BINEMBELO byaamba pa bantu bavula bingi batabwile bivwalo byabo na mambo a bintu bimo bibamwekejile. Bantu batanga ano mashimikila mu ano moba kechi bakonsha kuyuka mo kyatala ne. Bino Bayudea bakala abo kuba bino kwamweshanga kupelelwa, bulanda, bumvu, bukaji ne majilo.

Kya kumwenako, Lubenyi “watabawile bivwalo byanji” mambo jishinda jo alangulukile kupulushishamo nkasanji Yosefwa jakankelwe kwingila, Yosefwa bamupoteshe mu buzha. Shabo Yakoba naye “watabawile bivwalo byanji” pa kumona’mba mwananji Yosefwa bamuja ku nyama mukaji. (Nte. 37:18-35) Yoba ‘watabawile kivwalo kyanji’ byo bamubujile kuba’mba baana banji bonse bafwa. (Yoba 1:18-20) Muluwe ne “bivwalo byanji saka byatabaulwa” wayile kwi Eli Ñanga Mukatampe na kumubula kuba’mba bena Isalela bebashinda ku nkondo, ne baana benu bababalume babiji bebepaya kabiji bebangata ne jikwachi ja lulayañano. (1 Sam. 4:12-17) Yosiya “watabawile bivwalo byanji” byo bamutangijile Mizhilo yamulengejile kuyuka mizhilulwila ya bantu banji.—2 Mfu. 22:8-13.

Kimye kyo batotolwesheshenga Yesu, Kaifasa Ñanga Mukatampe watabwile “kivwalo kyanji kya peulu” byo aumvwine byambo byo alangulukile amba Yesu wauba mwenga Lesa. (Mat. 26:59-66) Mu kisho kya Bayudea mwajinga mukambizho wa kuba’mba yense waumvwa jizhina ja Lesa na kubiwa mwenga wafwainwa kutabula kivwalo kyanji pa kyaji. Panyuma ya konaunwa kwa nzubo ya Lesa ya mu Yelusalema, mu kino kisho baletelemo mukambizho wa ku­ba’mba, “yense waumvwa jizhina ja Lesa na kubiwa mwenga mu ano moba wafwainwa kutabula kivwalo kyanji pa kyaji, inge wabula kuba bino, bakwabo bakebitabaula byashalatu ke misakila.”

Nangwa byonkabyo, kutabula bivwalo kechi kwanemene kwi Lesa ne, kanatu akwa kwamweshanga bulanda bwa kine. O ene mambo, Yehoba o aambijile bantu banji amba, ‘mutabaule michima yenu, kechi bivwalo byenu ne. Mwalulukile kwi amiwa.’—Yoe. 2:13.