MATAUPU AUTŪ | PE E MAFAI E SE TASI ONA VALOIA LE LUMANAʻI?
E Tele Valoaga ua lē Taulau
Pe e te fia iloa lou lumanaʻi? O se tasi lenā o mea e naunau tagata e fia iloa. E toʻatele ua latou faia ni valoaga, ma e eseese iʻuga ua maua mai ai. Mātau manatu o mulimuli mai:
-
SAIENITISI Ua latou faaaogāina masini faaonapōnei ma faaalu le tele o tupe ina ia valoia ai tulaga eseese, e pei o le aafiaga o le lalolagi ona o kasa oona, ma le tala o le tau i aso taʻitasi.
-
TAGATA ATAMAMAI I SUʻESUʻEGA Ua latou valoia ni suiga i faiga faapisinisi ma faiga faapolotiki. O Warren Buffet o se tagata mauʻoa na faaigoa e isi o se perofeta, ona o le saʻo o ana suʻesuʻega ma faamatalaga i suiga e oo iai faiga faapisinisi. O Nate Silver o se isi tagata suʻesuʻe e na te faaaogā fuainumera faamaumauina, e faia ai ni valoaga i suiga e oo iai le tele o mea, e pei o faiga faapolotiki i le Iunaite Setete, ma faailoga taualoa a tagata fai ata tifaga.
-
FAAMAUMAUGA MAI ANAMUA Ua manatu nisi i nei faamaumauga o ni valoaga. E iai tagata ua faapea mai ua taunuu i aso nei nisi o mea na iai i tusitusiga lavelave a Michel de Nostredame (Nostradamus) mai i le senituri lona 16. Na iloilo foʻi e nisi le kalena a tagata Maya lea na faaiʻuina iā Tesema 21, 2012, ma manatu ai o le a oo mai i lenā taimi ni suiga mataʻutia.
-
TAʻITAʻI LOTU E latou te folafola mai i nisi taimi ni iʻuga mataʻutia o le a oo i ai le lalolagi, ina ia lapataʻia ai tagata ma maua ai ni a latou ʻaulotu. O Harold Camping na faapea mai o ia o se perofeta e valoia le iʻuga o le lalolagi, ma na ia talaʻia ma lana ʻaulotu o le a faaumatia le lalolagi i le 2011. Peitaʻi, o loo iai pea le lalolagi i aso nei.
-
TAGATA VAVALO E latou te faapea mai e iai o latou mana e valoia ai le lumanaʻi. Na taulau nisi o tagata vavalo e pei o Edgar Cayce ma Jeane Dixon, i a la valoaga e uiga i nisi o mea e tutupu i le senituri lona 20. Peitaʻi na tele foʻi a la valoaga e leʻi taunuu. O se faataʻitaʻiga, na valoia e Jeane o le a gāpā le Taua Lona Tolu a le Lalolagi i le 1958, ae na valoia e Edgar o le a magoto le aai o Niu Ioka i le moana i le ogatotonu o le vaitausaga o le 1970.
Pe e iai se auala maufaatuatuaina e iloa ai le lumanaʻi? E tāua tele lenā fesili, auā o lou iloa o ni mea e uiga i le lumanaʻi o le a aafia ai le auala e faia ai au filifiliga i le olaga.
