DIAD Kasulatan, adeskribe so pigaran situasyon ya pinilat na saray indibidual so kawes da. Singa aliwan normal itan ed sikatayo natan, balet parad saray Judio nensaman, panangipatnag itan na graben emosyon lapud ermen, sanok, tan kababaingan.

Singa bilang, pinilat nen Ruben so kawes to nen naamtaan ton agto la niliktar so agi ton si Jose ta inlako la na arum ya agagi to pian magmaliw ya aripen. Say ama ran si Jacob et “pinilatpilat to so kawes to” ta inisip ton si Jose et pinatey na masibeg ya ayep. (Gen. 37:18-35) ‘Pinilat nen Job so kawes to’ nen imbalita rad sikato ya inatey so amin ya ananak to. (Job 1:18-20) Walay mensaheron ‘apilatpilat so kawes to’ ya linmad Atagey a Saserdoten si Eli pian ibalitan atalo iray Israelita, inatey so duaran anak nen Eli, tan nala na saray kalaban so kaban na sipanan. (1 Sam. 4:12-17) Nen nadngel nen Josias so Ganggan tan amoria ton baleg so kasalanan na saray totoo, ‘pinilat toy kawes to.’—2 Ara. 22:8-13.

Legan na bista nen Jesus, “pinilat na atagey a saserdote [a si Caifas] iray latop ton kawes” nen nadngel to kunon inayew nen Jesus so Dios. (Mat. 26:59-66) Unong ed ganggan ya ginawa na saray rabbi, siopaman ya makarengel ya walay manaayew ed ngaran na Dios et obligadon pilaten toy kawes to. Balet unong ed opinyon na saray rabbi ya nambilay kayari impakaderal na templo ed Jerusalem, “no narengel na sakey ya walay mangaayew ed Masanton Ngaran, agto la kaukolan ya pilaten so kawes to, ta no gawaen to ’tan, magmaliw lan lupot so amin ya kawes to.”

Siempre, anggano pilaten na sakey a too so kawes to, anggapoy kakanaan na satan ed Dios no kunwari labat so paneermen to. Kanian imbaga nen Jehova ed saray totoo to ya ‘ipapuso day paneermen da, ta aliwan masarag so pampilat day kawes da.’—Joel 2:13, Maung a Balita.