Diosaw aka Oraq apnaqaski sasaw waljanejj amuyapjje. Ukampis Jupatï apnaqaspa ukhajja, ¿jan waltʼäwinakajj utjaspati? (Deuteronomio 32:4, 5.) Jan sinttʼasir mä apnaqeriw aka Oraq apnaqaski sasaw Bibliajj yatichi. (1 Juan 5:19 liytʼäta.)

¿Kunjamatsa jupajj aka Oraq apnaqañ qalltawayi? Qalltanjja, mä angelaw Dios contra saytʼäna, ukasti Supayawa, ukat jupjam lurapjjañapatakiw Adanampir Evampir chʼamañchäna (Génesis 3:1-6). Jupanakajj Supayaruw istʼapjjäna, ukhamatwa Supayamp apnaqayasjjapjjäna. Cheqas Taqe Chʼamani Diosakiw jaqenakarojj apnaqañapa, ukampis Jupar munasin jaqenakajj istʼapjjaspa ukwa Diosajj muni (Deuteronomio 6:6; 30:16, 19). Adanampi Evampejja Supayar istʼasajj pantjasipjjänwa, jila parte jaqenakajj ukhamarakiw pantjasipjje, ukajj llakkañawa. (Apocalipsis 12:9 liytʼäta.)

¿Wiñayatakit Supayajj aka Oraq apnaqpachäni? Janiwa. Jehová Diosajj Jesucristo Yoqap toqew kuna jan walinaktï Supayajj utjayawayki ukanak askichani. (1 Juan 3:8 liytʼäta.)

Jehová Diosajj Jesusaruw Supayar tukjañapatakejj chʼam churawayi (Romanos 16:20). Ukat tiempompejja, Diosaw jaqenakar apnaqjjani ukat kunjamtï qalltan jakasipjjañap munkänjja, ukhamaw jaqenakajj kusisita sum jakasjjapjjarakini. (Apocalipsis 21:3-5 liytʼäta.)