¿Pütüjawee aaʼu kaseerüin alatüin mapeena? Wainma na atüjaweekana saaʼu tia. Makalaka wainmain wayuu achajaaka sukuwaʼipa süpüla natüjaain saaʼu tü kasa alatüinjatkat mapeena. Eeshii na ajatakana tia otta na oʼtchejaakana sümaa.

• NA ATÜJÜSHIIKANA MAʼIN: Wainma nneerü oʼunaka natuma sünain nachajaain sukuwaʼipa süpüla natüjaain saaʼu tü alatajatkat mapa otta müsia tü kasa eejeetkat sünainjee sumojujunüin tü Mmakat. Wainma maakina namaʼanaka süpüla naainjüinjatüin tia.

• NA EKIRAJAAKANA SÜCHIIRUA SUKUWAʼIPA POLIITIKA OTTA NNEERÜ: Wayuukana naainnua atüjüshii süpüleerua natüjaain saaʼu tü kasa naainjeetkat na poliitikokana otta tü naainjeetkat na wayuukana süka nanneetse. Warren Buffett, nia wanee wayuu washirü maʼin. Pülashi maʼin nia naashin na wayuukana süka nütüjaain saaʼu kaseerüin aapüin maʼin nneerü namüin na wayuukana. Nate Silver, atüjüshi maʼin süpüleerua nütüjaainjatüin saaʼu waneeirua kasa alatajatka maʼaka saaʼin nanülia na akanajüinjanakana sünain poliitika otta cine.

• WANEEIRUA KARALOUKTA SÜMAIWAJATÜ: Tü pütchi ashajünakat suluʼu tia karalouktakalüirua, ashajuushi shia süpüla shikeraajüinjatüin naashin na wayuukana. Michel de Notredame, nüshajüin wanee karaloukta soʼutpünaa juyaka 1500. Maaʼulu yaa, wainma wayuu anoujaka sünain shikeraajüin maaʼulu tü nüshajakat paala. Naashin na maayakana ajaʼttajatü tü Mmakat soʼu tisienpüroʼu 21, 2012 otta wainma wayuu anoujaka sünain tia.

• NOʼUTKU NA SHIKIIPÜʼÜKANA IKÜLEESIA: Naashin wayuukana naainnua, ajaʼttajatü tü Mmakat. Naküjüin tia shiiʼiree neimmolojuin wayuu süpüla sunoujüinjatüin. Nüküja achikirü Harold Camping namaa na nümaajanakana sajaʼttajatüin tü Mmakat soʼu 2011. Watüjaaitpa aaʼu nnojoluin shikeraajüin tü nümakat.

• NA PSÍQUICO MÜNAKANA: Naashin wayuukana naainnua, natüjaa aaʼu tü kasa alateetkat mapeena. Edgar Cayce otta Jeane Dixon, naküja achikirü waneeirua kasa alatüinjatka soʼutpünaa juyaka 1900. Eesü tü ekeraajakat, shiasaʼa müin wainmain tü nnojotkat ekeraajüin. Naashin Dixon, eeinjatü wanee Tercera Guerra Mundial soʼu juyaka 1958. Naashin Cayce, shimiralüinjatü tü palaakat Nueva York soʼutpünaa juyaka 1970.

¿Eesüchejeʼeya süpüla watüjaain saaʼu tü kasa alateetkat mapeena? Watüjaalejeʼe saaʼu tü kasa alateetkat mapeena, eejüsüjeʼe waaʼin süpüla.