ITINEKWAGH I TAMEN | OR A FATYÔ U FAN KWAGH U KEN HEMENE?
Akaa a Ior Ve Tsengeôron Agen Er, Kpa Agen Kpishi Er Ga
U soo u fan mlu wou u ken hemene? Ior kpishi soo u fan. Ior kpishi ka ve tsengaôron akaa a ken hemen, kpa akaa shon a agen a er, agen di a er ga. Time ase sha akav a a dondo ne:
-
MBASAINSI ka ve vihi inyaregh kpishi shi ve er tom a akaa a wasen ve u tsengan ôron akaa a ken hemen kposo kposo, er mvihi u i lu vihin inya man ahumbe man mngerem la una va a zayol sha tar la nahan. Shi ka a lu u kper ura ua nôô hen ijiir you shin ua nôô ga kpa, ve fa.
-
MBATÔVON SHA AKAA ka ve tsengaôron er kpenga man pati una za yô. Orgen u i yer un ér Warren Buffett, u a lu môm ken mba hemban inyaregh sha tar cii la ka a fa kpenga u una er ve una gba ga yô, je mbagenev mba yer un ér profeti. Orgen u tôvon sha akaa, u i yer un ér Nate Silver yô, ka a gba kwar sha akaa a a vande eren yô, nahan i wase un u tsengan ôron hanma kwagh sha kwagh u patii u ken tar u Amerika, zan zan je kua uiyua mba a na mba ve eren fiim hen kômpeni u i yer ér Hollywood la kpaa.
-
NGEREN MBA TSEV ôr akaa a ior ve kaa ér ka akaaôron a profeti yô. Hii inyom i 1500 zan zan kighir inyom i 1599 la, orgen u i yilan un ér Michel de Notredame (Nostradamus) yô, nger akaa a cimin kpishi, a ior mbagenev ve nenge ér nga kuren nyian yô. Mbagenev yange ve kaa ér kalenda u i yer ér Maya, u yange bee sha iyange i Disemba 21, 2012 la tsenga tesen er tar ne ua va gbuusu yô.
-
MBAHEMENEV MBA KWAGHAÔNDO ka ve tsengaôron akaabo a aa va er ken hemen yô. Ka ve ôr nahan ér i lu icintan hen ior, nahan ve dondo ve. Profeti ugen u yôôn angwe u iyange i mtim, u i yer un ér Harold Camping yô, yange samber a angwe ugen sha tar cii vea mba dondon un ér mba timin tar ne ken inyom i 2011. Kpa tar tim ga.
-
MBAKPEHEN ISHOR ka ve senge ér mba a tahav mbu pasen akaa a ken hemen. Orgen u i yer un ér Edgar Cayce kua Jeane Dixon yô, yange ve tsengaôron akaa a aa kur sha mi vough ken atô u anyom deri a karen ne. Nahan kpa, akaa agenegh kpishi a yange ve ôr yô kure ga. U tesen ikyav yô, Dixon yange kaa ér Ityav Mbi Tar Cii mbi sha Utar mbia pev ken inyom i 1958 la. Cayce di kaa ér gar u New York jimin cii una yôhôr a har shin ityeku ken inyom i 1975 la.
Gbenda ngu u se fatyô u fan kwagh u ken hemen je kpa? Mpin ne ka u hange hange. Aluer u tsenga fan akaa a ken hemen la jighilii yô, a wase u u̱ fan kwagh u ú er ve uma wou una lu a inja yô.
