Anthony: Tim, biɛ fɛɛ? Eŋɔɔ minaa akɛ wɔkpe ekoŋŋ.

Tim: Mi hu nakai.

Anthony: Miba ni mibahã bo Buu-Mɔɔ kɛ Awake! hee ni eba lɛ eko. Miheɔ miyeɔ akɛ obaanya saji ni yɔɔ mli lɛ ahe waa.

Tim: Oyiwaladɔŋŋ. Miná he miishɛɛ waa akɛ oba biɛ ŋmɛnɛ, ejaakɛ sane ko yɛ ni miitao mabi bo.

Anthony: Nakai, mɛɛ sane ni?

Tim: Nyɛsɛɛ lɛ, mikɛ wɔnitsumɔ lɛ mli nyo ko miigba sane. Mikɛɛ lɛ akɛ woji ni okɛhã mi lɛ amli ŋɔɔ waa, ni migba lɛ amɛmli saji. Shi ekɛɛ mi akɛ mikpa kanemɔ, ejaakɛ Yehowa Odasefoi heee Yesu nɔ amɛyeee. Ofainɛ, lɛɛlɛŋ ni? Mikɛɛ lɛ akɛ be kroko kɛ́ oba biɛ lɛ mabi bo.

Anthony: Eŋɔɔ minaa waa akɛ obi mi. Ehi akɛ obi mi sane nɛɛ, moŋ fe ni ooobi mɔ kroko ni jeee Odasefonyo. Bei pii lɛ, kɛ́ ootao ole nɔ ni mɔ ko heɔ eyeɔ lɛ, ehi waa akɛ ooobi lɛ diɛŋtsɛ. Aloo jeee nakai?

Tim: No hewɔ mibi bo lɛ.

Anthony: Anɔkwale lɛ ji akɛ, Yehowa Odasefoi heɔ Yesu nɔ amɛyeɔ waa diɛŋtsɛ. Wɔheɔ wɔyeɔ akɛ kɛ́ abaahere mɔ ko yiwala lɛ, ja ehe Yesu nɔ eye.

Tim: Mile akɛ nyɛheɔ Yesu nɔ nyɛyeɔ, shi be ni ebi mi lɛ miitao manu yɛ onaa kɛkɛ. Efeɔ mi akɛ wɔjeko gbɛ wɔsusuko sane nɛɛ he pɛŋ.

Anthony: Hã matsɔɔ bo Biblia mli ŋmalɛi komɛi ni tsɔɔ nɔ hewɔ ni ehe miihia ni wɔhe Yesu nɔ wɔye lɛ. Yehowa Odasefoi kɛ ŋmalɛi nɛɛ tsuɔ nii waa kɛ́ amɛtee shiɛmɔ.

Tim: Tsɔɔmɔ mi.

Anthony: Ebaahi waa akɛ wɔkɛ Yesu diɛŋtsɛ daaŋ wiemɔ ni yɔɔ Yohane 14:6 lɛ baaje shishi. Wiemɔi nɛɛ fata saji ni Yesu kɛɛ ekaselɔi lɛ ateŋ mɔ kome be ni ekɛ lɛ gbaa sane lɛ he. Ekaneɔ akɛ: “Yesu kɛɛ lɛ akɛ: ‘Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.’” Yɛ ŋmalɛ ni wɔkane nɛɛ naa lɛ, mɛni ji gbɛ koome pɛ ni wɔbaanyɛ wɔtsɔ nɔ wɔya Tsɛ lɛ ŋɔɔ?

Tim: Kɛtsɔ Yesu nɔ.

Anthony: Nakai ni. Ni Yehowa Odasefoi heɔ enɛ amɛyeɔ waa. Hã mabi bo nɔ ko: Yɛ nɔ ni ole yɛ Nyɔŋmɔ taomɔnii ahe lɛ naa lɛ, kɛ́ mɔ ko miisɔle lɛ, namɔ gbɛ́i amli esa akɛ esɔle kɛtsɔ?

Tim: Yesu gbɛ́i amli.

Anthony: Mikɛ bo kpãa gbee. Ni no hewɔ misɔleɔ kɛtsɔɔ Yesu gbɛ́i amli be fɛɛ be lɛ. Nakai nɔŋŋ Yehowa Odasefoi fɛɛ feɔ kɛ́ amɛmiisɔle.

