BIBLIA makglhuwa lichuwinan la makgapitsi latamanin xtitkgolh xlhakgatkan. Uma max nialh tatlawa la uku, pero judíos xtlawakgo uma talismanin xlakata xlimasiyakgolh pi wi tuku lu xmakgkatsimakgo, la takatsanajwat, talakgaputsit, tamamaxanit, tasitsi chu talipuwan.

Akgtum liʼakxilhtit, Rubén «xtitli lhakgat nema xwilinit» akxni katsilh pi kstakanit xtala José xlakata skujni xlitaxtulh, chu nila xlakgmaxtu. Jacob, xtlat, «xtitli lhakgat nema xwilinit» xlakata lakpuwa pi tantum xalipekua animal xmakgninit José (Gén. 37:18-35). Job xtitli xlhakgat akxni wanika pi xkamanan xnikgonit (Job 1:18-20). Chatum makatsinina tiku «kxtitnit xlhakgat» wanilh xapuxku sacerdote Elí pi xkatlajakanit israelitas kʼguerra, chatiy xlakgkgawasan xnikgonit chu xtalamakgasitsin xlinkgonit caja xla talakkaxlan (1 Sam. 4:12-17). Chu Josías «xtitli xlhakgat» akxni kgaxmatli tuku xwan libro xla tamapakgsin chu katsilh tuku nitlan xtlawanit kachikin (2 Rey. 22:8-13).

Akxni xputsananimaka Jesús, xapuxku sacerdote Caifás «xtitli xtalhakgan» akxni kgaxmatli xtachuwin Jesús, nema akxilhli la taʼakgsanin kxlakatin Dios (Mat. 26:59-66). Pulaktum tuku xmasiyakgo rabinos xwan pi putum tiku xkgaxmatkgolh akgtum nitlan tachuwin nema xwanika Dios, xtalakaskin kxtitli xlhakgat. Pero, atanu tuku xmasiyakgo rabinos, nema kilhtsukulh akxni xlakxtlawakanita templo xla Jerusalén, xwan: «La uku tiku kgaxmatnit pi wanimaka Dios tuku nitlan ni talakaskin naxtita xlhakgat, komo chuna natlawa, putum xataxtitni nawan xlhakgat».

Xlikana, Jehová kajwatiya tlan xakxilha uma komo lataman tiku chuna xtlawa xlikana nitlan xlimakgkatsi. Wa xlakata Jehová wanilh xkachikin: «Kalakxtittit minakujkan, chu ni kalakxtittit milhakgatkan; chu kalakgtaspittit [...] miDioskan» (Joel 2:13).