BAIBEL i stori long ol samting i kamap na man i brukim klos bilong em yet. Ating dispela pasin i narapela kain long yumi ol lain bilong nau. Tasol namel long ol Juda, dispela pasin i makim olsem bel i bagarap tru long bikpela hevi i painim man, o em i bel sori, kisim bikpela sem, o bel kros, o krai sori long man i dai.

Tingim Ruben. Em i laik seivim brata bilong em Josep, tasol plen bilong em i no wok bikos ol brata bilong em i salim Josep olsem wokboi nating long narapela lain, olsem na em i “brukim klos bilong en.” Papa bilong ol, Jekop, i ting olsem wel animal i kilim na kaikai pikinini bilong em Josep, olsem na Jekop i “brukim klos bilong en.” (Stt. 37:​18-35) Jop i “brukim klos bilong en” taim em i harim olsem olgeta pikinini bilong em i dai. (Jop 1:​18-20) Man bilong bringim tok i “brukim klos bilong en” na em i kam kamap long Hetpris Eli bilong toksave long em olsem ol Israel i lus long pait, na 2-pela pikinini man bilong em i dai, na ol birua i kisim bokis kontrak i go. (1 Sml. 4:​12-17) Taim Josaia i harim ol tok bilong Lo, em i luksave long ol rong em lain manmeri bilong em i bin mekim, na em i “brukim klos bilong en.”​—2 Kin. 22:​8-13.

Long kot bilong Jisas, Hetpris Kaiafas i “brukim klos bilong em” taim em i no skelim stret tok em i harim, na em i sutim tok olsem Jisas i tok bilas long God. (Mat. 26:​59-66) Wanpela lo em ol tisa bilong lotu i kamapim i tok, sapos man i harim narapela i tok bilas long nem bilong God, orait em i mas brukim klos bilong em yet. Tasol bihain long tempel bilong Jerusalem i bagarap, ol tisa bilong lotu i kamapim narapela tingting olsem, “long nau sapos man i harim narapela i tok bilas long Nem Bilong God, orait em i no gat wok long brukim klos bilong em, nogut em i werim ol klos i bruk bruk.”

Tasol sapos man i no bel hevi, orait pasin bilong brukim klos i samting nating long ai bilong God. Olsem na Jehova i tokim lain bilong em: “‘Maski long brukim nating ol klos bilong yupela, bilong makim sori bilong yupela. Long bel bilong yupela yet yupela i mas sori tru long ol sin bilong yupela.’ Yupela i mas kam bek long God.”​—Jol. 2:13.