KUKWE TÄRÄ KWATABÄTÄ: ¿DRE RABAI BARE JA KÄNENKÄRE YE NIRE RABA MIKE GARE?
Ruäre namanina bare, akwa keta kabre abokän ñaka nemen bare metre
¿Dre rabai bare ja känenkäre ye mä törba gai? Nitre kwati tö mikai gare jai. Ye medenbätä dre rabai bare ja känenkäre yebätä nitre kwati nemen kukwe mike gare, ruäre nemen bare akwa ruäre abokän ñaka nemen bare metre. Ñodre:
-
NITRE JA TÖTIKAKA KRIKRI tätre ngwian kitekä krubäte aune tätre jondron kwin keta kabrebiti kukwe mike gare, ñodre, dre köböite Kä tibien juanta ngwarbe, kä rabai ño jetebe, aune kukwe mada mada mikata gare kwetre.
-
NITRE ANALISTA TÖBÄTÄ tätre gobrantre kukwei aune ngwian yebätä kukwe mike gare. Warren Buffett, ni jondron bökäne krubäte, ie Ni Kukwe Mikaka Gare nieta ñobätä ñan aune sribi medenbiti nitre raba nemen jondron bökäne ye tä mike gare metre känenkri. Analista mada kädekata Nate Silver, nemen kukwe ruärebiti kukwe keta kabre mike gare, ñodre, nemen gobrantre kukwei aune película grabata ye meden kräke premio biain ye mike gare.
-
KUKWE RUÄRE TIKANI KIRABE ye abokän kukwe rabai bare mikani gare nieta. Ñodre, nitre kwati tä nütüre Michel de Notredame (Nostradamus), kukwe tikani siklo XVI yete, ye tä nemen bare kä nengwane. Calendario nitre mayakwe ye krütadre köbö 21 diciembre 2012 yete niebare, yebätä nitre kwati namani nütüre kukwe tare rabai bare köbö yete.
-
NITRE KWATI JI NGWANKA IGLESIATE yekwe kukwe tare rabai bare kä jökräbiti tibien ye mikanina gare nitre mikakäre mokre aune nitre töi mikakäre näin jabe. Catastrofista Harold Camping ni kukwe mikaka gare aune nitre nänkä ben yekwe mikani gare kä jökräbiti tibien kä 2011 yete Kä tibien gaite. Akwa ñaka namani bare ye erere.
-
NITRE PSÍQUICO tätre niere, niaratre töbätä krubäte kukwe rakadrekä ja känenkäre ye mikakäre gare. Kukwe rabadre bare siklo XX yete, ye Edgar Cayce aune Jeane Dixon mikani gare metre ruäre, akwa kukwe niebare kwetre ye keta kabre ñaka namani bare metre. Ñodre, Dixon niebare kä 1958 yete Rü kri Ketamäkäre ye kömikadre, aune Cayce niebare kä 70 ye ngwane Nueva York ye rikadre ñöte.
¿Kukwe rabai bare ja känenkäre ye raba nemen gare ño metre nie? Nikwe kukwe ye ngwandretari jai ye ütiäte. Dre rakaikä ja känenkäre ye känenkri rabadre gare nie angwane, nikwe nünandre jene, ¿ñan ererea?
