Llapantsikmi tapukuntsik kawënintsik y familiantsikpa kawënin imanö kanampaq kaqta: “¿Mas alli Patsachötsuraq wamräkuna kawayanqa? ¿Patsa ushakanqantsuraq? ¿Imallatapis rurëta puëdïmantsuraq shamoq tiempuchö mas alli kawakunapaq?”. Tsëkunata musyëta munanqantsikqa allillam. Porqui yamë y següru kawakïtam munantsik. Musyarninqa alleqchi alistakushwan.

Tsëpenqa, ¿imaraq shuyarämantsik? ¿Pillapis musyëta puëdinku? Pasakunampaq kaqta puntallapitana musyatsikoqkuna niyanqanqa, wakinllam cumplikashqa y mëtsikam cumplikashqatsu. Peru ima pasakunampaq kaqtaqa Diosllam musyatsikïta puëdin. Palabram Bibliam kënö nin: “Puntallapitanam willakun ushanan kaqta, y unë witsankunapitam willakun manaraq rurakashqa kaqkunata” (Isaïas 46:10). ¿Ëkataq cumplikashqa?

¿Imanirtaq musyëta procurashwan unë tiempuchö Diospa profecïankuna willakunqan ëka cumplikanqanta? Juk meteorölogo nishqan, tiempu imanö kanampaq kaqta atska watakunana willakunqannö cumplikashqa kaptinqa, ¿pëman markäkunkimantsuraq? ¿Warë ima pasakunampaq niptin cäsunkimantsuraq? Tsëqa creinkimanchi. Tsënöllam, Diospa llapan profecïankuna cumplikanqanta musyarirqa, shamoq tiempupaq ima ninqanta musyëta munashwan.

JATUN MARKA USHAKÄNQAN:

Atska pachak watakunapa jatun y puëdeq kashqa markapa ushakëninta  pipis willakuptin y tsënölla cumplikaptinqa, mana creipaqnöchi kanman ¿aw? Juk profëtanwanmi Jehovä qellqatsirqan Nïnivi markapa ushakëninta (Sofonïas 2:13-15). ¿Cumplikarqanku? ¿Unë pasakunqanta qellqaqkuna imatataq niyan? Kë profecïata willakuyanqampita 15 watanö pasariptinmi, 600 watakuna witsan manaraq Jesus shamuptin, Babilonia y Mëdu nacionkuna Nïnivi markata ushakätsiyarqan. Jina Diosqa nirqanmi “mana yakupis kaq tsunyaq jirkanö” tikranampaq kaqta. Alläpa jatun marka kaptimpis manam kikinkunapaq tsarikuyarqantsu, antis chipiyëpam ushakätsiyarqan. ¿Mëqan yachaq nunallapis puëdinmantsuraq karqan ima pasakunampaq kaqta puntallapitana willakïta?

“NUNAKUNAPA TULLUNTAM RUPANTSINQA JANËKICHÖ”:

¿Piraq 300 watakuna pishikaptin willakunman nunakunapa tullunta altarchö juk nuna rupatsinampaq kaqta, ima jutin kanqanta, ima kastapita kanqanta y më markächö tsë altar kanqantapis? Tsënö profecïa cumplikaptinqa, qellqaqninqa alläpa reqishqachi kanman. Diospa jutinchö parlaq juk profëtam nirqan, Davidpa mirënimpita Josïas jutiyoq nuna Betel markapa altarninchö nunakunapa tullunta rupatsinampaq kaqta (1 Rëyes 13:1, 2). Kima pachak watakuna pasariptinnam Davidpa mirënin Josïas, mandakoq këman charqan. Profecïa willakunqannö Betel markachö ‘wanushqakuna këkäyan sitiupita tullukunata jorqarirmi altarchö rupatsirqan’ (2 Rëyes 23:14-16). ¿Pillapis puëdinmantsuraq kënö ima pasakunampaq kaqta willakïta mana Diospa yanapakïninwanqa?

JUK NACIONPA MANDAKÏNIN USHAN:

