Tõnd fãa tagsda beoog yelle. D mi n sokda d mens tõnd ne d zakã rãmb vɩɩm sẽn na n yɩ a soab beoog-daare. Tõe tɩ y mi n sok y meng woto: ‘Mam kambã na n vɩɩmda dũni-bʋg buud pʋgẽ? Sabab-wẽng n na n wa sãam tẽngã bɩ? Bũmb n be m sẽn tõe n maan rũndã, tɩ m vɩɩmã yɩ sõma beoog bɩ?’ Y sã n sokd y mens sogs-kãensã, zemsame. Bala, d sẽn yaa ninsaalbã, d sẽn dat yaa d yamã sẽn na n gãe bãane, tɩ yɩɩr kaẽ ye. Y sã n tõog n bãng sẽn wat beoogo, y bãngd n segla y menga.

La yãmb vɩɩmã na n yɩɩ wãn beoogo? Ned n be n tõe n sõng-y tɩ y bãng bɩ? Neb nins sẽn togsd beoog yellã goam kẽer pidsame, la wʋsg pa pids ye. La Biiblã yeelame tɩ Wẽnnaam tõe n togsa bũmb sẽn wat beoog tɩ zems kɛpɩ. Ad Wẽnnaam sẽn yeele: “Hal sɩngr wakate, mam wilga bũmb nins sẽn maan n loogã, la mam da reng n wilga bũmb nins sẽn nan ka maanã me.” (Ezai 46:10) A goamã fãa sɩd pidsdame bɩ?

Bõe yĩng tɩ y segd n bao n bãng Wẽnnaam goamã sã n sɩd pidsdame? D rɩk makre: Yãmb sã n mi bãngda, t’a sã n yeel tɩ saagã na n niime fãa bɩ sɩd ni, y pa na n yeel t’a mi a tʋʋmdã sõma sɩda? A sã n le wa yeel tɩ saagã na n niime, yaa vẽeneg tɩ y na n segla y meng n gũ. Woto me, y sã n bãng tɩ Wẽnnaam zoe n togsa yɛl tɩ pids kɛpɩ, y pa na n bao n bãng bũmb nins a sẽn yeel tɩ watame wã sɩda?

GALƲ-TẼNG SÃOONGO:

Wala makre, tẽng sã n tar pãng n maan yʋʋm kobse, ned na n saag n yeel tɩ pa na n kaoos la b sãam-a sɩda? La Wẽnnaam kɩtame t’a no-rɛɛs a ye togs bũmb sẽn wõnd  woto bal kɛpɩ: A yeelame tɩ b na n sãama Niniiv tẽngã. (Sofoni 2:13-15) Bõe la kʋdemdã yel-mitb wilg-y-yã? Yʋʋmd 632 sẽn deng a Zezi rogmã, Babilon nebã la meed-rãmbã tɩ zaba ne Niniiv n deeg tẽngã. Rẽ yɩɩ yʋʋm 15 Wẽnnaam sẽn togs bãngr-gomdã poore. La Wẽnnaam ra paasame tɩ Niniiv na n sãamame n “lebg zĩ-pɛɛla.” Rẽ me pidsame bɩ? N-ye. Niniiv ra yaa tẽn-bedre, tɩ ned sã n dat n kẽn n gilg tẽngã la a tẽn-kɩremsã bɩ a na n maan rasem a tã. Nebã ra tõe n tagsdame tɩ sẽn tõog-b tẽngã na n soog-a lame n maan b sẽn date. La pa yɩ woto ye. B sãam-a-la zãnga. Rẽ yĩnga ned ra tõe n tika yɛlã sẽn yaa to-to wã n bãng tɩ b na n maana Niniiv woto sɩda?

B NA N YÕOGA NINSAALB KÕABA:

Mams-y ned sẽn na n yeel tɩ b na n wa yõoga ninsaalb kõab tẽn-kugr zugu, n togs ned ning sẽn na n maan woto wã yʋʋr la a yaabã yʋʋre, la a wilg sẽn na n yɩ tẽng ning pʋgẽ. Bãngr-gom-kãngã sã n pids yʋʋm 300 poore, yaa vẽeneg tɩ neb wʋsg na n pẽga sẽn togs-a bãngr-gomdã. Wẽnnaam no-rɛɛs n yeel “t’a Davɩɩd yageng n na n dog tɩ b pʋd a yʋʋr t’a Zozɩas.” A paasame t’a Zozɩas na n “yõoga ninsaalb kõab” Betɛll tẽngã tẽn-kugr a ye zugu. (1 Rĩm dãmba 13:1, 2) Na maan yʋʋm 300 poore, a Davɩɩd yageng a ye yʋʋr sẽn boond t’a Zozɩas n lebg rĩma. Wakat kãng tɩ Zozɩas ra pa yʋʋr sẽn wae ye. La wa no-rɛɛsã sẽn da togsã, a Zozɩas kẽnga Betɛll n tɩ “yiis kõabã yaada pʋsẽ n yõog bugum tẽn-kugrã zugu.” (2 Rĩm dãmba 23:14-16) Rẽ yĩnga ninsaal ra tõe n bãnga bõn-kãensã tɩ sã n pa Wẽnnaam n vẽneg-a sɩda?

