KUA fakamaama he tau Tohiaga Tapu e tau tuaga loga ne hēhē he tau tagata ha lautolu ni a tau tapulu. Ko e gahua ia kua liga matakehe ke he tau tagata totou he vahā nei, ka e ke he tau tagata Iutaia ko e fakakiteaga a ia he tau logonaaga malolō ne tupu ha ko e fakaatukehe, momoko, fakamā, ita, po ke maanu.

Ma e fakatai, ko Reupena ne “hēhē ai e ia hana tau tapulu” he magaaho ne mailoga e ia ko e pulega haana ke fakahao e tehina haana ko Iosefa kua mataofi ha kua fakafua atu a Iosefa ke fakatupa. Ko e matua taane ha lautolu ko Iakopo, ne ‘hehe hana tau tapulu,’ he manatu a ia kua kai tuai he manu favale a Iosefa. (Kene. 37:18-35) Ko Iopu ne “hehe ai e ia hana tapulu” he magaaho ne tala age ki a ia kua mamate oti e tau fanau haana. (Iopu 1:18-20) Ko e tagata uta fekau ne “mahehe hana tau tapulu” kua tū ki mua he Ekepoa ne Mua ko Eli ke tala age ki a ia kua kaumahala e tau Isaraela he tau, mamate e tau tama taane tokoua ha Eli, ti kua uta e puha he maveheaga. (1 Samu. 4:12-17) Magaaho ne logona e Iosia e tau kupu he Fakatufono ne totou ki a ia ti mailoga e tau hepehepe he tau tagata haana, ne “hehe ai e ia hana tau tapulu.”​—2 Patu. 22:8-13.

He fakafiliaga ha Iesu, ko e Ekepoa ne Mua ko Kaiafa ne ‘hēhē ai hana tau tapulu’ he magaaho ne logona e ia e tala, ti fakahala ai e ia he pehē ko e vagahau kelea. (Mata. 26:59-66) Ko e tau fakaakoaga tuai he tau rapai ne poaki ko e ha tagata ne logona e higoa he Atua ne vagahau kelea ki ai kua lata ke hēhē ha lautolu a tau tapulu. Ka ko e taha manatu foki he tau rapai he mole e moumouaga he faituga i Ierusalema ne pehē, “ko ia ne logona e Higoa he Atua ne vagahau kelea ki ai he magahala nei, kua nakai lata ke hēhē haana tau tapulu neke mavekeveke haana tau tapulu.”

Mooli, ko e hēhē he tagata e haana tau tapulu kua nakai aoga ke he fofoga he Atua kaeke kua nakai momoko mooli e tagata. Ati tala age a Iehova ke he tau tagata haana ke “hēhē e mutolu e tau loto ha mutolu, ka e nakai ko e tau tapulu ha mutolu, mo e liliu atu” ki a ia.​—Ioelu 2:13.