BIBLE asara tënë ti aye so asi so na ngoi ni ambeni zo asuru bongo na tere ti ala. Azo so adiko Bible laso ahinga li ti ala na sarango ye so ape. Me ti aJuif lani, a yeke mbeni lege ti fa kota vundu so ayeke na bê ti ala ngbanga ti so bê ti ala anze, a bi kamene na lê ti ala, bê ti ala ason, wala ala yeke na yâ ti mua.

Na tapande, na ngoi so Ruben amä so ye so lo leke ti zi ita lo Joseph atï na ngu ndali ti so akä Joseph na ngbâa awe, “lo suru bongo ti lo.” Babâ ti ala Jacob “asuru bongo ti lo,” na ngoi so a tene na lo so mbeni sioni nyama ti ngonda ate Joseph awe (Gen. 37:18-35). Job ‘asuru kota bongo ti lo’ na ngoi so a tene na lo so a fâ amolenge ti lo kue awe (Job 1:18-20). Mbeni watokua so “Lo suru bongo ti lo” aga na devant ti Kota Prêtre Eli ti tene na lo so azo ti Israël atï na yâ ti bira, a fâ amolenge ti lo ti koli use nga a mû arche ti mbele ahon na ni (1 Sam. 4:12-17). Na ngoi so a diko na Josias ambeti ti Ndia na lo bâ so azo ti lo asara faute, “lo suru bongo ti lo.”—2 aGbia 22:8-13.

Na ngoi so Jésus ayeke lani na yâ ti tara, Kota Prêtre Caïphe “asuru abongo ti lo ti ndo ni” na ngoi so lo mä mbeni tënë so Jésus atene lo bâ lo tene zonga la (Mat. 26:59-66). Na yâ ti ngobo ti arabbin, a fa na ala so tongana mbeni zo amä so a zonga iri ti Nzapa a lingbi zo ni asuru bongo ti lo. Me mbeni ye so ala zia na yâ ti ngobo ti ala ni na peko ti so a futi temple ti Jérusalem, a tene so “laso, zo ayeke na bezoin pëpe ti suru bongo ti lo tongana lo mä a zonga Iri ti Nzapa ndali ti so azo ayeke zonga Iri ti Nzapa lakue, na tongana lo suru bongo ti lo lakue tongana a zonga Iri ti Nzapa, abongo ti lo kue ayeke ga gi achiffon.”

Biani, ti tene mbeni zo asuru bongo ti lo, a yeke lani kota ye na lê ti Nzapa ape tongana zo ni asara ni ti fa gi na azo so lo yeke na vundu me ti tâ tënë ni lo yeke na vundu ape. Ni la Jéhovah atene lani na azo ti lo, lo tene ala ‘suru bê ti ala, me ala suru bongo ti ala pëpe, na ala kiri na lo’.—Joël 2:13.