OVIHONEKWA vipopia ononkhalelo ononyingi ovanthu ankho vatandula ovikutu viavo. Hono otyo katyilingwa vali, mahi pala ova Judeu, okutandula ovikutu ankho tyilekesa okuti omunthu wanumana unene, ine wakundisua.

Mongeleka, Rubem “watandulile ovikutu viae” etyi anoñgonoka okuti ehando liae liokuyovola ondenge yae Jose kaliafuisilwepo, mokonda Jose ankho walandesuale koupika. Tate yavo Jako, “watandulile ovikutu viae” etyi ankho asoka okuti Jose waliua notyinyama tyomofika. (Gên. 37:18-35) Job “watandulile ovikutu viae” etyi apopilwa okuti ovana vae aveho vaipawa. (Jó 1:18-20) Omutumwa umwe “novikutu viae viatandauka,” weile Komunene-nakwa Eli, emupopila okuti ova Isilayeli vafindwa movilwa, ovana vae vevali vaipawa, iya otyikasa tyomphango tyapita nonondyale. (1 Sam. 4:12-17) Etyi Josia eiva onondaka Mbovitumino ankho vemutangela, iya aimbuka okuti ovanthu vae vapengesa, “watandulile ovikutu viae.”—2 Reis 22:8-13.

Etyi Jesus ankho ekahi nokukoyeswa, Omunene-nakwa Kaifá “watandulile ovikutu viae” etyi apopia okuti etyi eiva ehingano ku Huku. (Mat. 26:59-66) Oviso vio va Judeu ankho vipopia okuti kese omunthu wiiva enyina lia Huku likahi nokupenyua, una okutandaula ovikutu viae. Etyi ondyuo ya Huku mo Jelusalei yahanyuapo, ova Judeu ankho pahe vapopia okuti ‘hono una wiiva Enyina lia Huku likahi nokupopiwa omapita kesukisile vali okutandaula ovikutu viae, mokonda inkha utyilinga, ovikutu viae aviho mavikala vala ovinyanyu.’

Tyotyili, inkha omunthu ankho keihamenenwe komutima atandaula ovikutu viae, ku Huku ankho tyitupu esilivilo. Moluotyo, Jeova wapopilile ovanthu vae opo ‘vahatandule ovikutu viavo, mahi vatandule omitima viavo, avakondoka kwe.’—Joel 2:13.