¿Iman hamuq tiempopi kanqa? ¿Yachayta munawaqchu? “Arí” nishankichá. Hamuq tiempomanta yachayta munasqanchisraykun imaymana willakuykuna rikhurimun.

• CIENTIFICOKUNA: Paykunaqa askha qolqetan gastanku, ancha allin maquinakunawantaqmi yanapachikunku kay pacha qhellichakusqanmanta imakuna kananta yachanankupaq, maypi parananta mana paranantapas.

• TANTEAQKUNA: Paykunan tanteanku mayqen político ganananta otaq ima negocio ruway allin kasqanta. Warren Buffett qhapaq runan allinta tantean negociokuna ruwaymanta, chaymi payta sutichanku “profeta” nispa. Nate Silver runapas imaymanata qhawarispan allinta tantean mayqen político ganananta, ima película ganananta, hukkunatapas.

• ÑAWPA QELQAKUNA: Wakinmi ninku: “Chay qelqakunapin tarikun hamuq tiempomanta willakuykuna”, nispa. Askha runakunan ninku Nostradamus sutiyoq runaq qelqasqan kay tiempopi hunt’akusqanta. Hinaspapas calendario maya nisqapin willarqan 2012 wata 21 diciembre killapi kay pacha chinkapunanta.

• RELIGIONKUNAPI UMALLIQKUNA: Paykunan willarqanku pachantinpi manchay ñak’ariykuna kananta, chaywantaqmi askha runakunata huñurqanku. Profeta Harold Camping runan qatikuqninkunawan willarqanku 2011 watapi kay hallp’a tukukapunanta, ichaqa yanqan karqan rimasqankuqa.

• WATUQKUNA: Paykunan ninku hamuq tiempopi imachus sucedenanta. Edgar Cayce, Jeane Dixon runakunaq willasqanku wakinña hunt’akurqan chaypas, askhan mana hunt’akurqanchu. Jeane Dixon runan willarqan 1958 watapi tercera guerra mundial kananta. Edgar Cayce runapas willarqanmi Nueva York llaqta 1970 watakunapi lamar-qochaman chinkaykapunanta.

¿Yachasunmanchu hamuq tiempopi imakuna kananta? Chayta yachayqa allinninchispaqmi kanman, ¿imarayku? Sichus yachasunman hamuq tiempopi imakuna kananta chayqa, chayman hinan imatapas ruwasunman.