Tim: Osane nɛɛ eŋɔɔ minaa waa.

Anthony: Ŋmalɛ kroko hu ji nɔ ni jeɔ kpo yɛ Yohane 3:16 lɛ. Ŋmalɛ nɛɛ he hiaa aahu akɛ awo lɛ gbɛ́i akɛ Sanekpakpa lɛ yɛ gbɛ bibioo ko nɔ. Nɔ ni etsɔɔ kɛkɛ ji akɛ, ŋmalɛ nɛɛ muaa Yesu shikpɔŋ nɔ shihilɛ kɛ eshiɛmɔ lɛ he saji ni aŋmala ashwie shi lɛ fɛɛ naa. Ofainɛ, masumɔ ni okane.

Tim: Yoo. Ekaneɔ akɛ: “Ejaakɛ nɛkɛ Nyɔŋmɔ sumɔ je lɛ, akɛ eŋɔ ebi koome lɛ ehã, koni mɔ fɛɛ  mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”

Anthony: Oyiwaladɔŋŋ. Ani onu ŋmalɛ nɛɛ pɛŋ?

Tim: Hɛɛ, minu aahu, ni bei pii lɛ minaa ni aŋmala yɛ hei hei.

Anthony: Mɛi babaoo le ŋmalɛ nɛɛ. Kadimɔ nɔ ni Yesu kɛɛ lɛ jogbaŋŋ. Ekɛɛ akɛ Nyɔŋmɔ suɔmɔ lɛ hewɔ lɛ, adesai baanyɛ aná naanɔ wala—shi ja wɔfee mɛni?

Tim: Wɔhe enɔ wɔye.

Anthony: Nakai. Ja wɔhe Bi koome lɛ, ni ji Yesu Kristo lɛ, nɔ wɔye. Ni oti nɛɛ—akɛ Yesu nɔ ni wɔɔhe wɔye lɛ ji nɔ ni baahã wɔná naanɔ wala lɛ—ji nɔ ni ama nɔ mi yɛ wolo nɛɛ baafa 2 lɛ. Be ni atsɔɔ nɔ hewɔ ni afeɔ Buu-Mɔɔ lɛ mli lɛ, ewie yɛ efã ko akɛ “ewoɔ mɛi hewalɛ ni amɛná Yesu Kristo ni bagbo koni wɔná naanɔ wala lɛ mli hemɔkɛyeli, mɔ ni miiye nɔ amrɔ nɛɛ akɛ Nyɔŋmɔ Maŋtsɛyeli lɛ nɔ Maŋtsɛ lɛ.”

Tim: Nɔ ni owieɔ lɛ nyɔŋma shiishi ni. Nyɛ diɛŋtsɛ nyɛwolo lɛ etsɔɔ akɛ Yehowa Odasefoi heɔ Yesu nɔ amɛyeɔ.

Anthony: Nakai pɛpɛɛpɛ.

Tim: Kɛ́ nakai lɛ, belɛ, mɛni hewɔ mɛi kɛɔ akɛ nyɛheee Yesu nɔ nyɛyeee lɛ?

Anthony: Ekolɛ mɛi hiɛ yiŋtoi srɔtoisrɔtoi hewɔ ni amɛkɛɔ nakai lɛ. Bei komɛi lɛ, mɛi kɛɔ nakai ejaakɛ amɛnu ni mɛi krokomɛi miikɛɛ nakai. Aloo ekolɛ amɛsɔfo lɛ ekɛɛ amɛ akɛ wɔheee Yesu nɔ wɔyeee.

Tim: Eefee mi akɛ, ekolɛ ni nyɛtsɛɔ nyɛhe Yehowa Odasefoi, shi jeee Yesu Odasefoi lɛ, no hewɔ ni mɛi komɛi kɛɔ akɛ nyɛheee Yesu nɔ nyɛyeee lɛ.

Anthony: Eeenyɛ efee akɛ no hu fata he.

Tim: Mɛni hewɔ daa nɛɛ nyɛmiiwie Yehowa he lɛ?

