MATJANGWA kwa faturura yihorokwa yovantu ava va tawire yikoverero yawo. Nkedi zangesi kuvhura kumoneka ugeni kovaresi womomazuva getu, nye mokatji koVajuda kwa kere nkedi zokulikida ruguwo nonomuga ndi ehandu.

Pasihonena, Rubena ‘kwa tawire yikoverero yendi’ apa ga ya divire asi egano lyendi lyokuzowora mumbyendi Josefa kapi lina tompoka, morwa Josefa kwa mu randesere koupika. Guhyawo Jakopo, nage ‘kwa tawire yikoverero yendi’ apa ga gazarere asi munwendi Josefa ana likana kosikasama. (Gen. 37:18-35) Joba ‘kwa tawire yikoverero yendi’ apa va mu tantere asi vana vendi navenye vana fu. (Joba 1:18-20) Mugavimbudi gumwe ‘kwa tavagwire yikoverero yendi,’ apa ga ka sikire komupristeli gomunene Eli nokumutantera asi Vaisraeli vana va fundu moyita, ano vana woge wovagara vavali vana va dipaga, ntani sikesa zegwanekero vana si twara. (1 Sam. 4:12-17) Apa Josiya ga zuvhire nonkango domobuke zoVeta edi va mu reserere nokudimburura nonzo dovantu vendi, “makura ta taura yikoverero yendi.”—2 Vah. 22:8-13.

Apa va pangwire Jesus, mupristeli gomunene “ta taura sikoverero sendi” morwa age kwa uyungire asi Jesus ana swaura Karunga. (Mat. 26:59-66) Kuliza noveta ezi va tulisire po varongi woukarelikarunga, nkenye ogu nga zuvhu edina lyaKarunga kuna kuliswaura ga hepere kutaura yikoverero yendi. Ano egano limwe eli va tulisire po konyima lyezonaguro lyontembeli zomoJerusarema, kwa tanta asi “nkenye ogu ana kuzuvha edina lyaKarunga kuna kuliswaura kapisi hepero kutaura yikoverero yendi, morwa kuvhura a mane kutavagura yikoverero yendi nayinye.”

Yosili, kutaura yikoverero kapi ya kere nomulyo kosipara saKarunga ntudi muntu ogo a likide ruguwo rousili. Yipo nye, Jehova ga tanterere vantu vendi va ‘sige nomwenyo dawo di tekauke yipo di horore ruhodi, nye kutavagura yikoverero yawo kwelike kapi kwa gwanena po.’—Jow. 2:13.