Kayatmo kadi a maammuan ti masakbayam? Adu ti mayat a mangammo iti masakbayanda. Adu ti mangipadpadto iti mapasamak iti masanguanan ngem nagduduma ti resultana. Usigem ti sumaganad:

• DAGITI SIENTISTA agusarda iti moderno nga alikamen ken adu a kuarta tapno maammuanda ti mapasamak iti masanguanan, kas iti pannakadadael ti daga gapu iti polusion ken no agtudo iti lugaryo inton bigat.

• DAGITI PROPESIONAL NGA ANALISTA ibagada ti mapasamak iti negosio ken politika. Ni Warren Buffett, maysa a kabaknangan a negosiante iti intero a lubong, maibagana ti mapasamak iti negosio, isu nga inawaganda kas maysa a propeta. Ni Nate Silver a sabali pay nga analista, inadalna ti adu nga impormasion tapno maibagana ti mapasamak iti politika iti U.S. agingga kadagiti Hollywood film award.

• DAGITI NAGKAUNA A REPERENSIA imbilangda kas padto. Impapan ti dadduma a natungpal iti kaaldawantayo ti di nalawag nga insurat ni Michel de Notredame (Nostradamus) a nagbiag idi maika-16 a siglo. Ti kalendario dagiti Maya a nagpatingga idi Disiembre 21, 2012 ket impapan ti dadduma a pangrugian dagiti nakaam-amak a pasamak.

• DAGITI LIDER TI RELIHION ipadtoda no dadduma ti nakaam-amak a mapasamak tapno pakdaaranda dagiti tattao ken tapno umadu dagiti pasurotda. Ti mangipadpadto iti pannakadadael ti lubong a ni Harold Camping ken dagiti pasurotna, inwaragawagda a madadael ti daga inton 2011, ngem saan a napasamak dayta.

• DAGITI PSYCHIC ibagbagada a kabaelanda nga ipadles ti mapasamak iti masanguanan. Natungpal ti dadduma nga impadles da Edgar Cayce ken Jeane Dixon a mapasamak iti maika-20 a siglo. Ngem adu ti saan a natungpal. Kas pagarigan, impadles ni Dixon a bumtak ti Gubat Sangalubongan III idi 1958, ken impadles ni Cayce a lumned ti New York iti taaw idi katengngaan ti dekada ‘70.

Adda kadi mapagtalkan a pamay-an tapno maammuan ti mapasamak iti masanguanan? Napateg nga isaludsod dayta ta no ammom ti mapasamak iti masanguanan, mabalin nga apektaran dayta ti biagmo.