Anthony: Sane kome ji akɛ, wɔheɔ wɔyeɔ akɛ ehe miihia ni wɔkɛ Nyɔŋmɔ gbɛ́i, Yehowa lɛ, atsu nii—taakɛ e-Bi, Yesu, fee lɛ pɛpɛɛpɛ. Susumɔ nɔ ni Yesu kɛɛ e-Tsɛ lɛ yɛ sɔlemɔ mli lɛ he okwɛ. Eyɛ Yohane 17:26. Ofainɛ, masumɔ ni okane.

Tim: OK. “Mijie ogbɛ́i lɛ kpo mitsɔɔ amɛ, ni masaa majie lɛ kpo matsɔɔ, koni suɔmɔ ni okɛsumɔ mi lɛ ahi amɛmli, ni mi hu mahi amɛmli.”

Anthony: Oyiwaladɔŋŋ. Kadimɔ akɛ Yesu kɛɛ ejie Nyɔŋmɔ gbɛ́i lɛ kpo. Kɛ́ okwɛ lɛ, mɛni hewɔ efee nakai?

Tim: Mmm. Minyɛŋ matsɔɔ.

Anthony: Ole, hã wɔkane ŋmalɛ kroko ko, ekolɛ no baahã wɔnu sane nɛɛ shishi jogbaŋŋ. Ŋmalɛ nɛɛ jeɔ kpo yɛ Yoel 3:5. Ekaneɔ akɛ: “Mɔ fɛɛ mɔ ní aaatsɛ́ Yehowa gbɛ́i anɔ lɛ, aaahere eyiwala.” Okɛ mi baakpã gbee akɛ kɛ́ Yehowa gbɛ́i ni aaatsɛ lɛ fata nibii ni baahã ahere mɔ ko yiwala lɛ ahe lɛ, belɛ, ekã shi faŋŋ akɛ Yesu le.

Tim: Hɛɛ, no lɛ nakai ni.

Anthony: No hewɔ lɛ, Nyɔŋmɔ gbɛ́i lɛ ni Yesu sɛɛnyiɛlɔi lɛ aaale ni amɛkɛtsu nii lɛ bafee nɔ ko ni he miihia lɛ waa, ejaakɛ no baanyɛ ahã ahere amɛyiwala. Ni eji yiŋtoi titrii ahewɔ ni wɔwieɔ Yehowa he daa nɛɛ ateŋ ekome. Wɔheɔ wɔyeɔ akɛ ehe miihia ni wɔhã mɛi ale Nyɔŋmɔ gbɛ́i lɛ, ni wɔye wɔbua amɛ ni amɛtsɛ nakai gbɛ́i lɛ.

Tim: Shi kɛ́ mɛi lé Nyɔŋmɔ gbɛ́i lɛ loo amɛkɛtsuuu nii tɛ̃ɛ po lɛ, loloolo lɛ kɛ́ amɛtsɛ Nyɔŋmɔ lɛ, amɛle mɔ tuuntu ni amɛtsɔɔ lɛ.

Anthony: Nɔ ni owieɔ lɛ baanyɛ afee anɔkwale. Shi kɛ́ nakai ni po lɛ, Nyɔŋmɔ etsɔɔ wɔ egbɛ́i lɛ, koni efee mlɛo kɛhã wɔ akɛ wɔɔbɛŋkɛ lɛ.

Tim: Te otsɔɔ tɛŋŋ?

Anthony: Susumɔ enɛ he okwɛ: Kulɛ, ehe ehiaaa ni wɔle Mose gbɛ́i. Wɔbaanyɛ wɔtsɛ lɛ akɛ nuu ni gba Ŋshɔ Tsuru lɛ mli lɛ loo mɔ ni akɛ Kitãi Nyɔŋma lɛ hã lɛ lɛ. Noa hu nakai nɔŋŋ.  Kulɛ, ehe ehiaaa ni wɔle lɛ hu egbɛ́i. Abaanyɛ atsɛ lɛ kɛkɛ akɛ nuu ni kpɛ adeka lɛ ni ehere eweku lɛ kɛ kooloi lɛ ayiwala lɛ. Nakai nɔŋŋ, kulɛ, abaanyɛ atsɛ Yesu Kristo po akɛ mɔ ni jɛ ŋwɛi eba ni ebagbo yɛ wɔhe eshai lɛ ahewɔ lɛ, aloo jeee nakai?

