Yu wani sabi fa yu libi o waka na ini a ten di e kon? Wan lo sma ben o wani sabi a sani dati. Furu sma e taki na fesi sortu sani o pasa, ma a no ala ten sani e waka soleki fa den taki. Luku den eksempre disi:

• SABIMAN e gebroiki kefalek sani nanga furu moni fu taki sortu sani o pasa. Den e taki na fesi fa sma o pori grontapu te fu kaba èn efu alen o fadon na ini a kontren fu yu tamara.

• ONDROSUKUMAN e taki na fesi fa sani o waka na ini bisnis èn na ini politiek. Sma e si Warren Buffett, wan fu den moro gudu sma na grontapu, leki wan man di man taki soifri fa sani o waka na ini bisnis. Nate Silver, wan tra ondrosukuman e luku difrenti sani fu man taki na fesi fa sani o waka na ini a politiek fu Amerkankondre, sortu Hollywood felem o wini wan prijs, èn fu tra sani sosrefi.

• OWRUTEN SANI di sma e si leki sani di e sori san o pasa. Son sma e bribi taki den sani di Michel de Notredame (Nostradamus) fu a di fu 16 yarihondro skrifi, e kon tru na ini a ten disi, aladi a no skrifi sani soifri. Soleki fa a Maya kalender e sori, dan wan spesrutu pisi ten kon na wan kaba tapu 21 december 2012. Son sma ben e bribi taki a sani disi e sori taki bigi rampu o pasa.

• KERKI FESIMAN e taki son leisi taki bun bigi rampu o pasa na heri grontapu. Den e du dati fu warskow sma èn fu feni bakaman. Harold Camping nanga den bakaman fu en, ben preiki na ala sei taki grontapu o kon na wan kaba na ini 2011. A de krin taki dati no pasa.

• LUKUMAN feni taki den abi spesrutu koni fu man taki san o pasa. Edgar Cayce nanga Jeane Dixon ben taki sortu sani ben o pasa na ini a di fu 20 yarihondro, èn den sani dati pasa tu. Ma den ben taki sani tu di no kon tru. Fu eksempre, Dixon ben taki dati a Di Fu Dri Grontapufeti ben o pasa na ini 1958, èn Cayce ben taki dati New York ben o sungu go na ini a se na a pisi ten fu 1975.

Wan fasi de fu kon sabi soifri san o pasa na ini a ten di e kon? Dati na wan bun aksi. Efu yu ben man si sani na fesi, dan yu libi ben o de heri tra fasi.