HƐ MI MUNYU | ANƐ NƆ KO MA NYƐ MAA LE NƆ́ NƐ MAA BA HWƆƆ SE LO?
Ekomɛ Ba Mi, Se Fuu Bɛ Mi
Anɛ o suɔ kaa o maa le bɔ nɛ o si himi ma ji ha hwɔɔ se lo? Nihi fuu suɔ kaa a maa le níhi nɛ maa ba hwɔɔ se. Nihi babauu gba níhi nɛ maa ba hwɔɔ se ɔ kɛ fɔ si. Ekomɛ ba mi, nɛ ekomɛ hu bɛ mi. Mo ha nɛ wa susu gbami nɛ ɔmɛ ekomɛ a he nɛ waa hyɛ:
-
JE MI SI KPALI ngɔɔ klama slɔɔtoslɔɔtohi kɛ tsuɔ ní nɛ a puɛɔ sika fuu kɛ tsɔɔ níhi nɛ maa ba hwɔɔ se. A tsɔɔ bɔ nɛ je ɔ mi mu nɛ nihi ngɛ woe ɔ maa ye je ɔ awi ha, kɛ be nɛ hiɔmi maa nɛ aloo e be nɛe.
-
NÍHI A MI HLALI tsɔɔ níhi nɛ maa ba hwɔɔ se ngɛ jua yemi kɛ ma kudɔmi mi. Ke a ngɛ niatsɛmɛ kpanakpanaahi nɛ a ngɛ je ɔ mi ɔ a ta woe ɔ, Warren Buffett hu piɛ a he. E le ní tsumihi nɛ ke nɔ ko kɛ e sika womi ɔ, nɔ ɔ be si gbee gblee. Nate Silver hu ji níhi a mi hlalɔ. E tsɔɔ níhi nɛ maa ya nɔ ngɛ U.S. ma kudɔmi sanehi a mi, kɛ nihi nɛ a ma ná ayekoo ní ngɛ Hollywood sini peemi ɔ mi.
-
BLEMA NÍ komɛ hu ngɛ nɛ nihi tsɔɔ kaa a ji gbamihi. Nyumu ko nɛ e biɛ ji Michel de Notredame (Nostradamus) ɔ ngma munyu ko nɛ a nɛ e yi kɛ e nane, ngɛ jeha 1550 ɔmɛ a mi. Ni komɛ tsɔɔ kaa munyu nɛ ɔ ngɛ mi bae mwɔnɛ ɔ. Nihi tsɔɔ kaa Maya bi a kalenda a tsɔɔ kaa oslaa nguanguahi maa ba je ɔ mi ngɛ December 21, 2012 ɔ mi.
-
JAMI NYA DALI hu tsɔɔ kaa haomi komɛ maa ba je ɔ mi. A peeɔ jã kɛ bɔɔ nihi kɔkɔ, nɛ a kɛ buaa nihi a nya kɛ nyɛɛɔ a se. Nɔ ko nɛ e tsɔɔ kaa e le be nɛ nyagbe ɔ maa ba, nɛ a tsɛɛ lɛ ke Harold Camping ɔ kɛ e kaseli de nɛ nihi fuu nu kaa a ma kpata je ɔ hɛ mi ngɛ jeha 2011 ɔ mi. Se loloolo ɔ, je ɔ ngɛ kɛ ba si piɔ.
-
NIHI NƐ A KƐ MUMIHI TSUƆ NÍ Ɔ tsɔɔ kaa a ngɛ he wami ko nɛ yeɔ bua mɛ nɛ a kɛ leɔ níhi nɛ maa ba hwɔɔ se. Edgar Cayce kɛ Jeane Dixon tsuo tsɔɔ ní komɛ nɛ maa ba ngɛ jeha 1900 ɔ mi, nɛ jamɛ a ní ɔmɛ ba mi. A tsɔɔ níhi fuu nɛ maa ba mi, se a bɛ mi fɛɛ. Kaa nɔ hyɛmi nɔ́ ɔ, Dixon gba kɛ fɔ si kaa Je Mi Ta Etɛne ma fɛ ngɛ jeha 1958 ɔ mi. Cayce hu gba kɛ fɔ si kaa wo ɔ ma je New York ma a ngɛ jeha 1975 ɔ mi.
Anɛ blɔ pɔtɛɛ ko ngɛ nɛ wa ma nyɛ maa gu nɔ kɛ le nɔ́ tutuutu nɛ maa ba hwɔɔ se lo? Sane bimi nɛ ɔ he hia, ejakaa ke o le níhi nɛ maa ba hwɔɔ se ɔ, o maa le bɔ nɛ o maa pee o ní ha.
