Andũ aingĩ metĩkĩtie atĩ Ngai nĩwe wathaga thĩ ĩno. Angĩkorũo nĩguo-rĩ, hihi thĩ nĩ ĩngĩyũirũo nĩ mĩnyamaro? (Gũcokerithia Maathani 32:4, 5) Bibilia yugaga atĩ thĩ ĩno ĩtongoragio nĩ ũrĩa mũũru.—Thoma 1 Johana 5:19.

Hihi gwathiire atĩa ũcio mũũru agĩtuĩka wa gwathaga thĩ ĩno? Hĩndĩ ĩrĩa andũ moombirũo, harĩ mũraika ũmwe waaremeire Ngai na akĩhatĩrĩria Adamu na Hawa o nao mareme. (Kĩambĩrĩria 3:1-6) Adamu na Hawa maathuurire gwathĩkĩra Shaitani, mũraika ũcio mũremi, na kwoguo magĩtĩkĩra amaathage. Ngai Mwene-Hinya-Wothe nĩwe wagĩrĩirũo gwathana, ĩndĩ endaga andũ mathuure wathani wake, nĩ ũndũ wa wendo wao kũmwerekera. (Gũcokerithia Maathani 6:6; 30:16, 19) Ũndũ wa kĩeha nĩ atĩ, andũ aingĩ nĩ matuĩte itua rĩũru o ta rĩa Adamu na Hawa.—Thoma Kũguũrĩrio 12:9.

Hihi Ngai egwĩtĩkĩria Shaitani athiĩ o na mbere gwathana? Aca! Nĩ arĩhũthĩra Jesu gũtharũria wĩra wa Shaitani.—Thoma 1 Johana 3:8.

Jesu nĩ arĩniina Shaitani akĩhũthĩra hinya ũrĩa aheetwo nĩ Ngai. (Aroma 16:20) Thutha ũcio, Ngai athamakĩre andũ, na amacokerie ũtũũro wĩ na gĩkeno na thayũ, o ta ũrĩa aatanyĩte hau kĩambĩrĩria.—Thoma Kũguũrĩrio 21:3-5.