MAATA te taime i roto i te Pipiria e kua aae tetai au tangata i to ratou kakau. Penei e mea tuke akerai te reira i teia tuatau, inara e ravenga teia no te ngati Iuda kia akaari i to ratou mamae no to ratou tu taitaia, tangi, akama, riri, e te mii.

Ei akaraanga, kua “aae iora [a Reubena] i tona kakau” te kite anga e kare e rauka iaia i te akaoki i tona teina ko Iosepha no te mea kua okoia a Iosepha ei tuikaa. “Kua aae iorā Iakoba i tona kakau,” te manako anga e kua pou tana tamaiti ko Iosepha i tetai puaka taae. (Gene. 37:18-35) Te akakiteia anga kia Iobu e kua mate tana au tamariki, “kua aeae i tona kakau.” (Iobu 1:18-20) Te aravei anga tetai tangata apai karere tei “aaeia ona kakau” i te Taunga Maata ko Eli, kua akakite aia e kua pou maata te ngati Iseraela i te tamaki, kua mate te nga tamaroa a Elia, e kua riro ke atu te aruna koreromotu. (1 Samu. 4:12-17) Te tatauia anga te au tuatua o te Ture kia Iosia e kua kite aia i te tarevake o tona iti tangata, “kua aae iora aia i ona kakau.”—2 Ari. 22:8-13.

I te akavaanga o Iesu, te rongo anga te Taunga Maata ko Kaiapha i tana i manako e e akakino anga Atua, “kua aae iora taua taunga maata ra i tona kakau.” (Mata. 26:59-66) Kia tau ki te au ture a te au rapi, me rongo tetai ua atu tangata e kua akakinoia te ingoa o te Atua, ka anoanoia aia kia aae i tona kakau. Inara, te akakite maira tetai akaou ture a te rapi tei akanooia i muri ake i te takoreia anga o te iero i Ierusalema e, “ko tei akarongo ki te tuatua akakino no runga i te Ingoa o te Atua i teia tuatau, kia kore aia e aae i tona kakau, no te mea ka veruveru tona kakau.”

Me aae tetai tangata i tona kakau, kare te reira e puapinga ana ki te Atua me kare te tu mamae o te tangata i te mea tika tikai. No reira a Iehova i karanga ai ki tona iti tangata e: “To kotou ngakau te aae, e auraka to kotou kakau, ka ariu ei ki to kotou Atua, kia Iehova.”—Ioela 2:13.