CALLARI TEMA | JIPA PUNLLACUNAPI IMA PASANATACA ¿YACHAI USHANCHICHU?
Jipa punllacunapi ima pasanataca ¿yachai ushanchichu?
Ashtaca gentecunami jipa punllacunapi ima pasanata yachangapaj munanchi. Chaimandami ashtacacuna ima pasanata villan. Huaquin ejemplocunata ricupashun.
-
CIENTIFICOCUNACA jipa punllacunapi cai Alpa ima tucunata o ima hora tamianata yachangapaj nishpami mushuj, ali aparatocunapi ashtaca culquita gashtan.
-
ESTUDIASHCA GENTECUNACA politicapi, negociocunapi ima pasanatami nin. Warren Buffett shuti runaca charij charijmi can. Paica negociocunapi imashina llashaj culquita gananatami villan. Chaimandami gentecunaca ninanda paitaca alicachin. Cutin Nate Silver shuti runaca ima peliculacuna gananata, politicapi ima pasanatami villan.
-
PUNDA TIEMPO ESCRIBISHCACUNACA profeciacunami can ninmi. Chaimandami gentecunaca nin, 1500 huatapi Michel de Nostredame (Nostradamus) shuti runapa escribishca profeciaca cunanbimi pactarijun nishpa. Cutin maya nishca gentecunapa calendariopi ricushpami ashtacacunaca nin carca: 21 de diciembre de 2012tami cai mundoca tucuringa nishpa.
-
HUAQUIN CURACUNA, PASTORCUNACA gentecuna paicunata catichunmi, jatun llaquicunami tianga nin. Harold Camping shuti runapash paita catijcunapash nircami: Cai mundoca 2011tami tucuringa nishpa. Shinapash paicunaca pandarircami.
-
HUAQUINGUNACA JIPA PUNLLA IMA PASANATA YACHANGAPAMI PODERTA CHARINCHI NIN. Paicunapa tauca nishcacuna 1900 huatacunapi pactarijpipash ashtacatami pandarirca. Jeane Dixon shuti runaca 1958pimi Tercera Guerra Mundial tianga nirca. Cutin Edgar Cayce shuti runaca nircami, 1975 huatacunapimi Nueva York llactataca yacu tapashpa tucuchinga nishpa.
Shinaca ¿jipa punllacunapi ima pasanataca yachai ushanchichu? ¿Nachu jipa punllacunapi ima pasanata yachashpaca imatapash cambianchiman?
