Abantu abanengi bayafuna ukwazi ukuthi ikusasa labo lizabe linjani. Kanti njalo abanengi bandise ukukhuluma ngezehlakalo ezizakwenzakala njalo ezinye ziyenzakala kodwa ezinengi azenzakali. Ngokwesibonelo:

• ABEZESAYENSI basebenzisa imitshina ephucukileyo kanye lezimali ezinengi ukuze bakhulume ngezinto abacabanga ukuthi zizakwenzakala, ngokwesibonelo eziphathelane lokuna kwezulu kanye lokuthi ukungcoliswa komhlaba kuzacina kuwuphambanise njani.

• IZINGCITSHI KWEZOKUCUBUNGULA zihlala zikhuluma ngokuzakwenzakala kwezamabhizimusi lakwezombusazwe. UWarren Buffett, ongomunye wabantu abanothe kakhulu emhlabeni usebizwa ngokuthi ngumphrofethi ngenxa yokuthi ukhuluma okuyikho sibili mayelana lokuthi izinto ziyabe zimi njani kwezamabhizimusi. Omunye umcubunguli okuthiwa nguNate Silver ukhangela izenzakalo ezimnceda ukuthi enelise ukutsho loba kuyini okuzakwenzakala kwezombusazwe e-U.S.A., kanye lokuthi ngobani abazathola izicoco kumafilimu eHollywood.

• OKWABHALWA KUDALA sekuthathwa njengeziphrofetho. Abanye bacabanga ukuthi izinto abazibona kulezinsuku zigcwalisa amazwi angazwisisekiyo abhalwa kudala nguMichel de Notredame (Nostradamus) ngekhulu lesi-16. Abanye bachaza ukuthi iminyaka yekhalenda okuthiwa yiMaya eyayicina ngoDecember 21, 2012 yayizakuba yisibonakaliso sezenzakalo eziyingozi.

• ABAKHOKHELI BAMASONTO kwezinye izikhathi bakhuluma ngezehlakalo ezizakwenzakala emhlabeni wonke ukuze baxwayise abantu futhi babadonsele emasontweni abo. Umphrofethi uHarold Camping kanye labalandeli bakhe bamemezela ezindaweni ezinengi ukuthi umhlaba wawuzaphela ngo-2011. Kodwa okumangalisayo yikuthi ulokhu ukhona lalamuhla.

• IZANGOMA zithi zona zilobuciko bokukhuluma ngokuzakwenzakala kusasa. U-Edgar Cayce kanye loJeane Dixon bakhuluma ngezehlakalo eziphathelane lekhulu lesi-​20, futhi abakukhulumayo kwenzakala sibili. Kodwa kunengi abakukhulumayo okungazange kwenzakale. Ngokwesibonelo, uDixon wakhuluma ngokuthi kwakuzakuba leMpi Yomhlaba Wonke Yesithathu ngo-1958, ikanti uCayce wakhuluma ngokuthi idolobho leNew York lalizatshona olwandle ngabo-1970.

Ikhona yini indlela sibili esingathola ngayo iqiniso mayelana lekusasa? Lo ngumbuzo okumele sithole impendulo yawo sibili. Nxa ungenelisa ukwazi ukuthi kuzabe kunjani kwelizayo, impilo yakho ingaba ngcono kakhulu.