SOOLEM LƲƖƖSE:

Mams-y soolem sẽn na n tar pãng wʋsgo, tɩ ned yeel t’a na n lʋɩɩme. A togsa a soab ning sẽn na n lub soolmã yʋʋre, la a sẽn na n maan to-to. A togsa rẽ t’a soabã nan pa rog meng ye. A goamã sã n wa pidsi, pa na n ling nebã sɩda? Wẽnnaam reng n togsame tɩ rao yʋʋr sẽn boond t’a Sirus n na n tõog Babilon. A Sirus ra na n basa zʋɩf-rãmbã tɩ b leb b ba-yirã, la a sõng-b tɩ b lebs n me b wẽnd-doogã. Sẽn paase, Wẽnnaam wilga a Sirus sẽn na n maan  to-to n tõog tẽngã. A yeelame tɩ kʋɩlsã koom na n kʋɩɩme, la tɩ kʋɩlensã na n pakame, t’a tõog tẽngã nana-nana. (Ezai 44:27–45:2) Gom-kãensã fãa Wẽnnaam sẽn deng n togsã pidsame bɩ? Kʋdemdã yel-mitb wilgame tɩ sɩd yɩ a Sirus n tõog Babilon. A Sirus sodaasã gõdga kʋɩlgã sẽn da zoet n pasgd tẽngã, tɩ koomã sig n zems b na pɩʋʋge. Sẽn paase, sodaasã taame n mik tɩ tẽngã kʋɩlens pakame. Baa a Sirus sẽn da pa tũud zʋɩf-rãmbã Wẽnnaamã, a bas-b lame tɩ b leb Zerizalɛm, la a kõ-b sor tɩ b lebs n me b wẽnd-doogã. (Ɛsdras 1:1-3) Sã n pa Wẽnnaam, ãnda n da tõe n bãng bõn-kãensã?

Woto yaa makr a tãab sẽn wilgd tɩ Wẽnnaam tõe n togsa sẽn wat beoogo, tɩ pids kɛpɩ. La pa bãngr-gom-kãensã bal la a togs tɩ pids ye. Zʋɩf-rãmbã taoor-lʋɩt a Zozue yeel-b-la woto: “Yãmb bãngame la y miime tɩ yãmb Zu-soab a Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas baa a ye tɩ vaal ye. Bãmb maana fãa, baa a ye ka pa ye.” (Zozue 23:1, 2, 14) Sɩd me, a Zozue wakatẽ zʋɩf-rãmbã ra pa tõe n yeel tɩ Wẽnnaam pʋlemsã la a bãngr-goamã pa pidsd ye. La wãn to la Wẽnnaam maand n pidsd a bãngr-goamã? Zĩ-kãng wɛɛngẽ, a yaa toor fasɩ ne ninsaalbã. Tara yõod tɩ d bãng rẽ. Bala, Wẽnnaam wilgame tɩ toeen-kãsems sẽn tõe n naf yãmb n na n zĩnd ka la bilfu.

Neb nins sẽn togsd beoog yellã wae n tikda siãnsã, yɛl sẽn zoe n maane, la nebã sẽn nong bũmb ninsã, wall bagr menga. B sã n togs gomde, b basd n zĩime n gũud n na n ges sẽn na n yɩ to-to.—Yelbũna 27:1.

La Wẽnnaam pa woto ye. A mii bũmb fãa. A mii ninsaalbã sõma. A sã n data, a tõe n bãnga ned kam fãa sẽn na n maan beoogo, la baa buud tõr sẽn na n maan menga. La a tõe n maana sẽn yɩɩd rẽ. Wẽnnaam tõe n toeema yɛlã sẽn na yɩl t’a raabã pidsi. A yeela woto: “Gomd ning sẽn yit mam noorẽ wã ka na n le wa mam nengẽ zaalem ye. . . . A na n tõoga bũmb ning mam sẽn tʋm-a t’a tɩ maanã.” (Ezai 55:11) Rẽnd wakat ninga, Wẽnnaam sã n togs bãngr-gomde, yaa bũmb a sẽn na n maan beoog-daar la a wilg tõndo. Yẽ meng n kɩtd t’a bãngr-goamã pidsdẽ.

Bãngr-goam n be n wilgd yãmb ne y zakã rãmb vɩɩmã sẽn na n yɩ to-to beoog bɩ? Y sã n bãng tɩ sa-kẽeng n wate, tõe tɩ y na n maana bũmb n kogl y meng la y zakã rãmbã. Biiblã bãngr-goam me tõe n sõng-y lame tɩ y bãng y sẽn na n maanega. Wẽnnaam wilgame tɩ toeen-kãsems n na n zĩnd dũniyã gill zug ka la bilfu. (Ges-y seb-neng a 7 wã gom-zug sẽn yaa: “ Bõe la Wẽnnaam wilg beoog-daarã wɛɛngẽ?”) Beoog-daar kãng na n yɩɩ toor fasɩ ne bũmb nins sẽn togsd-b beoog yellã sẽn yetã.

Bũmb nins sẽn maand dũniyã zugã yaa wa kibar b sẽn togsde. Biiblã bãngr-goamã tõe n sõng-y lame tɩ y zoe n bãng kibarã sẽn na n baas to-to. Wẽnnaam yeela woto: “Hal sɩngr wakate, . . . mam da reng n wilga bũmb nins sẽn nan ka maanã. . . . La m yeelame tɩ m goamã na n yalsame.” (Ezai 46:10) Yãmb ne y zakã rãmb tõe n wa paama vɩɩm sẽn tar barka. Kos-y-yã a Zeova Kaset rãmbã tɩ b wilg-y bũmb nins Biiblã sẽn yeel beoog-daarã wɛɛngẽ wã. B pa bagba, b pa yet me tɩ Wẽnnaam gomda ne-ba, wall tɩ b tara tõog n tõe n bãng sẽn wat beoog ye. La b zãmsda Biiblã, n tõe n sõng yãmb tɩ y bãng bũmb nins Wẽnnaam sẽn segend n na n maan beoog-daarã.