĩ macio “mũndũ aangĩaiguire ũrĩa ũngĩ akĩruma Ngai, ndaagĩrĩirũo gũtembũranga nguo ciake, tondũ nĩ hangĩakinyire handũ nguo ciake ciothe ituĩke matangari.”

Ma nĩ atĩ, mũndũ gũtembũranga nguo ciake gũtingĩakorirũo na bata maitho-inĩ ma Ngai, o tiga akorirũo ahenjekekete ngoro biũ. Nĩ ũndũ ũcio, Jehova eerire ndungata ciake ũũ: “Tembũrangai ngoro cianyu, na mũtigatembũrange o nguo cianyu ciiki, mũcokerere Jehova Ngai wanyu.”—Joel 2:13.