DISOLO YINA KELE NA LUTITI YA ZULU | KETI MUNTU LENDA ZABA MAMBU YINA KE KWISA NA NTWALA?
Mambu ya Nkaka Ke Lunganaka Kansi Mingi Ke Lunganaka Ve
Keti nge ta zola kuzaba luzingu na nge na bilumbu yina ke kwisa? Dibanza yai ke bendaka dikebi ya bantu mingi. Bantu mingi ke tubaka mambu ya ta salama na bilumbu yina ke kwisa, kansi mambu yango ke salamaka ve ntangu yonso mutindu yina. Beto tadila bambandu yai ya ke landa:
BANTU YA SIANSI ke sadilaka bamashini ya ngolo-ngolo mpi mbongo mingi sambu na kuzaba mambu mingi ya ta salama na bilumbu yina ke kwisa, mu mbandu, kuzaba mutindu ntoto ta beba to kana mvula ta noka mbasi na kisika yina nge ke zingaka.
BANTU YA ME LONGUKAKA MINGI ke tubaka na ntwala mutindu mambu ya me tala mumbongo mpi politiki ta vanda na bilumbu yina ke kwisa. Warren Buffett, mvwama mosi na kati ya bantu yina kele na mbongo mingi na nsi-ntoto ke tubaka na siki-siki yonso mutindu mambu ya mumbongo ta vanda na bilumbu yina ke kwisa mpi bantu ya nkaka ke bingaka yandi profete. Nate Silver, muntu ya nkaka ya mayele, ke sadilaka barapore sambu na kutuba na ntwala mambu ya me tala politiki ya Amerika mpi matabisi yina Hollywood ta pesa bantu yina me sala bafilme ya kitoko.
MIKANDA YA NTAMA bantu ke monaka mikanda ya ntama bonso bambikudulu. Bubu yai, bantu ya nkaka ke monaka kulungana ya mambu yina mikanda ya Michel de Notredame (Nostradamus) sonikaka na mvu-nkama ya 16 yina bantu bakisaka ve pwelele. Kalandrie ya bantu ya Maya yina sukaka na Desembri 21, 2012 vandaka kutubila bisumbula ya nene yina bantu ya nkaka monaka nde yo ta salama na bilumbu yina ke kwisa.
BANTWADISI YA MABUNDU ke tubaka bantangu ya nkaka na ntwala mambu yina ta salama na ntoto ya mvimba sambu na kukebisa bantu mpi kubenda bo na mabundu na bo. Profete Harold Camping mpi balongoki na yandi mwangaka nsangu na ntoto ya mvimba nde ntoto zolaka kufwa na 2011. Kansi tii bubu yai ntoto me fwaka ve.
BANGANGA-NKISI ke tubaka nde bo kele ti makuki ya sipesiali ya kutuba na ntwala mambu yina ta salama na bilumbu yina ke kwisa. Edgar Cayce mpi Jeane Dixon tubaka na ntwala mambu yina zolaka kusalama na mvu-nkama ya 20; mambu ya nkaka lunganaka kansi mingi lunganaka ve. Mu mbandu, Dixon tubaka na ntwala nde Mvita ya Tatu ya Nsi-Ntoto ya Mvimba zolaka kusalama na 1958 mpi Cayce tubaka na ntwala nde mbanza New York zolaka kudinda na nzadi-mungwa na 1975.
Keti mpila ya mbote kele ya kuzaba mambu yina ta salama na bilumbu yina ke kwisa? Ngiufula yai kele mfunu mingi. Kana nge vandaka ti makuki ya kuzaba mambu ya ta salama na bilumbu yina ke kwisa, yo zolaka kuvanda ti bupusi na luzingu na nge.
