Wi alamala e prakseri a ten di e kon. Wi wani sabi fa a libi o de gi wi èn gi den lobiwan fu wi. Wi e aksi wisrefi: ’Den pikin fu mi o libi na ini wan moro bun grontapu? Wan rampu o pori grontapu? Wan sani de di mi kan kenki now fu man abi wan moro bun tamara?’ Wi alamala wani sabi fa sani o waka. Wi wani libi sondro broko-ede, wi wani de seiker na ini a libi, wi no wani taki bruya de, èn wi wani taki wi libi seti bun. Efu yu ben kan sabi seiker fa sani o waka na ini a ten di e kon, dan yu ben o sreka yusrefi èn yu ben o fruwakti den sani dati.

We, fa a tamara fu yu o de? Wan sma de di sabi dati? Sabiman di e pruberi fu taki fa sani o waka ben abi leti son leisi, ma nofo tron, den no ben abi leti. Ma sma e taki dati Gado man taki soifri san o pasa na ini a ten di e kon. En Wortu e taki: „Mi na a sma di e fruteri sensi a bigin san o pasa te fu kaba. Na mi e fruteri langa ten na fesi san mi o du na ini a ten di e kon” (Yesaya 46:10). Den sani di a ben taki ben pasa trutru?

Fu san ede a bun fu kon sabi efu den sani di Gado ben taki na ini owruten kon tru? We, efu yu ben sabi wan sma di wan heri pisi ten kaba man taki soifri fa a weer o de, dan yu ben o lespeki a sma dati. A no de fu taki dati yu ben o arki bun san a e taki fu a weer fu tamara. Na so a de tu taki efu yu kon sabi taki ala den sani di Gado ben taki na fesi kon tru, dan seiker yu ben o wani sabi san a e taki fu a tamara fu yu.

WAN BIGI FOTO E KISI PORI:

Kon meki wi taki dati wan sma ben man taki na fesi taki wan bigi foto di ben makti hondrohondro yari langa, o kisi pori heri esi. A ben o de wan kefalek sani efu a sani dati pasa leti so. Na so Gado ben meki wan fu  den profeiti fu en taki dati Ninefei ben o kisi pori (Sefanya 2:13-15). San historia skrifiman skrifi fu a tori disi? Na ini a di fu seibi yarihondro Fosi Krestes, sowan 15 yari baka di Gado ben meki sma taki san ben o pasa, den Babilonsma nanga den Mediasma broko go na ini Ninefei èn den teki en abra. Boiti dati, Gado ben taki krin dati Ninefei ben o tron wan „brokopresi èn wan presi di no abi watra neleki wan sabana”. Sani waka soleki fa Gado ben taki? Iya. Aladi a foto nanga den kontren na en lontu ben bigi sowan 518 fokanti kilometer, toku den srudati di ben teki a foto abra no teki a foto gi a kondre fu den, soleki fa sma ben o fruwakti. Na presi fu dati, den pori en. Sortu sma di e ondrosuku politiek afersi ben o man taki so soifri fa sani ben o waka?

LIBISMA BONYO O BRON:

Dri hondro yari na fesi, wan sma ben kari a nen nanga na afo fu wan man di ben o bron libisma bonyo na tapu wan altari, èn a ben taki tu san na a nen fu a foto pe na altari ben o de. Suma ben o prefuru fu taki a sani disi? Efu so wan sani ben o kon tru, dan a sma di ben taki en seiker ben o kon pôpi. A profeiti fu Gado ben taki: „Wan manpikin o gebore na ini a famiri fu David. A o nen Yosia . . . A manpikin disi o bron libisma bonyo” na tapu wan altari na Betel (1 Kownu 13:1, 2). Sowan dri hondro yari baka dati, wan kownu di nen Yosia, wan nen di wi no gwenti si na ini Bijbel, gebore na ini a famiri fu David. Soleki fa a profeiti ben taki na fesi, Yosia ben seni sma „go puru den bonyo na ini den grebi èn a bron den bonyo na tapu na altari” di de na Betel (2 Kownu 23:14-16). Fa wan sma ben kan taki sani so soifri, efu wan moro hei makti no ben tiri en?