Manaraq yurikushqa nuna juk jatun puëdeq nacionta imanö ushakätsinampaq kaqta pillapis willakuptinqa, alläpa espantakïpaqchi kanman. Tsëtam Dios rurarqan, Cïru jutiyoq nuna Babiloniata ushakätsinampaq kaqtam willakurqan. Jina willakurqanmi esclävunö këkaq judïukunata libranampaq y templuta yapë shäritsirnimpis yanapakunampaq kaqta. Y nirqanmi yachëwan imanö ruranampaq kaqtapis, juk mayupa yakunta tsakiratsinampaq kaqta. Jina willakurqanmi juk markapa punkunkuna kicharëkar quedanampaq kaqtapis (Isaïas 44:27–45:2). ¿Llapanku cumplikarqan?  Unë pasakunqanta qellqaqkunam niyan Babilonia markata Cïru ushakätsinqanta. Tsëpaqqa, alläpa yachëwanmi patsätsirqan Babilonia markapa pasaq mayuta juk lädupa tumaratsinampaq. Jinamampis, punkunkunaqa kicharëkänaqmi, tsëpam Cïrupa tröpankuna yëkuriyarqan. Tsëpitanam, Cïruqa Babiloniachö esclävu këkaq judïukunata jorqarirqan y Jerusalenchö këkaq templuta yapë shäritsiyänampaq mandakurqan, tsënö ruranqanqa alläpa kushikïpaqmi karqan (Esdras 1:1-3). Mana Dios karqa, ¿piraq tsënö llapan cumplikänampaq kaqta willakunman karqan?

Këkunam kayan Diospa kima profecïankuna cumplikanqan. Israelïtakunaqa tsëkunata musyayarqannam. Tsëmi, Israelpa pushaqnin Josuë kënö nirqan: “Qamkunaqa llapan shonqïkikunawan y almëkikunawanmi alli musyayanki, Jehovä Dios qamkunapaq allikunata parlanqan llapan cumplikanqanta, y manam ni jukllëllapis mana cumplikashpaqa quedashqatsu. Y manam ni ima parlanqampis pishintsu” (Josuë 23:1, 2, 14). Awmi, llapan änikunqanta y willakunqanta Dios cumplinqantam israelïtakunaqa musyayarqan. ¿Imanirtaq llapan cumplikan? Porqui Diospa rurëninqa manam igualantsu nunakunapa rurëninwan. Tsëta musyëqa alläpam precisan, porqui Diospa profecïankuna manaraq cumpleq kaqqa shamoq tiempuchö kawënintsiktam chipyëpa cambiarinqa.

Nunakunaqa imapis pasakunampaq kaqta willakuyänampaq estudiösukuna niyanqanta, nunakuna gustayanqanta, rurayanqanta y hasta brüjukuna niyanqantam cuentaman churayan. Tsëpitanam shuyaräyan ima pasanampaq kaqta (Proverbius 27:1).

Nunakunapitapis Diosqa llapantam musyan. Pëqa musyanmi nunakuna imanö kayanqanta y ima munënin kanqanta. Tsëmi, puntallapitana musyëta puëdin nunakuna o nacionkuna imatapis imanö rurayänampaq kaqta. Munëninta cumplinanrëkurqa Diosqa imëkatam rurëta puëdin. Y kënömi nin: “Noqa parlanqaqa ninqänöllam rurakanqa. Mana rurakarqa manam noqaman kutimunqatsu, [. . .] llapan ninqäkunapis allim yarqunqa” (Isaïas 55:11). Höraqa, shamoq tiempuchö imata ruranampaq kaqtam Diosqa willatsikun y llapantam cumplikätsinqa.

¿Kanku ima musyatsikïllapis kawënintsikwan y kuyashqa familiantsikpa kawëninwan shamoq tiempuchö ima pasakunampaq kaqpita? Mantsakëpaq shukukï vientu shamïkanqanta musyarqa, imata ruranapaq kaqtapis allichi patsätsishwan. Tsënöllam, cuentaman churashwan Biblia willakunqankunatapis. Shamoq tiempuchö jatun cambiukuna kanampaq kaqtam Diosqa willakushqa, y tsëkunaqa manam igualantsu nunakuna musyatsikuyanqanwanqa. (Rikäri “ Shamoq tiempupaq Dios musyatsikunqan” yachatsikïta.)

Bibliachöqa mëtsika profecïakunam willakun nunakunata ima pasanampaq kaqta, y tsëkunata musyëta puëdintsikmi. Diosmi kënö nin: “Puntallapitanam willakun ushanan kaqta, y unë witsankunapitam willakun manaraq rurakashqa kaqkunata; pëmi kënö nin: ‘Noqapa consëjökunaqa imëyaqpis këkanqallam y llapan kushitsimaq rurëta munanqätam rurashaq’” (Isaïas 46:10). Llapantsikmi shamoq tiempuchö shumaq kawakïta puëdintsik. ¿Imanö kanampaq kaqta musyëta munankiku? Tapuri Jehoväpa testïgunkunata. Pëkunaqa manam psïquico nishqantsu kayan, ni wakin nunakunapita mas yachëyoq ni poderyoqtsu kayan. Sinöqa Bibliatam estudiayan, tsëmi shamoq tiempuchö Dios imata ruranampaq kaqta yachatsikïta puëdiyan.