Tim: Efeɔ mi akɛ nakai ni.

Anthony: Shi Nyɔŋmɔ kwɛ ni aŋmala mɛi nɛɛ fɛɛ agbɛ́i ashwie shi. Amɛgbɛ́i ni wɔle lɛ hãa wɔnaa akɛ amɛhe saji ni aŋmala ashwie shi lɛ ji nibii ni ba mli diɛŋtsɛ. Eyɛ mli akɛ wɔkɛ wɔhiŋmɛi enako Mose, Noa, loo Yesu, dã moŋ, shi amɛgbɛ́ii ni wɔle lɛ haa wɔnaa akɛ amɛhi shi pɛŋ.

Tim: Misusuko he yɛ nɛkɛ gbɛ nɔ dã, shi efeɔ mi akɛ nɔ ni owieɔ lɛ nakai ni!

Anthony: Enɛ ji yiŋtoo kroko hewɔ ni Yehowa Odasefoi kɛ Nyɔŋmɔ gbɛ́i lɛ tsuɔ nii waa lɛ. Wɔmiisumɔ ni wɔye wɔbua mɛi ni amɛhe Yehowa Nyɔŋmɔ nɔ amɛye akɛ eji Mɔ ko ni yɔɔ diɛŋtsɛ ní amɛbaanyɛ amɛtsi amɛbɛŋkɛ lɛ. Yɛ nakai beaŋ nɔŋŋ lɛ, gbɛfaŋnɔ ni Yesu tsuɔ yɛ wɔyiwalaheremɔ mli lɛ kã wɔtsui nɔ waa. Ofainɛ, hã wɔkane ŋmalɛ kome nɛɛ ni wɔkɛma sane nɛɛ nɔ mi.

Tim: Yoo, hã wɔkane.

Anthony: Wɔtsɔ hiɛ wɔkane Yohane 14:6 lɛ. Kaimɔ akɛ, Yesu kɛɛ akɛ lɛ ji “gbɛ lɛ kɛ anɔkwale lɛ kɛ wala lɛ.” Hã wɔya sɛɛ fioo kɛya Yohane 14:1 lɛ, ni wɔkadi nɔ ni Yesu wie yɛ jɛmɛ. Ofainɛ ni okane nɔ ni Yesu wie yɛ nakai kuku lɛ naagbee gbɛ lɛ.

Tim: Jɛmɛ kaneɔ akɛ: “Nyɛhea Nyɔŋmɔ nɔ nyɛyea, ni mi hu nyɛhea minɔ nyɛyea.”

Anthony: Oyiwaladɔŋŋ. No hewɔ lɛ, kɛ́ akɛɛ mɔ ko yɛ anɔkwa hemɔkɛyeli lɛ, mɛni atsɔɔ lɛ? Akɛ ená Yehowa pɛ mli hemɔkɛyeli, aloo akɛ ená Yesu pɛ mli hemɔkɛyeli?

Tim: Dabi. Yesu tsɔɔ akɛ esa akɛ wɔhe mɛi enyɔ lɛ fɛɛ wɔye.

Anthony: Nakai ni. Ni okɛ mi baakpã gbee akɛ jeee kɛɛmɔ kɛkɛ ni wɔɔkɛɛ akɛ wɔheɔ Nyɔŋmɔ kɛ Yesu nɔ wɔyeɔ lɛ ji nɔ titri ni he hiaa. Esa akɛ bɔ ni wɔhiɔ shi wɔhãa lɛ atsɔɔ akɛ wɔheɔ amɛnɔ wɔyeɔ lɛɛlɛŋ.

Tim: Anɔkwale.

Anthony: Shi mɛni mɔ ko baafee ni ekɛtsɔɔ akɛ eheɔ Nyɔŋmɔ kɛ Yesu nɔ eyeɔ lɛɛlɛŋ? Ekolɛ be kroko kɛ́ wɔkpe lɛ wɔbaasusu nakai sanebimɔ lɛ he. *

Tim: Ebaaŋɔɔ minaa waa.