Kasi mungatemwa kumanyirathu ivyo vili munthazi mwinu? Ŵanthu ŵanandi ndivyo ŵakukhumba. Ndipo ŵanandi ŵakuyezga kuyowoyerathu vyamunthazi, kweni vinandi vikutondeka. Mwaciyelezgero:

• ŴASAYANSI ŵakumalirapo ndalama zinandi comene kugura makina ghankhongono kuti ŵamanye vyamunthazi. Ŵakukhumba kumanya umo kucirenge namacero, kweniso umo caru cizamuŵira cifukwa ca kunangika kwa maji na mphepo.

• ŴANTHU ŴAKUMANYA VINTHU ŵakuyowoyerathu umo bizinesi panji ndyali vyenderenge. Warren Buffett, uyo njumoza mwa ŵanthu ŵasambazi comene pa caru capasi, ŵanthu ŵakumuwona nga ni nchimi cifukwa wakayowoyerathu vyakukhwaskana na umo mabizinesi ghanyake ghenderenge ndipo vili kucitika nadi. Nate Silver, nayo wakayowoyerathu za umo ndyali za ku America zenderenge, kweniso awo ŵatorenge nkhombo ya kamupani ya mafilimu mu caru ici ya Hollywood.

• IVYO VIKALEMBEKA KALE ŵanthu ŵakuviwona nga ni maucimi. Mwaciyelezgero, ŵanji ŵakuti vinthu ivyo Michel Nostradamus (de Notredame) wakalemba kale comene, vikucitika sono. Pakuti kalendara ya Maya yikamalira pa Disembala 21, 2012, ŵanthu ŵakawonanga nga caru cimalenge pa deti ili.

• ŴALISKA ŴA MACHALICHI nyengo zinyake ŵakuyowoya kuti pa caru pacitikenge vinthu vyakofya kuti ŵacenjezge na kukopa ŵanthu. Harold Camping na ŵalondezgi ŵake ŵakapharazga kuti caru cimalenge mu 2011. Kweni caru cindamare m’paka sono.

• ŴAKUWUKWA ŵakuphalira ŵanthu kuti ŵali na nkhongono zapadera zakumanyira vyamunthazi. Edgar Cayce na Jeane Dixon, wose ŵakayowoyerathu vinthu vinyake ivyo vikacitika nadi mu vyaka vya m’ma 1900. Ndipouli, vinandi ivyo ŵakayowoya vikacitika yayi. Mwaciyelezgero, Dixon wakati mu 1958, kuzamucitika Nkhondo Yacitatu ya pa Caru Cose. Ndipo Cayce wakati ca m’ma 1970, msumba wa New York uzamubira mu nyanja.

Kasi cilipo cinthu cakugomezgeka ico cingatovwira kumanya vyamunthazi? Ili ni fumbo lakuzirwa comene. Para mungamanyirathu vyamunthazi, mungacitapo kanthu kuti vinthu vizakamwenderani makora.