Anthony: Rán Allim Tim. Ua pwapwa pwe sia chufengensefál.

Tim: Pwal ngang.

Anthony: Ua mochen anéúnéú ngonuk ei mineféén Ewe Leenien Mas. Ai lúkú kopwe wesewesen pwapwaiti ekkewe pwóróus lón.

Tim: Kilisou. Enlet ua pwapwa pwe ka etto rei ikenái pún mi wor ai kapas eis ngonuk.

Anthony: Ewer, ifa óm na kapas eis?

Tim: Pwonóónun nánew, aua fósfengen me chienei we chón angang. Ua apwóróusa ngeni usun ámmeseiken ekkewe puk ka kan wakkato rei. Nge a erá pwe usap álleaniir pún Chón Pwáraatá Jiowa rese lúkú Jesus Kraist. Nge mei pwúng met a erá? Iwe, ua ereni pwe ika ka pwal etto rei upwe eisinuk.

Anthony: Ua pwapwa pwe ka eisinikem Chón Pwáraatá Jiowa, lap seni óm kopwe eisini pwal emén me lúkúm. Pún a mmen múrinné óm kopwe eisini pwisin ewe emén usun met a wesewesen lúkú, ika met?

Tim: Me rei, itá ina.

Anthony: Nge ren enletin, Chón Pwáraatá Jiowa ra fókkun lúkú Jesus. Ina minne, ám aua lúkú pwe a lamot aramas repwe anganga ar lúkú Jesus pwe repwe kúna manaw.

Tim: Ina met ua pwal silei usumi, nge lupwen chienei we chón angang a erá pwe ouse lúkú Jesus, iwe ua pwal mochen silei enletin. Eli pokiten sise fen pwóróusfengen usun ei mettóch me mwan.

Anthony: Pwata use áiti ngonuk ekkóch wokisin lón Paipel mi menlapei lamoten ach sipwe anganga ach lúkú Jesus? Ikkeei ekkeei wokisin Chón Pwáraatá Jiowa ra kan nénnéúnéú le afalafal ngeni aramas.

Tim: Iwe, nokun.

Anthony: Sia tongeni poputá ren pwisin alon Jesus a mak lón Johannes 14:6. Jesus a eáni ekkena kapas lón ewe atun a fósfengen me emén néún kewe aposel. A erá: “Jesus a üreni, ‘Ngang ewe al me ewe let me ewe manau. Esap wor eman epwe tongeni feila ren Semei me lüki.’” Me ren ena wokisin, ifa chék ewe alen ach sipwe tongeni fós ngeni ewe Sam?

Tim: Me ren Jesus.

Anthony: Mei pwúng. Me Chón Pwáraatá Jiowa ra fókkun lúkú ena. Iwe, kapas eis: Seni met ka silei usun án emén epwe iótek, Kot a mochen epwe iótek me ren iten ié?

Tim: Me ren iten Jesus.

Anthony: Mei pwúng. Ina ewe popun, iteitan ua iótek, ua iótek me ren iten Jesus. A pwal ina usun ren meinisin án Chón Pwáraatá Jiowa kewe iótek.

Tim: A éch ua silei ena.

Anthony: Pwal eú wokisin sia tongeni pwóróusfengen wóón, Johannes 3:16. A kon lamot ena wokisin ina popun chómmóng aramas ra kan apasa pwe ina menlapen ewe puken Kapas Allim. Weween pwe ika mi chék wor eú wokisin lón Paipel  epwe áweweei meinisin ekkewe pwóróus usun manawen Jesus wóón fénúfan me an we angangen afalafal, iwe ina ewe wokisin. Neman mi éch sipwe álleani.

Tim: Ewer. A erá: “Pun iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.”

Anthony: Kilisou. En mi rorrongorong ei wokisin?

Tim: Ewer, ua kan rongorong lón ám fel me kúna an a makketá wóón ekkewe paap.

Anthony: A mmen iteféúló ei wokisin. Nge kopwe nengenifichi met Jesus a apasa. A erá pwe pokiten Kot a tongekich a suuk ngeni aramas ar repwe tongeni kúna manaw esemuch. Nge met a lamot sipwe féri?

Tim: Sipwe lúkú.

Anthony: Ewer. Lón ei itiitin, a lamot sipwe lúkú néún Kot áláemén, Jesus Kraist. Nge ei pwóróus usun án aramas lúkú Jesus a atufichiir ar repwe kúna manaw esemuch, a mak lón ei puk ua ngonuk, lón pekin taropwe 2. Eú me lein ekkewe popun a peres Ewe Leenien Mas, a erá pwe “a pesei aramas ar repwe lúkú Jesus Kraist, ewe a máló pwe sipwe tongeni kúna manaw esemuch, iwe, a nennemenem iei lón ewe wis Kingen án Kot we Mwú.”

Tim: Iwe, a wesewesen pwá. A fen mak lón pwisin néúmi ei puk eú pisekin ánnet pwe Chón Pwáraatá Jiowa ra lúkú Jesus.

Anthony: Mi fókkun pwúng.

Tim: Iwe, pwata chék aramas ra kan erá pwe ouse lúkú Jesus?

Anthony: Neman epwe wor chómmóng popun aramas ra kan erá ena. Eú popun ra kan apasa, pokiten ra rongorong seni ekkóch. Are neman néúwisin ar lamalam ra afalafaler usun ei pwóróus nge ese pwúng.

