Ke men ese dahme pahn wiawiong uhk ahnsou kohkohdo? Met wia ire ehu me me tohto kin men ese. Mie aramas tohto me kohpada dahme pahn wiawi ahnsou kohkohdo, ahpw imwilahn kokohp pwukat kin wekpeseng. Menlau tehk ire pwukat:

• SAINTIS KAN kin doadoahngki misihn de dipwisou kapw kan oh doadoahngkihla mwohni laud pwehn kasawihada soahng kan me duwehte saminlahn wasa kan ar pahn ekisekis kauwehla sampah oh ma e pahn keteu lakapw de soh.

• SOUN KASAWIH PALIEN PESINES OH POLITIK Emen ohl me adaneki Warren Buffett, me pil iang keieu kepwehpwe nan sampah, kin kasawihada soahng kan me pahn wiawi nan pesines me kin uhdahn pwung me kahrehda aramas akan kin kahdaneki ih soukohp men. Emen ohl me duwehte ih, Nate Silver, kawehwehda ripoht kan me pahn sewese ih en kohpada soahng koaros me pid palien politik nan Amerika lella pweida mwahu en kasdo kan en Hollywood.

• SOAHNG KAN ME DIEREK MAHS kin kawehwehdi nin duwen kokohp kei. Ekei aramas kin kilang pweidahn kokohp kan rahnwet nan nting kan en pahr 1555 me Michel de Notredame (Nostradamus) kohpada. Ekei ndahki me kalendar en mehn Maya ko me imwisekla nan December 21, 2012, kohpadahr duwen kahpwal laud kan me wiawi.

• KAUN EN PELIEN LAMALAM KAN ekei pak kin kohpada kahpwal laud kan sampah pwon pwehn wia mehn kataman ong tohn sampah oh pwehn kihpene me pahn idawehn irail. Emen ohl me dene ih soukohp en imwin sampah me adaneki Harold Camping oh nah tohnpadahk kan kin pakairkiseli me sampah pahn sohrala nan pahr 2011. Ahpw e sansal me sampah mihmihte.

• IRAIL ME DENE RE AHNEKI KOAHIEK TOHROHR EN WIA KOKOHP Edgar Cayce oh Jeane Dixon ira koaros kohpada ni pwung ekei mwekid me wiawi nan pahr 1900 samwa ko. Ahpw tohto en ara kokohp kan sohte pweida. Karasepe, Dixon kohpada me Mahwen Kesiluh en Sampah pahn wiawi nan pahr 1958, oh Cayce pil kohpada me New York pahn kihrla pahn sehd nan pahr 1970 samwa.

Ia duwe, mie ahl ehu me kitail kak likih pwe kitail en ese duwen ahnsou kohkohdo? Peidek wet konehng kitail en kalelapak. Ma ke kak esehda duwen mwekid kan me pahn wiawi ahnsou kohkohdo, e pahn kamwakid omw mour oh pilipil kan me ke pahn wiahda.