DI TƆPIK NA DI FRƆNT PEJ | ƐNIBƆDI DE WE NO AW TUMARA BAMBAY GO TAN LƐK?
Sɔm Kin Apin, bɔt Bɔku Nɔ Kin Apin
Yu go lɛk fɔ no bɔt yu tumara bambay? Plɛnti pipul kin want fɔ no. Bɔku pipul dɛn kin tɔk bɔt tin dɛn we gɛt fɔ apin. Sɔntɛnde, wetin dɛn kin tɔk, kin bi bɔt bɔku tɛm, i nɔ kin bi. Fɔ ɛgzampul:
-
SAYƐNSMAN DƐN kin yuz pawaful mashin dɛn ɛn dɛn kin spɛnd bɔku bɔku mɔni fɔ tɔk bɔt difrɛn tin dɛn we gɛt fɔ apin. Tin dɛn lɛk, aw dɛn blak blak smok we kin kɔmɔt pan motoka ɛn insay bɔku faktri dɛn, go ambɔg mɔtalman. Ɛn dɛn kin yuz dɛn mashin ya bak fɔ no if ren go kam tumara na di say we yu de.
-
MASTA SABI BUKMAN DƐN WE KIN TEK TƐM FƆ STƆDI BƆT SƆNTIN kin tɔk bɔt aw biznɛs ɛn pɔlitiks go tan lɛk tumara bambay. Wan big biznɛsman we nem Wɔrɛn Bɛfɛt, we na wan pan di pipul dɛn we gɛt mɔni pas ɔlman na di wɔl, dɔn ebul fɔ sho aw biznɛs go rili tan lɛk. Bikɔs i kin ebul fɔ du dis, sɔm pipul dɛn kin kɔl am prɔfɛt. Wan ɔda man we nem Neit Silva, we kin sho aw bɔku tin dɛn go apin, kin tɔk bɔt aw di pɔlitiks na Amɛrika go tan lɛk, ɛn i kin ivin tɔk bɔt di wan dɛn we go gɛt prayz na Oliwud.
-
SƆM TIN DƐN WE DƐN BIN DƆN RAYT FƆS FƆSTƐM dɔn kam fɔ bi tin dɛn we pipul dɛn biliv se de apin tide. Fɔ ɛgzampul, insay dɛn 1500, wan man we nem Mishɛl de Nɔtradam bin rayt sɔntin we nɔ bin klia. Sɔm pipul dɛn se wetin dis man bin rayt de apin naw na wi yon tɛm. Wan kalɛnda we di Maya pipul dɛn bin de yuz, bin dɔn Disɛmba 21, 2012. So sɔm pipul dɛn bin se dis na sayn we de sho se bad bad tin dɛn gɛt fɔ apin.
-
DI BIGMAN DƐN PAN GƆD BIZNƐS kin tɔk se bad bad tin dɛn gɛt fɔ apin ɔlsay na di wɔl. Dɛn kin tɔk dis fɔ wɔn pipul dɛn ɛn fɔ mek dɛn gɛt bɔku pipul dɛn we go fala dɛn. Wan bigman pan Gɔd biznɛs we dɛn kɔl Arɔld Kampin ɛn di wan dɛn we de fala am, bin de tɔk ɔlsay na di wɔl se di wɔl go dɔn insay 2011. Bɔt dat nɔ bin bi, di wɔl stil de.
-
PIPUL DƐN WE KIN SE DƐN NO TIN DƐN WE ƆDINARI PƆSIN NƆ NO kin mek mɔt se dɛn sabi wetin gɛt fɔ apin tumara bambay. Wan man we nem Ɛdga Kesi ɛn wan uman we nem Jini Diksin bin tɔk bɔt sɔm tin dɛn we bin kam fɔ bi tru insay dɛn 1900. Bɔt dɛn ɔl tu bin tɔk bɔt bɔku tin dɛn we nɔ bin apin. Fɔ ɛgzampul, Jini Diksin bin tɔk se Wɔl Wɔ Tri go apin insay 1958, ɛn Kesi in bin tɔk se Nyu Yɔk go sink na di si insay dɛn 1970.
Yu tink se ɛnibɔdi de we go ebul tɛl wi di tru tin bɔt tumara bambay? Dis kwɛstyɔn rili impɔtant. Bikɔs if yu bin ebul fɔ no bɔt di tin dɛn we gɛt fɔ apin, dat go ɛp yu fɔ no aw yu go liv yu layf.