Tim: Nge ua pwal ekieki, eli ekkóch aramas ra erá ouse lúkú Jesus pokiten oua pwisin eita ngenikemi Chón Pwáraatá Jiowa, nge esap fen Chón Pwáraatá Jesus.

Anthony: Neman pwal ina eú popun.

Tim: Pwata oua kon afalafal usun Jiowa?

Anthony: Ám aua lúkú pwe a lamot sipwe pani iten Kot we Jiowa, usun minne Néún we Jesus a féri. Nengeni met Jesus a erá lupwen a iótek ngeni Seman, a mak lón Johannes 17:26. Kese mochen kopwe álleani ena wokisin?

Tim: Ewer. “Ngang üa asile ngeniir itom, nge üpwe sopwela ai föri iei usun, pwe ewe chen ka eäni ngeniei epwe nonom lor, pwal ngang üpwe nonom lor.”

Anthony: Kilisou. Nengeni Jesus a erá pwe i a esile ngeni aramas iten Kot. Met óm ekiek, pwata a féri ena?

Tim: Hmm. Use pwal silei.

Anthony: Iwe, neman sia tongeni nengeni pwal eú wokisin epwe álisikich le weweiti ei mettóch. Ua ekieki Föför 2:21. A erá: “Nge iö epwe köri iten ewe Samol epwe manau.” Iwe, ua silei pwe kopwe tipeeú ngeniei pwe ren ach sipwe kúna manaw a lamot sipwe pappani iten ewe Samol, Jiowa. Ese mwáál Jesus a pwal silei ei mettóch.

Tim: Ewer, ua tipeeú ngonuk.

Anthony: Iwe, eú popun a lamot ngeni Jesus pwe néún kewe chón káé repwe silei me pani iten Kot, pwe repwe kúna manaw. Pwal ina eú me lein ekkewe popunlapen aua fókkun afalafal usun Jiowa. Aua meefi pwe a lamot aupwe esilefeili iten Kot we me álisi ekkewe ekkóch ar repwe pwal kéri itan.

Tim: Nge, inaamwo ika aramas rese silei iten Kot are pani itan we, ra silei pwe ra fós usun Kot.

Anthony: Neman. Nge án Kot esile ngenikich itan we a ámecheresi alen ach sipwe pacheéch ngeni.

 Tim: Met weween alom na?

Anthony: Ekieki ei mettóch: Úrúrún, itá ese pwal lamot ach sipwe silei iten Moses. Nge sia chék tongeni silei i usun ewe mwán mi áimufeseni ewe Setipar are ewe a angei ewe Allúk Engol. Pwal ina chék usun ren Noa, met popun sipwe pwal silei itan? Sia chék tongeni silei pwe i ewe mwán mi falei efóch waimw me amanawa an we famili me ekkewe man. A pwal ina usun ren Jesus Kraist, sia tongeni chék silei pwe i ewe emén mi feitiw seni láng me máló fán iten ach kewe tipis. Ika met?

Tim: Ai lúkú epwe ina.

Anthony: Nge Kot a féri pwe sipwe silei iten ekkena aramas. A mmen aúchea me rech ach sipwe silei iten aramas. Inaamwo ika sise kúna Moses, Noa, are Jesus, nge pokiten sia silei iter sia meefi pwe iir wesewesen aramas.

Tim: Use fen ekieki ena, nge mi fen pwúng!

Anthony: Ina pwal eú popun Chón Pwáraatá Jiowa ra pappani iten Kot fán chómmóng. Ám aua mochen álisi aramas ar repwe ámááraatá ar lúkú Jiowa Kot pwe i wesewesen Emén ra tongeni chiechiéch ngeni. Nge aua pwal menlapei lamoten wisen Jesus ren ach sipwe kúna manaw. Eli sipwe tongeni álleani eú wokisin epwe áweweéchú ei mettóch.

Tim: Ewer, ewer.

Anthony: Sia fen álleani Johannes 14:6. Chemeni pwe lón ena wokisin Jesus a apasa pwe i “ewe al me ewe let me ewe manau.” Iwe, sipwe álleani me ppii met Jesus a apasa lón Johannes 14:1. Kese mochen álleani met a erá lesópwólóón ena wokisin?

Tim: Ewer. Iwe, a erá: “Oupwe lükü Kot, nge oupwe pwal lüküei.”

Anthony: Kilisou. Iwe, met óm ekiek, lúkú mi enlet a itá wewe ngeni pwe sipwe chék lúkú emén me leir?

Tim: Aapw. Jesus a erá pwe a lamot sipwe lúkú Kot me i.

Anthony: Mei pwúng reom. Nge ua silei pwe kopwe tipeeú ngeniei pwe esap naf ach sipwe chék apasa pwe sia lúkú Kot me Jesus. Ren enletin, a lamot sipwe pwal eáni ewe sókkun manaw mi pwáraatá ena lúkú.

Tim: Ewer mi pwúng.

Anthony: Nge ifa usun emén epwe pwáraatá pwe a enletin lúkú Kot me Jesus? Eli sia tongeni pwóróusfengen wóón ena kapas eis lón pwal eú fansoun. *

Tim: Ua sani ena.