A KABA FU WAN GRAN KOWNUKONDRE:

Suma ben o man taki na fesi san na a nen fu wan man di ben o meki wan prenspari grontapumakti fadon èn na sortu koni fasi a ben o du dati? Langa ten fosi a man dati gebore, Gado ben meki bekènti taki wan man di nen Sirus ben o go feti nanga wan kondre. Boiti dati, a man disi ben o fri den Dyu di ben de na ini katibo èn a ben o horibaka gi den so taki den ben kan bow a santa tempel fu den baka. Gado  ben taki tu dati Sirus ben o meki wan liba lon drei èn taki den portu fu wan foto ben o tan opo, so taki den srudati ben o man teki a foto abra moro makriki (Yesaya 44:27–45:2). Den someni sani disi di Gado ben taki na fesi ben kon tru leti so? Historia skrifiman e agri taki Sirus ben teki a kondre dati abra. A legre fu Sirus ben du wan kefalek koni sani di den meki wan fu den liba fu Babilon lon go na wan tra sei. Fu taki en leti, den ben meki a liba lon drei. Boiti dati, a legre ben man go na ini a foto fu di den portu no ben tapu. Baka dati, Sirus fri den Dyu èn a meki bekènti taki den ben kan bow a tempel fu den baka na ini Yerusalem. A sani dati ben de wan aparti sani, fu di Sirus no ben e anbegi a Gado fu den Dyu (Esra 1:1-3). A no Gado wawan ben kan taki so finifini fa den sani dati ben o pasa?

Wi taki fu dri eksempre di e sori fa den sani di Gado ben taki na fesi, kon tru. A no wanwan leisi nomo dati ben pasa. A Dyu fesiman Yosua ben taki wan sani di ala den sma di ben e arki en ben sabi. A ben taki: „Unu sabi heri bun taki Yehovah un Gado du ala den bun sani di a ben pramisi unu. Ala den sani disi kon tru, soleki fa unu srefi si. Iya, a du ala den sani di a pramisi” (Yosua 23:1, 2, 14). A pipel fu Yosua no ben kan taki dati den pramisi nanga den profeititori fu Gado no ben kon tru. Ma fa Gado e meki den pramisi fu en kon tru? Gado e du sani heri tra fasi leki libisma. A prenspari taki yu sabi dati, fu di Gado meki wan tu prenspari sani bekènti fu a ten di de na yu fesi èn den sani dati abi fu du tu nanga yu.

Fu man taki na fesi san o pasa, dan nofo tron libisma e luku den sani di sabiman ondrosuku, den e gebroiki sani di sma sabi, den e luku sani di e pasa furu, èn sosrefi den sani di lukuman e taki. Baka te libisma taki den sani fu den, dan den e sidon e wakti nomo fu si san o pasa.—Odo 27:1.

Tra fasi leki libisma, Gado sabi ala sani. A e frustan krin fa libisma de èn fa den e denki. Dati meki te Gado wani, a kan si krin na fesi san libisma èn sosrefi wan pipel o du. Ma Gado man du moro leki dati. A man kenki a fasi fa sani e waka fu sorgu taki sani waka soleki fa a wani. A e taki: „Den wortu di e komoto na mi mofo . . . no o drai kon baka na mi solanga sani no pasa soleki fa mi taki. . . . Den wortu fu mi musu fu abi bun bakapisi” (Yesaya 55:11). Te yu luku en bun, dan son leisi te Gado e taki sani na fesi, dan na taigi a e taigi wi san a o du na ini a ten di e kon. A e du san de fanowdu fu sorgu taki den sani di a taki e kon tru.

Yu man kon sabi krin fa sani o waka nanga yu èn nanga den lobiwan fu yu na ini a ten di e kon? Efu yu sabi taki wan bigi draiwinti o kon, dan yu kan seti sani na fesi fu kibri yu libi. Na so yu musu si den sani tu di Bijbel taki na fesi. Gado meki bekènti taki heri esi bigi kenki o pasa na grontapu. (Luku a faki „ San Gado taki fu a ten di e kon”.) Sani o waka heri tra fasi leki fa den sma di e kari densrefi sabiman ben taki.

Yu kan si a tori disi so: Wi kan sabi na fesi fa sani o waka nanga grontapu, fu di ala sani skrifi kaba. Gado e taki: „Mi na a sma di e fruteri sensi a bigin san o pasa te fu kaba. . . . Mi na a sma di e taki: ’Sani musu pasa soleki fa mi bosroiti. Mi o du iniwan sani di mi wani’” (Yesaya 46:10). Sani kan waka bun gi yu nanga yu osofamiri na ini a ten di e kon. Aksi Yehovah Kotoigi san Bijbel e taki fu den sani di o pasa na ini a ten di e kon. Den Kotoigi a no lukuman, den no e taki tu dati den e kisi boskopu, èn den no abi spesrutu koni fu taki sani na fesi. Den e studeri Bijbel èn den kan sori yu sortu bun sani Gado e sreka gi a tamara fu yu.