SANEYITSO LƐ MLITSƆƆMƆ | Ani Mɔ ko Baanyɛ Ale Wɔsɛɛ?
Ekomɛi Eba Mli, shi Pii Baaa Mli
Ani obaasumɔ ni ole bɔ ni oshihilɛ baaji wɔsɛɛ? Mɛi pii sumɔɔ ni amɛle. Mɛi babaoo yɛ ni tsɔɔ nibii ni baaba wɔsɛɛ; ekomɛi baa mli, shi pii baaa mli. Susumɔ saji ni nyiɛ sɛɛ nɛɛ ahe:
JEŊ SHIKPALƆI kɛ tsɔji ni yɔɔ hwanyaŋŋ tsuɔ nii ni amɛfiteɔ shika babaoo ni amɛkɛtsɔɔ nibii komɛi ni baanyɛ aba wɔsɛɛ. Nibii nɛɛ ekomɛi ji, bɔ ni shikpɔŋ lɛ nɔ muji ni awoɔ lɛ baasa enɔ shihilɛ he ahã, kɛ kɛji wɔ lɛ nugbɔ baanɛ yɛ okutso lɛ mli loo enɛŋ.
NIIAMLIPƐILƆI NI HE ESA WAA nyɛɔ amɛtsɔɔ bɔ ni jarayeli kɛ maŋkwramɔŋ saji baaya lɛ ahã. Mɛi komɛi tsɛɔ Warren Buffett, ni ji niiatsɛmɛi kpanai ni yɔɔ je lɛ mli lɛ ateŋ mɔ kome lɛ gbalɔ, ejaakɛ kɛ́ etsɔɔ bɔ ni jarayeli gbɛjianɔtoi baaya nɔ ahã lɛ ebaa mli pɛpɛɛpɛ. Niiamlipɛilɔ kroko ni atsɛɔ lɛ Nate Silver lɛ ekwɛ akɔntaabui amli koni no aye abua lɛ ni enyɛ etsɔɔ bɔ ni nɔ fɛɛ nɔ baaya nɔ ahã. Enyɛ etsɔɔ bɔ ni U.S. maŋkwramɔŋ saji baaya lɛ ahã kɛ mɔ ni baaná juromɔnɔ yɛ Hollywood sinifeemɔ lɛ mli.
BLEMA SAJI yɛ ni mɛi komɛi tsɔɔ akɛ gbalɛi ni. Mɛi komɛi kɛɛ nibii ni bɛ faŋŋ ni Michel de Notredame (Nostradamus), ni hi shi yɛ afi 1500 afii lɛ amli lɛ, ŋmala lɛ miiba mli ŋmɛnɛ. Mɛi komɛi hu kɛɛ Mayabii lɛ abebuu ko ni ba naagbee December 21, 2012 lɛ, ji okadi ni tsɔɔ akɛ jeŋ shihilɛ baafite kwraa.
JAMƆŊ HIƐNYIƐLƆI gbaa akɛ nibii komɛi ni yɔɔ ahuntoo baaba jeŋ fɛɛ, ni bei komɛi lɛ amɛfeɔ nakai ní amɛkɛbɔ mɛi akɔkɔ ní amɛná sɛɛnyiɛlɔi babaoo. Nuu ko ni atsɛɔ lɛ Harold Camping, ni kɛɛ ebaanyɛ etsɔɔ be ni je lɛ baaba naagbee lɛ, kɛ esɛɛnyiɛlɔi tswa adafi yɛ hei pii akɛ abaafite je lɛ yɛ afi 2011 mli. Shi kɛbashi ŋmɛnɛ lɛ, je lɛ yɛ lolo.
NINALƆI kɛɛ amɛyɛ nyɛmɔi krɛdɛi ni hãa amɛnyɛɔ amɛgbaa nɔ ni baaba wɔsɛɛ. Edgar Cayce kɛ Jeane Dixon fɛɛ gba nibii komɛi ni baaya nɔ yɛ afi 1900 afii lɛ amli ni eba mli nakai pɛpɛɛpɛ. Shi amɛgbalɛi lɛ pii hu eyabaaa mli. Akɛ nɔkwɛmɔnɔ lɛ, Dixon gba akɛ yɛ afi 1958 mli lɛ, Jeŋ Ta III baafɛ, ni Cayce hu gba akɛ yɛ afi 1974 kɛmɔ 1976 mli lɛ, New York maŋ lɛ baanyɔ ŋshɔ lɛ mli.
Ani gbɛ ko yɛ lɛɛlɛŋ ni abaanyɛ akɛ hiɛ afɔ̃ nɔ akɛ no nɔ abaatsɔ ale nɔ ni baaba wɔsɛɛ? Sanebimɔ nɛɛ he miihia, ejaakɛ kɛ́ ole wɔsɛɛ lɛ, ebaanyɛ esa oshihilɛ kɛ bɔ ni okpɛɔ oyiŋ ohãa lɛ he.
