Ngatsʼiñá nga nikjaʼaitsjenjiaan nichxin xi sʼa nroa. Nikjaʼaitsjenjinñá jósʼin kuiyoaa kʼoa jósʼin koatio je xíngiaa, sakʼoa i̱ bixoán: “A ngisa nda koatio je ʼndíxtina. A kjoe je Sonʼnde. Jméni xi sʼian nga nda koatejna nichxin xi sʼa nroaján”. Kʼoa toxá meniná nga jchaa xi tʼatsʼe jebi nga̱ kui xi mená nga nda kuiyoaa, nga tsín jme xi si̱kjaojiaan kʼoa nga tsín kuinókjoaan. Tsa ʼyalañá jmeni xi koa̱n koa̱njin tongini kuiyondaa josʼiaan.

Jméni xi koa̱n nichxin xi nroaján. A tíjna jngo xi be. Je chjota xi tongini kʼoatso jmeni xi koa̱n sakʼoa bitjoson énle, tonga nʼio nkjín kʼa nga tsín bitjoson. Tonga je Niná kʼoatso nga ñaki kʼoakjoankoa̱n jmeni xi tongini kʼoatso. Je Biblia itso xi tʼatsʼe Jeobá: “Anña xi kʼoaxian saʼnda nga fitsʼiani josʼin kuichotsjoá jmeni xi koa̱n, anña xi nʼio tongini kʼoakixian jmeni xi kjesa kʼoamajin” (Isaías 46:10). A bitjoson jmeni xi tso je Niná.

Ánni nga machjénsíni nga kataʼyaa josʼin kitjoson je én xi tongini kitso Niná nichxin kjoatse. Tobʼelañá, tsa jngola chjota xi kui kotʼayason jokoa̱nchon, tsa jtsí kʼoa̱ kʼoa tsa sjue koa̱n, kʼoa tsa ñaki kʼoama jmeni xi tso, a tsí koa̱nkjainli tsa jtsí kʼoa̱ nyaon kʼoa tsa koa̱nsjue nyaon kuitso. Koa̱nkjainjinli. Tikʼoasʼinni xi kao Niná. Tsa jesa kitjoson jmeni xi tongini kitso, mejinná nga jchaa jméni xi tso tʼatsʼe nichxin xi nroaján.

JNGO NAXINANDÁ XI KISKAJENNGI:

Kʼiatsa jngolani xi kʼoakuitso nga kuichonikje jngo  naxinandá xi jekjoannkjín siento nó nga nʼio ngʼa tíjna kʼoa tsa kuitjoson je énle, tokʼoajinkoa̱nná. Je Niná jngo chjota kisichjén nga tongini kʼoakitso nga si̱kjeson je naxinandá Nínive (Sofonías 2:13-15). A kitjoson én jebi. Jótso je chjota xi kui batiotsʼinya jmeni xi koan nichxin kjoatse. Kʼianga nó 632 nga kjesa chʼajin nó 1, nga jexjaʼaon nó jaʼato nga kinokjoa én jebi, je chjota babilonio kao chjota medo kichosíkje naxinandá Nínive. Je Niná kʼoakitso nga to ʼndekixísa koa̱n naxinandá jebi. Ningalani 518 kilómetro cuadrado mani je naxinandá Nínive, je chjota xi kichosíkje alikui kisichjén nangi jebi. Totsakájnakjitianí. A koanle tsa jelani chjota nga tongini kʼoakitso jokjoansʼin kitjoson én jebi.

KOAKASONLI NINDALE CHJOTA:

ʼYáni xi jan siento nó tongini kʼoakuitso joʼmi je chjota xi nindale chjota koakason jngo sonxta, jme ntje̱ kjoaʼaíni kʼoa joʼmi je ʼnde jña sʼe̱jna sonxta jebi. Tsa jngolani xi kʼoatítso kʼoa kuitjoson je énle nʼiojin kʼoaxki̱ chjota jebi. Je chjotale Niná kʼoakitso nga Josías kʼuín je xi koakason ya sonxta je nindale chjota, nga ya kjuinroani ntje̱le rey David kʼoa nga ya Betel sʼe̱jna sonxta jebi (1 Reyes 13:1, 2). Kʼianga jejaʼato jan siento nó, jngo ntje̱le David xi rey koan. Josías tsakʼin kʼoa aliʼya xi nanda kʼoaʼmi nga kui nichxin. Tojo kitso je chjotale Niná, je Josías tsakʼasje ya tsjó nindale chjota kʼoa yaa tsakakáson sonxta xi kisʼejna ya Betel (2 Reyes 23:14-16). A koanle je chjota xi tongini kinchja̱ én jebi tsa tsínlani je Niná tsakasenkao.

