DAMU nga asoy ha Kasuratan an nagsusumat nga may mga tawo nga naggisi han ira mga panapton. Para ha mga tawo yana, ito nga buhat bangin tagdon nga diri normal, kondi para ha mga Judio usa ito nga kapahayagan han ira duro nga emosyon tungod han kawaray-paglaom, duro nga kabido, kaarawdan, kasina, o pagtaguminatay.

Pananglitan, han hinbaroan ni Ruben nga napakyas an iya plano nga talwason an iya bugto nga hi Jose tungod kay iginbaligya na ito ha pagkauripon, ‘gin-gisi niya an iya panapton.’ Han kahuna han ira tatay nga hi Jacob nga ginkurukulsi hi Jose hin ihalas nga mananap, ‘ginriknit niya an iya panapton.’ (Gen. 37:18-35) ‘Gin-gisi ni Job an iya bisti’ han ginsumatan hiya nga namatay an ngatanan niya nga anak. (Job 1:18-20) Usa nga mensahero nga ‘gisi an panapton’ an kumadto ha Hitaas nga Saserdote nga hi Eli basi sumatan ito nga an mga Israelita napirde ha girra, namatay an duha nga anak nga lalaki hito, ngan gindara han mga kaaway an arka han kauyonan. (1 Sam. 4:12-17) Han ginbasa kan Josia an mga pulong han Balaud ngan nasantop niya an mga sala han iya katawohan, “iya gin-gisi an iya mga panapton.”—2 Hadi 22:8-13.

Han ginbibista hi Jesus, an Hitaas nga Saserdote nga hi Caifas ‘naggisi han iya pantungbaw nga panapton’ han hinbatian niya an ginsiring ni Jesus nga para ha iya usa nga pagpasipara. (Mat. 26:59-66) Sumala ha usa nga rabiniko nga tradisyon, kinahanglan gision an panapton han bisan hin-o nga makabati hin pagpasipara ha ngaran ha Dios. Kondi katapos mabungkag an templo ha Jerusalem, gintoohan han mga rabi nga “diri na kinahanglan gision han bisan hin-o nga makabati hin pagpasipara ha Ngaran han Dios kay kon iya ito bubuhaton, magigin trapo an iya panapton.”

Syempre, an pag-gisi han usa ha iya panapton waray pulos ha Dios kon diri sinsero an iya pagbasol. Salit ginsidngan ni Jehova an iya katawohan nga ‘gisia an iyo kasingkasing, ngan diri an iyo mga panapton, ngan balik ha akon.’—Joel 2:13.