BIBILO pase ashighe kpishi a ior yange ve ande akondo a ve yô. Nyian ne, alaghga mbagenev vea ôr kwagh ne nahan a taver ve kpishi, nahan kpa hen Mbayuda yô, lu gbenda u tesen ér kwagh vihi or shin nan ngu ken mzungu shin nan hee shin ishima gba nan awambe yô.

U tesen ikyav yô, zum u Ruben nenge ér un kera fatyô u yiman anngô na Yosev er wa ishima la ga sha ci u i tee Yosev hingir kpan yô, Ruben “ande akondo na.” Ter ve Yakob kpa va “ande akondo a na” shighe u hen ér inyam wua Yosev la. (Gen. 37:18-35) Yobu kpa yange “ande riga na” zum u i ôr un ér i wua ônov nav cii yô. (Yobu 1:18-20) Shighe u i hemba Mbaiserael ityav shi i wua ônov mba Pristi u Tamen Eli, shi i ngohol areki u ikyuryan la, ortyom u yange va u va ôron Eli loho shon la va “a akondo a anden iyol.” (1 Sam. 4:12-17) Shighe u i va ôr Yoshia akaaôron a ken Ruamabera u atindigh la ungwa shi kav ibo i ior nav yô, “a ande akondo a na.”—2 Utor 22:8-13.

Shighe u i lu ôron Yesu ijiir la, Zegepristi Kayafa “ande akondo a na,” zum u a hen ér Yesu ngu tuhwan a tuhwa Aôndo, kpa lu nahan ga la. (Mat. 26:59-66) Tindi ugen u yange mbatesen mba Mbayuda wa yô, kaa ér aluer or ungwa orgen ngu tuhwan iti i Aôndo yô, nana ande akondo a nan. Kpa mhen ugen u mbatesen mba Mbayuda yange ve due a mi zum u i hembe tempel u ken Yerusalem kera la di gema kaa ér “aluer or ungwa i tuhwa Iti i Aôndo nyian kpa ityôkyaa ngi i nana ande akondo a nan ga, gadia aluer nana er nahan yô, akondo a nan aa va hingir atsaver akondo tseegh.”

Jighilii yô, ieren i or anden akondo a nan la tseegh yange lu a inja sha ishigh ki Aôndo ga, saa ijungwen i nan la ia lu i sha mimi. Sha nahan yô, Yehova yange kaa a ior nav ér ve ‘ande asema a ve, i̱ de kera lu akondo ga; shi ve gema hen a na.’—Yoel 2:13.