INUIT pissutsini assigiinngitsuni atisaminnik alittuisut Biibilimi eqqaaneqarput. Taamaaliortarneq ullutsinni eqqumiigineqassagunartoq itsaq juutit isumatsassimanermut, aliasunnermut, kanngusunnermut imaluunniit peqqissiminermut ersiutaatittarpaat.

Assersuutigalugu Rubenip qatanngumminik aniguisitseriaraluarnini iluatsinngitsoortoq paasigamiuk ‘atisani alittorpai’, Josefimi inussiatut niuffagianut tunineqareersivoq. Ataataata, Jaakup, Josefi nersummit kiisortumit nerineqarsorisimagamiuk “atisani alittorpai”. (1 Mos 37:18-35) Jobip ‘qallersaatini alittorpaa’ oqariartorfigineqarami meeqqani tamarmik toqutaasimasut. (Job 1:18-20) Oqariartortup ‘atisani alittorsimallugit’ palasiuneq Eli sassarfigaa Israelikkut sorsuffimmi ajorsarujussuarsimanerannik, ernerisalu marluk toqutaasimanerannik aamma angerutsip illerfiata tiguneqarsimaneranik nalunaarfigiartorlugu. (1 Sam 4:12-17) Josijap inatsisinik mappersakkamiittunik atuffanneqarnermini innuttani ajortumik iliorsimasut paasigamiuk “atisani alippai”. — 2 Kng 22:8-13.

Jiisusimik killisiuinermi palasiunerup Kajfasip Jiisusi Guutimik mitaatiginnissorigamiuk “qallersaatini alippaa”. (Matt 26:59-66) Rabbinerit inatsisaasa ilaanni allassimavoq kinaluunniit Guutip aqqanik mitaatiginninnermik tusartoq atisaminik alittuissasoq. Naalaffiup Jerusalemimiittup aserorneqarnerata kingornatigut rabbinerit inatsisaanni allami ima allassimasoqalerpoq: “Ullumikkut Guutip aqqanik mitaatiginnittumik tusartup atisani alittortariaqanngilai taamaaliuinnarniarunimi naggataatigut alittornikuinnarnik atisaqaleqinagami.”

Soorunami inuup kukkussutiminik peqqissimissutiginninnani atisaminik alittuinera Guutip isaani naleqarnavianngilaq. Taamaattumik Jehova innuttaminut ima peqqusivoq: “Atisasi pinnagit uummatisi alittorsigit, saanniaritsi Naalakkamut Guutissinnut!” — Joel 2:13.