MATAUPU I TE ‵KAVA | E MAFAI O ILOA NE SE TINO A MEA KA ‵TUPU I ASO MAI MUA?
E Isi ne Mea ne Iku Manuia, Kae Uke ne Seki Manuia
E mata, e fia iloa ne koe a mea ka ‵tupu ki a koe i aso mai mua? E gali te manatu tenā ki tino e tokouke. E ‵valo mai ne tino e tokouke a mea ka ‵tupu i aso mai mua mo ikuga kese‵kese e maua mai i ei: Ke mafau‵fau ki mea kolā e ‵soko mai:
-
SAIENITISI e fakaaoga ne latou a mea faigaluega ‵fou mo tupe e uke ke fakailoa mai ne latou a nisi mea kolā ka ‵tupu, e pelā mo te auala ka pokotia ei a te lalolagi ona ko mea kolā e fakalailai ne latou te lalolagi, kae ke iloa aka foki me e mata, ka ‵to te vaiua i te aso ma taeao i te koga e nofo koe i ei io me ikai.
-
TINO ‵POTO e ‵valo mai ne latou a mea kolā ka ‵tupu ki mea tau pisinisi mo mea fakapolitiki. A Warren Buffet, se tagata maumea e tokotasi i te lalolagi, ne fakaigoa a ia ki se tino fai fakaasiga ona ko tena manuia i mea tau pisinisi. A te suā tino poto ko Nate Silver, ne fakaaoga ne ia a mea tau fuainumela ke ‵valo mai ne ia a mea katoa ka ‵tupu i aso mai mua e kamata mai i mea fakapolitiki i Amelika ke oko eiloa ki failoga o tino fai ata i Hollywood.
-
FAKAMATALAGA MAI ASO MUA ne fai sāle e pelā me ne valoaga. Ko oti ne lavea ne nisi tino a te fakataunuga i aso nei o tusitusiga kolā e se manino ‵lei a Michel de Notredame (Nostradamus) mai te 16 senitenali. Ko oti ne fai ne nisi tino a te kalena a te kau Maya telā ne oti atu i a Tesema 21, 2012 e pelā me se fakailoga o taimi o fakalavelave faiga‵ta.
-
TAKITAKI LOTU i nisi taimi e ‵valo mai ne latou a fakalavelave faiga‵ta i te lalolagi kātoa kolā ka ‵tupu i aso mai mua ke fakailoa atu ei ki tino kae ke fakamaopoopo mai olotou soko. Ne folafola atu ne te pelofeta ko Harold Camping fakatasi mo ana soko me ka fakaseai atu a te lalolagi i te 2011. Kae tenei eiloa koi lavea atu ne tatou a te lalolagi i aso nei.
-
TINO FAIVAILAKAU KOLĀ E ‵POTO I TE FAITAUGA O MAFAUFAU O TINO e fai mai me e isi se poto fakapito e maua ne latou ke ‵valo mai a mea kolā ka ‵tupu i aso mai mua. E isi ne valoaga ‵tonu ne fai mai ne Edgar Cayce mo Jeane Dixon e uiga ki te 20 senitenali. Kae ne ‵valo mai foki ne lāua a nisi mea e uke kolā e seki taunu. E pelā mo Dixon ne ‵valo mai ne ia me ka kamata te Taua i te III a te lalolagi i te 1958, kae ne ‵valo mai ne Cayce me ka goto ki lalo a Niu loki i te moana i te kogaloto o tausaga mai te 1970 ke oko ki te 1979.
E mata, e isi se auala fakatuagagina e mafai o iloa ei ne tatou a mea ka ‵tupu i aso mai mua? E tāua ke fesili ifo ne tatou a te fesili tenā. Moi fai ke lavea ne koe a mea ka ‵tupu i aso mai mua, e mafai eiloa o pokotia tou olaga i ei.
