António: Bondia maun Timóteo, diʼak ka lae?

Timóteo: Bondia maun, haʼu diʼak.

António: Haʼu lori Livru Haklaken no Matan-moris bá! foun nian atu fó ba maun. Haʼu sente maun sei gosta tebes informasaun iha livru sira-neʼe tanba kapás tebes.

Timóteo: Obrigadu. Maun mai iha tempu neʼebé loos, tanba haʼu iha buat ruma atu husu.

António: Neʼe ka? Hakarak husu kona-ba saida?

Timóteo: Foin lalais neʼe, haʼu koʼalia ho kolega serbisu ida. Haʼu dehan haʼu gosta livru sira neʼebé Ita fó mai haʼu, maibé nia dehan keta lee tanba Testemuña ba Jeová la fiar ba Jesus. Neʼe tebes ka? Haʼu dehan ba nia kuandu Ita mai fali haʼu sei husu.

António: Neʼe hanoin neʼebé diʼak. Diʼak liu husu ami kona-ba ami-nia fiar duké husu fali ema seluk. Se hakarak hatene Testemuña nia fiar loloos oinsá, diʼak liu husu ami rasik, loos ka lae?

Timóteo: Loos, neʼe mak haʼu hakarak husu ba Ita.

António: Tuir loloos, Testemuña ba Jeová fiar duni ba Jesus. Ba ami, fiar ba Jesus mak importante tebes atu bele hetan salvasaun.

Timóteo: Loos, haʼu mós hanoin hanesan neʼe, maibé haʼu-nia kolega serbisu dehan imi la fiar ba Jesus, neʼe mak haʼu hakarak hatene. Ita rua seidauk koʼalia kona-ba neʼe.

António: Haʼu bele loke eskritura balu hodi hatudu ba maun, tanbasá importante atu tau fiar ba Jesus. Eskritura sira-neʼe, ami Testemuña ba Jeová uza beibeik bainhira ami haklaken ba ema.

Timóteo: Diʼak, bele.

António: Mai ita lee uluk Jesus rasik nia liafuan iha João 14:6. Iha neʼe, Jesus koʼalia ba ninia apóstolu ida. Jesus hatete ba nia: “Haʼu mak dalan no lia-loos no moris. Ema ida la bele hakbesik Aman se nia la liu husi haʼu.” Entaun, tuir eskritura neʼe, iha dalan ida deʼit atu bele hakbesik ba Aman. Neʼe liuhusi sé?

Timóteo: Liuhusi Jesus.

António: Loos. Testemuña ba Jeová fiar metin katak liafuan hirak-neʼe mak loos. Tuir loloos, ami hotu sempre hatoʼo ami-nia orasaun liuhusi Jesus nia naran.

Timóteo: Neʼe klaru.

António: Ita bele haree eskritura seluk iha João 3:16. Eskritura neʼe importante tebes. Maski liafuan uitoan deʼit, maibé eskritura neʼe esplika kona-ba Jesus nia moris no knaar. Ema balu dehan evanjellu nia pontu importante mak neʼe. Maun bele lee toʼok?

Timóteo: Bele. Neʼe dehan: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek.”

 António: Obrigadu. Maun hatene ona eskritura neʼe ka?

Timóteo: Sin. Haʼu rona beibeik iha igreja.

António: Ema barak hatene liafuan sira-neʼe. Haree fali Jesus hatete saida. Nia dehan katak Maromak hadomi ema no loke dalan ba ema atu hetan moris rohan-laek. Maibé atu hetan ida-neʼe, saida mak ita presiza halo?

Timóteo: Hatudu fiar iha nia.

António: Loos. Ita presiza hatudu fiar ba Oan-Mane mesak, Jesus Kristu. Ami-nia livru hatudu katak fiar ba Jesus loke dalan hodi hetan moris rohan-laek. Porezemplu, iha pájina 2 husi Livru Haklaken, hatete: “Livru neʼe ajuda ema atu tau fiar ba Jesus Kristu, neʼebé mate atu ita bele hetan moris rohan-laek, no neʼebé sai ona Liurai ba Maromak nia Ukun.”

Timóteo: Afinál, iha imi-nia livru rasik hakerek katak Testemuña ba Jeová fiar Jesus. Klaru loos.

António: Sin.

Timóteo: Se nuneʼe, tanbasá mak ema dehan imi la fiar Jesus?

António: Karik ema koʼalia nuneʼe tanba razaun oioin. Dala ruma, sira rona deʼit husi ema seluk. Ka dala ruma ema iha igreja fó avizu neʼebé sala kona-ba ami.

Timóteo: Karik sira dehan imi la fiar ba Jesus tanba imi bolu an Testemuña ba Jeová, laʼós Testemuña ba Jesus.

António: Ida tan mak neʼe.

Timóteo: Tanbasá mak imi koʼalia barak kona-ba Jeová?