JNGO NAXINANDÁ XI NʼIO TSE NGANʼIO KISʼELE KISKAJENNGI:

A tsí tokʼoakoa̱nná tsa jngolani chjota xi tongini kʼoakuitso nga jngo chjota xi kje tsinjin sikjeson jngo naxinandá xi nʼio tjínle nganʼio kʼoa kʼoakuitso jmeni xi sʼin chjota jebi nga sikjeson naxinandá jebi. Kui xi kisʼin Niná. Tongini kʼoakitso nga jngo chjota xi Ciro kʼuín jngo naxinandá tjoéle. Kʼoati kitso nga chjota jebi sikatíondaí je chjota judío kʼoa nga koasenkao nga kʼoendayani je yo̱ngo̱le.  Kʼoakitso nga je Ciro sixiya je xo̱ngá kʼoa nga tosʼe̱tixʼa xo̱ntjoale naxinandá (Isaías 44:27–45:2). A kitjoson én jebi. Jaon, je chjota xi kui bʼéyanajmí jmeni xi koan ngasʼa kʼoatso nga kʼoakoan. Je Ciro kitjoéle naxinandá Babilonia kʼoa kiskajenngi naxinandá jebi. Je Ciro xin tsakándiaale je xo̱ngá xi kijnachjoale naxinandá, xi tsonile, kisixiyaa je nandá. Kʼoa je xo̱ntjoale totjítixʼaa nga kicho je Ciro kʼoa yaa jaʼasʼenni je chjota kjoajchánle. Xijekoan, je Ciro kisikatíondaí chjota judío kʼoa kʼoakitso nga katasʼendaya je yo̱ngo̱ xi tíjna ya Jerusalén. Tomaxkónná nga kʼoakisʼin je Ciro nga̱ tsín je bexkón je Ninále chjota judío (Esdras 1:1-3). A kʼoakoanle tsa to chjotalani xi tongini kʼoakitso én jebi.

To janla choa̱ kaʼyaa jmeni xi tongini kitso je Niná xi jekitjoson. Tonga nʼiosa nkjín je én xi jekitjoson. Je Josué xi tsakasentítjonle chjota israelita i kitso: “Nanda ʼyao kao ngayeje ni̱ma̱no kʼoa kao ngayeje kjoabijnachonno nga nijngojin énnda xi kinchja̱ je Jeobá Nináno xi tsín kitjoson. Ñaki kitjoson ngayeje xi totʼatsaon. Nijngojin én jebi xi tsín kitjoson” (Josué 23:1, 2, 14). Je chjota israelita bení nga ñaki bitjoson jmeni xi tso je Jeobá. Ánni nga ñaki bitjosonsíni je énle Jeobá. Kuinga tsín mangóson je Niná kao chjotasonʼnde. Nʼio chjíle nga ʼyaa jebi, nga̱ tjínkʼa je én xi kitso Niná xi sʼa kuitjoson nichxin xi nroaján.

Jmeni xi tongini tso je chjota yaa bʼangini jmeni xi básjaiya je chjota científico kʼoa nga kotʼayason jmeni xi nʼia. Kʼoa tjínkʼa xi kʼoatso nga kjaʼaí nganʼio tjínle kʼoa kuinga manile nga kʼoatso jmeni xi koa̱n. Ngatsʼi chjota jebi, tokoyale tsa kʼoakoa̱n kʼoa tsa mai jmeni xi katso (Proverbios 27:1).

Je chjota alikui tse jmeni xi be, tonga je Niná bení ngayeje. Je Niná nʼio nda be jokjoan chjotasonʼnde kʼoa jmeni xi nʼio fitʼale. Kʼianga je xi kʼoasʼin mele, tongini kotsenle josʼin je chjota kʼoa tsa naxinandá. Je Niná male josʼin síxákao kʼoa josʼin síkʼantjaiya tsa jmeni ánni nga kʼoasʼin bichótsjoásíni josʼin mele. Je Niná itso: “Kʼoakoa̱n jotso én xi bitjoni ndsoʼba. Alikui tokjitia nga kjoaʼaínrʼoenina [...], ñaki kʼoasʼin kuichotsjoá jme xá tisikasénña” (Isaías 55:11). Jmeni xi tongini tso je Niná, xi tʼatsʼe nichxin xi nroaján, sitjosonní.

A tíjna jngo xi ndatjín xi choyalee nichxin xi nroa. Tsa ʼyalañá nga jngo ntjao̱xkón nroachrian tje̱n chósonjinnilee jmeni xi sʼiaan. Kʼoati koa̱n si̱koaa je én xi tongini kichji xi faʼaitʼa ya Biblia. Je Niná kʼoatso nga ñaki kʼoantjaiya jochon sonʼnde. Jmeni xi koa̱n, alikui mangóson kao jmeni xi tso je xi to chjota. (Chótsenlai ya jñani tso: “ Jmeni xi tso Niná tʼatsʼe nichxin xi nroaján”.)

Nʼio nkjín én xi tongini kinokjoa xi faʼaitʼa ya Biblia xi kʼoatsoná jmeni xi koa̱n kʼoa kʼoatsoná josʼin kuichotsjoá ngayeje. Je Niná itso: “Anña xi kʼoaxian saʼnda nga fitsʼiani josʼin kuichotsjoá jmeni xi koa̱n [...]. Kʼoa i xian: Tosi tonda sʼe̱jna énná, kʼoa kʼoasʼian tojmeni xi sa̱sénna” (Isaías 46:10). Koaan nʼio ndasʼin kuiyoaa ngatsʼiaa nichxin xi nroaján. Chjónangilai je testigole Jeobá jmeni xi tso Niná tʼatsʼe nichxin xi nroaján. Je testigole Jeobá ali tsa psíquicojin, ali tsa kʼienjin fákao kʼoa ni kjaʼaíjin nganʼio tjínle, kui Biblia kotʼaya kʼoa koaan kʼoakuitsoli jmeni xi sʼin Niná nichxin xi nroaján.