E SKRITURA ta deskribí vários situashon den kua hende tabata sker nan mes pañanan. Esei por parse straño den e tempu akí, pero pa e hudiunan e tabata un manera pa ekspresá un emoshon fuerte di desesperashon, tristesa, humiashon òf rabia.

Por ehèmpel, Ruben “a sker su pañanan” ora el a haña sa ku su plan pa libra su ruman hòmber Yosef a frakasá, pasobra nan a bende Yosef komo esklabo. Nan tata, Yakòb, “a sker su pañanan” pasobra el a kere ku ta un bestia salbahe a habraká Yosef. (Gén. 37:18-35) Yòb “a sker su pañanan” ora nan a bis’é ku tur su yunan a muri. (Yòb 1:18-20) Un mensahero ‘ku su pañanan di sker’ a presentá dilanti di e Sumo Saserdote Elí pa inform’é ku e israelitanan a pèrdè un bataya, ku nan a mata su dos yu hòmbernan i ku enemigunan a bai ku e arka di pakto. (1 Sam. 4:12-17) Ora Yosías a tende e lesamentu di e palabranan di e Lei i a realisá ki malu su pueblo a hasi, “el a sker su pañanan.”—2 Rei. 22:8-13.

Durante e huisio di Hesus, Sumo Saserdote Kaifas “a sker su pañanan” ora el a tende loke é a kalifiká inhustamente un blasfemia. (Mat. 26:59-66) Un tradishon rabíniko a stipulá ku ken ku a tende blasfemia kontra e nòmber divino tabata obligá di sker su pañanan. Sinembargo, un otro opinion rabíniko ku a surgi despues di e destrukshon di e tèmpel di Herúsalèm a deklará ku “awe, ken ku tende blasfemia kontra e Nòmber Divino no tin nodi di sker su pañanan, sino ta algun repi di paña so lo e sobra na su kurpa.”

Ta klaru ku e akshon di sker paña no tabatin ningun balor den bista di Dios si un hende su tristesa no tabata di kurason. P’esei Yehova a bisa su pueblo pa ‘sker nan kurason i no nan pañanan, i bolbe serka dje.’—Yoël 2:13.