OMANYOLO otaga hokolola lwiikando kombinga yaamboka ya tuula oonguwo dhawo yene. Otashi vulika shi kumithe oyendji kunena, ihe kAajuda pethimbo ndiyaka, okutuula oonguwo okwa li omukalo gwokuulika etekomukumo, oluhodhi, ohoni nenge ongeyo.

Pashiholelwa, Ruben okwa “tuula oonguwo dhe” sho a mono kutya Josef okwa landithwa po muupika noka li we ta vulu oku mu gamena. Nokonima he yawo, Jakob, sho a dhiladhila kutya omwana okwa lika po koshilikama, okwa “tuula oonguwo dhe.” (Gen. 37:18-35) Job naye okwa “tuula oonguwo dhe,” sho u uvu kutya oyana oya dhipagwa. (Job 1:18-20) Omanga omulumentu ngoka a hokololele Eli kutya Aaisraeli oya yi ontuku, oyanamati ye oya dhipagwa, noshikethahangano shaKalunga osha kwatwa po e ya a “tuula oonguwo dhe.” (1 Sam. 4:12-17) Josia naye okwa “tuula oonguwo dhe,” sho a leshelwa Ompango e ta mono kutya oshigwana she inashi gwanitha po shoka sha nyolwa mo. —  2 Aak. 22:8-13.

Sho Jesus ta pangulwa, omuyambimukuluntu Kajafas “okwa tuula oonguwo dhe mwene” sho a dhiladhila kutya Jesus okwa tuku Kalunga. (Mat. 26:59-66) Pamuthigululwakalo gwAarabi, ngele omuntu oku uvu edhina lyaKalunga tali shekwa, oku na okutuula oonguwo dhe. Ihe ompango yilwe yAarabi ndjoka ya ka gandjwa konima yokuhanagulwa po kwotempeli muJerusalem oya ti: “Kehe ngoka tu uvu edhina lyaKalunga tali shekwa, ina pumbwa we okutuula oonguwo dhe, opo kaadhi ninge iinyakwi.”

Ihe okutuula oonguwo kakwa li ku na ongushu yasha momeho gaKalunga, ngele omuntu ina sa shili oluhodhi. Nomolwashoka Jehova a lombwele oshigwana she shi ‘tuule omitima dhasho shi holole oluhodhi, sho shi galukile kuye, oshoka okutuula oonguwo dhasho inaku gwana.’ — Joel 2:13.