E SCRITURA ta describi varios situacion den cua hende tabata scheur nan mes pañanan. Esey por parce straño den e tempo aki, pero pa e Hudiunan e tabata un manera pa expresa un emocion fuerte di desesperacion, tristeza, humiliacion of rabia.

Por ehempel, Ruben “a scheur su pañanan” ora el a haya sa cu su plan pa libra su ruman homber Jozef a fracasa, pasobra nan a bende Jozef como esclavo. Nan tata, Jacob, “a scheur su pañanan” pasobra el a kere cu ta un bestia salbahe a habraca Jozef. (Gen. 37:18-35) Job “a scheur su pañanan” ora nan a bis’e cu tur su yiunan a muri. (Job 1:18-20) Un mensahero ‘cu su pañanan gescheur’ a presenta dilanti di e Sumo Sacerdote Eli pa inform’e cu e Israelitanan a perde un bataya, cu nan a mata su dos yiu hombernan y cu enemigonan a bay cu e arca di pacto. (1 Sam. 4:12-17) Ora Josias a tende e lesamento di e palabranan di e Ley y a realisa con su pueblo a peca, “el a scheur su pañanan.”—2 Rey. 22:8-13.

Durante e huicio di Hesus, Sumo Sacerdote Caifas “a scheur su pañanan” ora el a tende loke e a califica inhustamente como un blasfemia. (Mat. 26:59-66) Un tradicion rabinico a stipula cu ken cu a tende blasfemia contra e nomber divino tabata obliga di scheur su pañanan. Sinembargo, un otro opinion rabinico cu a surgi despues di e destruccion di e tempel di Jerusalem a declara cu “awe, ken cu tende blasfemia contra e Nomber Divino no tin nodo di scheur su pañanan, sino ta algun repi di paña so e lo resta na su curpa.”

Ta claro cu e accion di scheur paña no tabatin ningun balor den bista di Dios si un hende su tristeza no tabata di curason. Pesey Jehova a bisa su pueblo pa ‘scheur nan curason y no nan pañanan, y bolbe cerca dje.’—Joel 2:13.