António: Primeiru, ami fiar katak importante tebes atu uza Maromak nia naran rasik, Jeová. Ami halo tuir Jesus nia ezemplu. Mai ita lee toʼok Jesus nia orasaun ba ninia Aman. Iha João 17:26. Maun bele lee versíkulu neʼe?

Timóteo: “Haʼu fó sai tiha ona Ita-nia naran ba sira no sei kontinua fó sai ida-neʼe, atu nuneʼe domin neʼebé Ita hatudu mai haʼu bele hamutuk ho sira no haʼu hamutuk ho sira.”

António: Obrigadu. Iha neʼe Jesus dehan nia fó sai Maromak nia naran ba sira. Tuir Ita-nia hanoin, tanbasá mak nia halo ida-neʼe?

Timóteo: Hmm. Haʼu la hatene.

António: Mai ita lee tan eskritura ida neʼebé ajuda ita atu komprende liután. Iha Apóstolu 2:21. Ida-neʼe hatete: “Ema hotu neʼebé bolu Jeová nia naran sei hetan salvasaun.” Entaun se ema la bolu Jeová nia naran, nia la bele hetan salvasaun. Neʼe mak kritériu ida. Kritériu neʼe Jesus mós hatene, loos ka lae?

Timóteo: Klaru, Jesus hatene duni.

António: Jesus hakarak ninia dixípulu sira atu hetan salvasaun, tan neʼe mak sira presiza hatene no uza Maromak nia naran. Tanba razaun neʼe mak ami koʼalia beibeik kona-ba Jeová. Ami sente importante tebes katak ema hatene Maromak nia naran rasik no atu ajuda ema seluk bolu naran neʼe.

Timóteo: Maibé neʼe la buat ida, loos ka lae? Maski ema la hatene Maromak nia naran, ka la uza naran neʼe, se sira temi deʼit Maromak, neʼe diʼak ona.

António: Karik neʼe loos. Maibé Maromak fó-hatene mai ita ninia naran rasik. Neʼe para ajuda ita atu bele hakbesik ba nia.

Timóteo: Maibé oinsá?

António: Hanoin toʼok kona-ba neʼe. Loloos, ita la presiza hatene Moisés nia naran. Karik Bíblia bele hakerek hanesan neʼe, ‘Iha mane ida neʼebé fahe Tasi Mean, ka mane ida neʼebé simu Ukun-Fuan Sanulu.’ Nuneʼe mós ho Noé. Ita la presiza hatene ninia naran. Bíblia bele hakerek deʼit hanesan neʼe, ‘Iha mane ida neʼebé halo ró  boot no salva ninia família no animál sira.’ Loloos, ita la presiza hatene Jesus nia naran. Ita bele hatene deʼit, ‘Iha mane ida neʼebé mai atu kasu ita hotu nia sala.’

Timóteo: Sin, karik neʼe loos.

António: Maibé Maromak hakarak ema sira-neʼe nia naran hakerek iha Bíblia laran hodi ita bele hatene. Hodi hatene sira-nia naran, ita sente istória sira-neʼe laʼós inventa deʼit, maibé istória sira-neʼe akontese duni. Maski ita nunka hasoru Moisés, Noé ka Jesus, maibé hatene deʼit sira-nia naran halo ita sente hanesan ita bele koñese sira.

Timóteo: Ida-neʼe haʼu foin rona, maibé neʼe loos duni.

António: Tan neʼe, Testemuña ba Jeová sempre uza Maromak nia naran tanba Maromak hakarak ema koñese nia. Ami hakarak ajuda ema atu tau fiar ba Maromak Jeová hodi sira bele hakbesik ba nia. Maibé ami mós hanorin oinsá Jesus loke dalan ba ita atu hetan salvasaun. Ita bele lee eskritura ida tan atu hatudu katak, hatene kona-ba Maromak Jeová no Jesus mak importante tebes.

Timóteo: Diʼak, bele.

António: Ohin ita lee tiha João 14:6, Jesus dehan nia mak “dalan no lia-loos no moris”. Agora haree fali ba versíkulu ida. Maun bele lee parte ikus husi eskritura neʼe?

Timóteo: Neʼe dehan: “Hatudu fiar ba Maromak, no hatudu fiar mós ba haʼu.”

António: Entaun tuir maun nia hanoin, eskritura neʼe haruka ita atu tau fiar ba ida deʼit ka lae?

Timóteo: Lae, Jesus dehan ita presiza tau fiar ba Maromak no mós ba nia.

António: Sin, loos. No karik Ita mós hatene katak, atu hatete deʼit ita fiar ba Maromak no Jesus neʼe la toʼo. Importante hatudu ida-neʼe liuhusi ita-nia hahalok loroloron nian.

Timóteo: Sin, neʼe loos duni.

António: Maibé oinsá mak ema ida bele hatudu ninia fiar ba Maromak no Jesus? Karik ita bele koʼalia kona-ba neʼe iha tempu seluk bainhira haʼu mai fali vizita. a

Timóteo: Neʼe diʼak. Haʼu hein.